Filipi 3 - Asang Khongso New Testament

Toenghaih Tangtang

¹ Aboenghaih koek ah, naukamzanawk, Angraeng hoiah angpaehhaih ranghoiah anghoe oah. Hmaloe ih nangcae khaeah kang tarik o kok ih tarik let bae han hae karai kacang ah ka dawn ai, ka tarik nahaeloa nangcae ka suengsakkung ah om aep tih.

² Uinawk, hmuen kahoih ai ka sah kaminawk, takbum hae aah han oh ka ti kaminawk to acoe oah.

³ Tangzat hin aah ih tangtang ka hakkung loa anihcae na ai moa aicae hae ni, kawmawtiah aicae loa a Pakhra ranghoiah Sithaw to bok o moa Khrih Jesuh hoiah angpaehhaih ranghoiah aicae loa anghoe o. Tasabang ih tawkcah pongah angoephaih tidoeh ka tawn o ai.

⁴ Thuih tangtang nahaeloa kai doehsoe tobatih hmuennawk pongah angoep thaih toeng. Kami longlongto mah tasabang ih tawkcah pongah angoep thaih tiah dawn nahaeloa kai doeh angoep haih hanah ka tawnh aep.

⁵ Tabaih maeto oh na-ah tangzat hin aah ah ka oh. Ka zah nahoiah Israel kami, Benjamin caeng, Hebru kami kacai ah ka oh.

⁶ Ato bangah tha ka ueng hmoek moa Khrihca kangkom to ka pacaek ka pahlaek. Tawklok pazuihaih hoiah kami katoeng ah oh thaih han bangah loa kai loa coekhaih om ai.

⁷ To-e to hmuennawk boih to amraihaih iah ka dawn ihnawk hae vaihi loa Khrih hanih pongah sunghaih iah ka dawn boah.

⁸ Ato hmuennawk khueh na ai; hmuen kalah cungriboih doeh hae tiboih boih pongdoeh atho kaom pahlai ka Angraeng Khrih Jesuh panoekhaih ranghoiah sung kingah ka dawn boah. Angmah hanih pongah cungriboih to ka vah king boah; Khrih ka hak thaih han hoi,

⁹ angmah hoiah kacung ah angpaeh thaih hanah tiboih boih hae anghnoeng angoih batiah ni ka dawn boah. Tawklok pazuihaih ranghoiah ka hak ih toenghaih hae ka tawn ai boah. Vaihi toenghaih ka tawnh ih loa Khrih taanghaih ranghoiah paek ih toenghaih ni, taanghaih pongah takung kangsut Sithaw khae hoi-ih kangzo toenghaih ih ni.

¹⁰ Ka koehhaih ih loa Khrih panoek hoi angthawklethaih ih tharahhaih to pataeng toeng hoi angmah patang khang haih bo hoi a duekhaih ih pongah angmah batiah coengh hae ni.

¹¹ Ka oepdoenghaih koek ih loa duekhaih thung hoitoah hinghaih bangah angthawksak let tih tihae ni.

Patoephaih Bangah Ka Cawnh

¹² Ka hak boah, ka cung ka koep boah tiah ka thui ai. Khrih Jesuh mah angmah han-iah ang pazawk boah pongah kai hanah suek ih zomtho to hak hanah ka panki.

¹³ Ampuinawk ato to ka hak boah tiah ka dawn ai roeroe; hmuen maeto ka sak ih loa hnuk bangih ka laem tangcae hmuen to pahnet ving moa ka hmabang ih kaom hmuen khaeah to phak hanah ka zom.

¹⁴ Topongah zomtho to hak hanah patoephaih ih bangah ka toeng ta-ah ka cawnh. Ato zomtho loa ranui bangih hinghaih hanah Khrih Jesuh ranghoiah Sithaw ih kawkhaih ih ni.

¹⁵ Pakhra bangah kacoeh aicae boih loa tobatih palungthin to tawnh han oh. To-e nangcae thungih thoemto mah palungthin kalah tawn o nahaeloa ato to nangcae khaeah Sithaw mah kamnoek ah amtuengsak tih.

¹⁶ Kawbangah doehsoe, vaihi khoekto pazui o ih tawkcah batih toengah hmabang ah caeh o si.

¹⁷ Naukamzanawk, kai ih hae khenpatawt oah. Kaicae mah nangcae hanah kang suek o ih khetpatawt hankoi kahoih pazui kaminawk to khenpatawt oah.

¹⁸ Hi hae vaih paroeai kang thuih o boah moa vaihi doeh miktui hoiah kang thuih o let bae: kraws pongah Khrih duekhaih ih hae misa ah ka coengsak kami paroeai a oh.

¹⁹ Anihcae loa hell ah loklam to boeng o tih, kawmawtiah anihcae ih sithaw loa angmahcae takngan koehhaih ih ni. Azat kaom hmuen to amoek o haih moa hi longnui hmuen khueh to a poek o.

²⁰ To-e aicae loa van prae ih kami ah oh o moa van bang hoitoah aicae Pahlongkung Angraeng Jesuh Khrih kangzo han to minghaih hoiah zing o.

²¹ Anih mah tha ka zok moa kadueh thaih aicae ih takbum hae alaih ueloa angmah ih lensawkhaih ih takbum batiah sah tih, totiah sak hanah tiboih boih to angmah ih ukhaih hlimah suek thaih ih tharahhaih to patoh tih.