Filipi 2 - Asang Khongso New Testament

Khrih Angdokhaih hoi A Lenhhaih

¹ Khrih ah hinghaih ih mah nangcae to tha ang rahsak o moa a amlunghaih mah nangcae to ang mongsak o. Nangcae loa Pakhra hoiah angkomhaih ih to na tawnh o, longto hoi longto nuiah tahmenhaih hoi palungnathaih to na tawnh o.

² Topongah poekhaih maeto ah anghmonghaih, longto hoi longto amlunghaih hoi palungthin maeto ah amhonghaih hoiah kai hae anghoehaih acungsak oah tiah kang pacae o.

³ Aimah taham khueh dawnhaih hoi amlue koehhaih ih palungthin hoiah tidoeh sah o hmah, kai pongdoeh mi kalahnawk to a hoih kue tiah dawn toemoe lamhoiah longto hoi longto angdokhaih palungthin to tawn oah.

⁴ Nangmahcae koehhaih khueh to khen aiah mi kalah koehhaih ih to khen pae kop ah.

⁵ Palungthin na tawnh o hanih loa Khrih Jesuh mah tawnh ih palungthin batiah oh na soe:

⁶ Khrih loa Sithaw coenghhaih ih to a oh poe, to-e Sithaw hoiah angvan hanah oh hanah a zom nganga ai.

⁷ Totiah oh pongloa, Angmah ih palung angthawkhaih hoiah a tawnh ih boiboih to a caehtak moa, tamtoeh coenghhaih ih to a lak. Kami batiah angcoeng moa kami kraang ah amtueng.

⁸ Angdokhaih palungthin to a tawnh moa kraws ah duek khoekto lok tahngaihhaih ih loklam to a pazui.

⁹ Topongah ranuibang ahmuenh kasang koek ah Sithaw mah pasang moa ahmin kalah boih pongdoeh ahmin kalen koek to a paek.

¹⁰ Topongah Jesuh hmin to khangzahaih hoiah van ih ka omnawk boiboih, longnui hoi longnui hlim ih ka omnawk boiboih mah khokkhu samkrawn o ueloa,

¹¹ Pa Sithaw lensawkhaih han-iah anihcae boih mah Jesuh Khrih loa Angraeng ni tiah taphong o tih.

Sakae Batiah Aanghaih

¹² Topongah, palung ih ampuinawk, nangcae hoiah ka oh nawn na-ah ka lok na tahngai o toemoe batiah vaihi nangcae khae hoitoah kahla ah ka oh nathuemah ka lok na tahngaih o ih hae lokpui kueah a oh. Pahlonghaih ih kacung to na hak o thaih hanah zithaih hoi tasoeh takuenhaih hoiah tok o toemoe ah.

¹³ Kawmawtiah Sithaw loa nangcae koehhaih ih to sak han hoi angmah amsakhaih ih to na pazui o thaih hanah nangcae thungah tok a sak toemoe.

¹⁴ Tiboih to laisaep ai hoi aek ai hoiah sah oah.

¹⁵ Tona-ah ni loa longnui ih kami kahoih ai hoi kami kazaenawk thungah kaom nangcae hae Sithaw ca kacung, zaehaih ka tawn ai hoi kacai kami ah na om o tih. Nangcae loa nilavan ih sakae ka aang batiah anihcae salak thungah na aang o hanah oh.

¹⁶ Hinghaih tamthang lok na taphong o na-ah tobatiah aang oah. Totiah na sak o nahaeloa Khrih Ni ah nangcae to kamlue o haih han ih to ka tawn tih, kawmawtiah ka pankihaih ih hoi ka tokhaih hae azom mak ai tito amtuengsak tih.

¹⁷ Nangcae ih taanghaih to Sithaw khaeah angbawnhaih ih batiah na paek tahlang o ih nuiah ka hinghaih ih thii hae bawh langla cadoehsoe ato loa kanghoehaih iah om ueloa nangcae boih mah ato kanghoehaih ih to nang bo o haih ka koeh.

¹⁸ Tobatih toengtoeng ah nangcae doeh nanghoe o han oh moa palung nanghoehaih o ih to nang bo o haih toeng hanah oh.

Timote hoi Epafroditas

¹⁹ Sithaw koehhaih ih om nahaeloa, nangcae ih tamthang ka thaih ranghoiah tha ka oh thai hanah Timote hae nangcae khaeah kang patoeh palang thai tih tiah oephaih ka tawnh.

²⁰ Anih khueh ni kai hoiah palungthin kanghmong moa nangcae taham ka poek tangtang kami ah oh.

²¹ Kalahnawk loa Jesuh Khrih kawng to dawn o ai moa angmahcae ih taham khueh to a dawn o.

²² Anih loa kawkruk maw oepthoh tito nangmahcae khaeh mah na panoek o ih ni. Kai hoiah ampa hoi capa batiah tamthang kahoih han-iah tok ka sak hoi nawn tito na panoek o.

²³ Topongah kai hanah kawbatih hmuen maw coeng tih tito ka panoek hoiloa kang patoeh roep thai tih tiah oephaih ka tawnh.

²⁴ Kaimah roeroe hae nangcae khaeah kangzo thaih palang tih tiah Angraeng oeptanghaih hoiah ka oh.

²⁵ Aicae ih amnauk Epafroditas hae kang patoeh hanah angtoeng tiah ka dawn. Anih loa kai hoiah tok ka sah nawn hoi misa ka tuh nawn ah oh moa kai ka bom hanah laicae batiah nang patoeh o ih ni.

²⁶ Anih loa nangcae boih to hnuk hanah a koeh parai, anih to ngantui ai tiah tamthang na thaih o pongah anih loa palunghoih ai.

²⁷ Anih loa ngannat tangtang moa a duek dui. To-e Sithaw mah a tahmen, anih khueh aiah kai doeh tahmen toeng moa palungsethaih kalen aep ka pha hankoi thung hoitoah ang loihsak.

²⁸ Topongah nangcae mah anih to na hnuk o na-ah palung nang hoe o let han hoi kai palungsethaih ih anghmatsak hanah anih to nangcae khaeah patoeh hanah ka koeh aep aep.

²⁹ Topongah anih to Angraeng thungih naukamza longto batiah kawnhaih hoiah talawk oah. Anih batih kami to loa khangzahaih paek oah,

³⁰ kawmawtiah nangcae mah na paek o thaih ai ih abomhaih to kai han paek hanah a hinghaih to angthuh moa Khrih ih tok han-iah duek dui khoekto tok a sak.