Filipi 4 - Asang Khongso New Testament

Thuihtaekhaih

¹ Topongah naukamzanawk, nangcae to kang palung o phi moa kang dawn o parai! Nangcae hae kai kanghoehaih iah na oh o moa kamluehaih iah doeh na oh o. Topacoengah naukamzanawk, Angraeng thungah nang hinghaih o ih pongah to kacak ah angdoe oah.

² Euodia hoi Sintikhe, tahmenhaih hoiah kang pacae hoi, Angraeng ah naukamza batiah palungthin maeto ah adue hanah panki hoi ah.

³ Ka oeptang ih toksah ampui, nang doehsoe ahi nongpuinawk hae na bom toeng hanah kang koeh; kawmawtiah anihcae loa Klement hoi Sithaw ih cabu thungah ahmin kaom toksah ampui kalahnawk boih hoi tamthang kahoih taphong hanah kai hoiah nawnto ah toksak panki parainawk ni.

⁴ Angraeng hoiah angpaehhaih ranghoiah anghoe oah. Ka thuih bae han, anghoe oah!

⁵ Mi boih khaeah tuinom hoihhaih ih palungthin to amtuengsak oah. Angraeng loa angzo palang tih.

⁶ Kawbatih hmuen kawng pongah doeh mawn o hmah, kho na phoeh o kruekah nangtoeng o ih to Sithaw khaeah hnih oloa kawnhaih ih palungthin hoiah hnih o toemoe ah.

⁷ Kami mah panoek kophaih ih laep ah kaom Sithaw monghaih mah nangcae palungthin hoi poekhaih ih to Khrih Jesuh hoiah angpaehhaih ranghoiah kasueng ta-ah na suem o tih.

⁸ Aboenghaih koek ah naukamzanawk, nangcae ih palungthin to kahoih hoi pakoeh ka krah: kahmaan, atho kaom, katoeng, kacai, palung hankoi kaom hoi khangza hankoi kaom hmuennawk hoiah koi oah.

⁹ Ka lokthuih ihnawk hoiah doehsoe, ka sak ihnawk hoiah doehsoe, kai khae hoi-ih nam tuk o ih hoi na hak o ih to sah oah. Totiah sak nahaeloa aicae hanah monghaih ka paekkung Sithaw loa nangcae khaeah om tih.

Kawnhaih Langrae

¹⁰ Atue akraa parai pacoengah kai taham nang poekhaih o ih atue kahoih to vaito nam tuengsak o let pongah Angraeng hoiah angpaehhaih ih ka hinghaih ranghoiah katingai kanghoe. Hitiah ka thuih na-ah kai taham poekhaih ih to na toengh o sut boah tihaih ih na ai ni, nam tuengsak thai ih atue kahoih to na tawn o ai tihaih ih ni.

¹¹ Topacoengah, kai hae nang dawncang o ai boah mue tiah ka dawn pongah ka thuih ih na ai ni, kai loa ka tawnh ih ta hoiah palungkhuek ka tiah oh thaih hanah kamtuk boah.

¹² Avawthaih hoiah ka oh doehsoe, kamhlai zawt ah ka tawnh doehsoe, kawbangah maw a oh tito ka panoek kop boah. Totiah hingh kophaih ih tamqu tamqaih hae kamtuk boah topongah naahmuenh ah doeh, kawtih tue ah doeh, zok kamhlam ah oh doehsoe, zok kamha oh doehsoe, zetpui ka tawnh doehsoe, zetta ka tawnh doehsoe, palung ka nawm ta-ah ka oh thai boah.

¹³ Khrih mah ang paek ih tharahhaih ranghoiah kawbatih angdoethmuenh ah doehsoe ka hmak thai boah.

¹⁴ To-e raihaih ka tongh na-ah nang bom o hae nangcae ih katingai na hoihhaih o ih ni.

¹⁵ Nangcae Filipi vang ih kaminawk, Masidonia prae to ka tacawt tak moa Tamthang Kahoih taphong kamtong thuemtham na-ah nangcae Khrihca kangkom khueh mah ni loa nang bom o; kamraihaih hoi ka sunghaih ih panoek haih bomkung loa nangcae khueh ni.

¹⁶ Thesalonika vang ih abomhaih kangtoeng na-ah vaito cang aiah abomhaih ih to nang pat o.

¹⁷ Nangcae ih hmuenpaek to hak hanah ka koeh ih khueh na ai ni, nangcae ih cazin pongah kamrai thapthuih ih to hnuk han ka koeh.

¹⁸ Topongah hi hae nangcae mah nang paek o ih boiboih to ka hnuk tihaih ih ca ni; nang paek o ih hae kangtoeng ih pongdoeh amhlai boah! Nangcae ih hmuenpaek boiboih to Epafroditas mah ang phawh moa vaihi loa kangtoeng ih boiboih to ka hak boah. Hi hmuenpaek ihnawk loa Sithaw mah koeh ih hoi talawk ih angbawnhaih hmui kahoih paek ih batih ni a oh.

¹⁹ Topacoengah Khrih Jesuh ranghoiah ka Sithaw mah angmah angraenghaih ih boiboih hoiah nangcae angtoenghaih boiboih to na paek o tih.

²⁰ Aicae Ampa Sithaw khaeah lensawkhaih ih dungzan hoi dungzan khoekto oh na soe! Amen.

Hnukkhuem Koek Pringlanghaih

²¹ Khrih Jesuh ih kami ah kaom Sithaw kami longto rip to ban na sin pae oah. Hiah kai hoiah nawnto kaom naukamzanawk boih mah nangcae to ban ang sinh o.

²² Hi ih kaom Sithaw kaminawk boih hoi, lokpui koek ah Sangpahrang ih im ah kaom mah ban ang sinh o.

²³ Angraeng Jesuh Khrih tahmenhaih to nangcae boih khaeah om na soe.