Ephesi 5 - Asang Khongso New Testament

Aanghaih Thungah Hinghaih

¹ Nangcae loa Sithaw mah palung ih canawk ah na oh o pongah angmah batih toengah oh hanah zom oah.

² Khrih mah aicae hae ang palung moa Sithaw mah koeh ih angbawnhaih hoi hmuihoih tahlang ih batih toengah a hinghaih ang paek pongah nangcae hinghaih to amlunghaih ih mah uk na soe.

³ Sithaw kami ah na oh o pongah nongpui nongpa zaehaih, khet kamcuk aiah hinghaih hoi kaoeloe koehhaih ihnawk to thuih mataeng doeh thui o hmah.

⁴ Kamhnong kam-ak lok, loksae hoi tahngaih kahoih kapaih ai loknawk to apaeh han om ai. Totoek pongloa Sithaw khaeah kawn lok to thui oah.

⁵ Kacaipin ah na panoek o hanih loa, nongpui nongpa zaehaih ka sah kami, khet kamcuk aiah kahing kami hoi kaoeloe ka koeh kaminawk (Kaoeloe koehhaih ih loa kraangthoi bokhaih ih maeto ni) loa Khrih hoi Sithaw Poenghaih thungah hak hanih taham tidoeh tawn mak ai.

⁶ Mimah doeh atho kaom ai lok hoiah na ling o hmah na soe; ahi hmuennawk pongah Sithaw palungphuihaih ih loa a lok tahngai ai kaminawk nuiah to pha tih.

⁷ Topongah tobatih kaminawk to loa angkom doeh angkom o haih hmah.

⁸ Nangmahcae roeroe doeh vinghaih thungah na oh o, to-e Angraeng kami ah na oh o boah pongah vaihi loa aanghaih thungah na oh o. Topongah aanghaih kami batiah hing oah,

⁹ kawmawtiah hoihhaih cungri, toenghaih cungri hoi loktang lok cungri ka tacawtsakkung loa aanghaih ih hae ni.

¹⁰ Angraeng palung kanghoesakkung hmuen to pakrong han panki oah.

¹¹ Kami mah sak toemtoem ih atho kaom ai hmuen hoi khoving thungih hmuennawk to sah o hmah. Tobatih hmuennawk to aanghaih pongah amtuengsak o lat ah.

¹² (Anihcae mah tamqu lamah a sak o ih hmuennawk to thuih han mataeng doeh azat thoh parai).

¹³ Tiboih boih to aanghaih khaeah tacawt haih ah oh na-ah a coenghhaih o ih tangtang to amtueng king tih;

¹⁴ kawmawtiah tiboih boih kacaipin ah amtuengsak ih loa aanghaih ah a coengh. Topongah, “Ka iip kaminawk, angthawk oah, duekhaih thung hoitoah angthawk oah, totibaloa Khrih to nangcae nuiah aang tih,” tiah thuih ih batiah oh tangtang.

¹⁵ Topongah na hinghaih o ih to acoe oah. Tidoeh ka panoek ai kami batiah hing o hmah aloa kacing kami batiah hing oah.

¹⁶ Atue kahoih na tawnh o ih kruekah hoihdak ta-ah patoh oah, kawmawtiah vaihi atue ani loa dung kasae ah oh boah.

¹⁷ Topongah kamthu ah om o hmah, Angraeng mah saksak han a koeh ih to pakrong han panki oah.

¹⁸ Mu paqui o hmah, mu loa nangcae parokung khueh ah ni a oh; totoek pongloa Pakhra hoiah koi oah.

¹⁹ Longto hoi longto Saam laa, laa hoi pakoehhaih laa lok hoiah apae oah; Angraeng loa laa hoi Saam laa hoiah nangcae palungthin tang hoiah pakoeh oah.

²⁰ Aicae Angraeng Jesuh Khrih hmin hoiah cungriboih hanah Pa Sithaw khaeah kawn lok to thui o toemoe ah.

Zu hoi Sava Kawng

²¹ Khrih khangzahaih ranghoiah longto hoi longto koehhaih ih to pazui oah.

²² Zunawk, Angraeng koehhaih ih to na pazui o batiah na sava koehhaih ih to pazui oah.

²³ Kawmawtiah Khrih loa Khrihca kangkom nuiah akaa a tawnh batih toengah sava loa a zuca nuiah akaa a tawnh toeng; Khrih angmah roeroe hae Khrihca kangkom ih Pahlongkung ah a oh moa Khrihca kangkom loa a takbum ni.

²⁴ Topongah Khrihca kangkom loa Khrih hlimah angdok moa a oh batih toengah zunawk doeh a sava ih hlimah angdokhaih hoiah om o na soe.

²⁵ Savanawk, Khrih mah Khrihca kangkom to palung moa a hinghaih a paek batih toengah na zunawk to palung oah.

²⁶ Hitiah a sakhaih ih loa Khrihca kangkom loa tui hoiah pasaehhaih ranghoiah a thoengcaisak pacoengah a lok hoiah Sithaw khaeah tahlang hanah ni.

²⁷ Khrihca kangkom loa a hoihhaih boiboih ah kaom kacai hoi pazaehaih kaom ai, coekhaih kaom ai, acunghaih ai ih tidoeh kaom aiah angmah khaeah phaksak han koeh pongah ni.

²⁸ Nongpanawk mah a zunawk to angmahcae ih takbum palung o batih toengah palung o han oh. A zu ka palung loa angmah hoi angmah ka palung kami ni.

²⁹ (Mimah doeh angmah ih takbum to hnumaa vaih ai. Khrih mah Khrihca kangkom to a kok atangh moa khetzawn batih toengah ami doeh angmah ih takbum to a kok atangh moa khetzawn han oh;

³⁰ kawmawtiah aicae loa a takbum ih kampraek ah oh o).

³¹ Cabu Kacai mah, “Hi kawng pongah nongpa mah amno hoi ampa to caehtak ueloa a zu hoiah bum maeto ah om hoi tih, anih hnit loa maeto ah coeng hoi tih boah,” tiah a thuih.

³² Hi Cabu Kacai mah amtuengsak ih loktamqu loktang lok kathuk kaning to a oh, ato loa Khrih hoi Khrihca kangkom to a patahhaih ih ni tito ka thaihkop.

³³ To-e nangcae hoiah doeh angpaeh toengtoeng: sava boih mah angmah ih takbum to palung batih toengah a zu to palung na soe, a zu boih mah doeh a sava to khangza na soe.