Ephesi 4 - Asang Khongso New Testament

Takbum Maeto Ohhaih

¹ Topongah Angraeng tok ka sak pongah thongim ka krah kaimah kang pacae o: Sithaw mah ang kawk o na-ah na ohhaih o ih taring batih toengah na hinghaih o ih pongah angmah ang kawkhaih ih kamcuk ah hing oah, tiah kang pacae o.

² Mi hlimah angdokhaih ih palungthin to tawn oah, tuinom hoihhaih hoi palungsawkhaih hoiah om o toemoe ah. Longto hoi longto pauep thaihaih hoiah amlunghaih to amtuengsak oah.

³ Nangcae to nawnto kang cusak monghaih ranghoiah Cai Pakhra mah paek ih palungthin maeto ah amhonghaih ih to angcaksak o poe ah.

⁴ Sithaw mah ang kawk o na-ah oepdoenghaih ih maeto a oh batih toengah takbum maeto hoi Pakhra maeto a oh.

⁵ Angraeng maeto, taanghaih maeto, baptisma maeto a oh.

⁶ Sithaw maeto a oh moa mi boiboih ih Ampa, tiboih boih ih Angraeng, tiboih boih nuiah tok a sak moa tiboih boih thungah ka om ni.

⁷ Aicae longto rip hae Khrih mah ang paek ih taring batiah langrae to a hak o.

⁸ Cabu Kacai mah, “Kasang parai hmuenh ah a dawh tahang na-ah, misanaeh ihnawk zetpui to angmah hoiah a caeh haih; kaminawk khaeah langrae to a paek,” tiah thuih ih to a koep tangtang.

⁹ Topacoengah “A dawh tahang” tihae thuih koehhaih ih loa timaw? A thuih koehhaih ih loa hmaloe koek ah long hlim ka hnaem koek ah anghum tihaih ih ni.

¹⁰ Topongah kanghum tathuk kami loa long hoi van bum boih ah koi king hanah van hoi van laepbang khoekto ah ka daw tahang angmah toengtoeng to ni.

¹¹ “Kaminawk khaeah langrae ka paekkung” doeh angmah ni; thoemto loa kawkpatoeh hanah, thoemto loa tahma hanah, thoemto loa tamthang kahoih taphongkung hanah, thoemto loa pastawr hoi patukkung hanah a suek.

¹² Hitiah a sakhaih ih loa Khrih ih takbum to qoenghsak han-iah Sithaw kaminawk boih mah Khrihca tok to a sak o thaih hanah paroephaih coek ih ni.

¹³ Totitoah aicae taanghaih ih hoi Sithaw Capa panoekhaih ih pongah maeto ah angcu o thaih tih; palung kaha kacoeh kami ah om o ueloa Khrih ih acunghaih kasang koek ahmuenh ah doeh pha o thaih tih.

¹⁴ Tona-ah loa pasoem hmang ih lok kamlai hoiah minawk to lam angkhraengsak hanah kaling kaminawk mah patukhaih ih tuiphu hoi takhi mah koehkoeh nabangah ka sin lingloi naukta batiah aicae loa om o mak ai boah.

¹⁵ Aicae loa amlunghaih palungthin to tawnhhaih hoiah loktang lok to thuih o lat moa aicae ih lu koek ah kaom Khrih bangah cungriboih ah qoengh hanah a oh.

¹⁶ Khrih angmah ih ukhaih hlimah takbum pongih kampraek kalah kalahnawk boih to angpaeh o king. Ahuh kamtom hoi ahuh tangkhring mah takbum boih to maeto ah tacu king. Topongah takbum pongih kampraek kalah kalahnawk boih loa angmahcae mah sak hankoi to a sak o rip na-ah takbum boih hae amlunghaih hoiah a qoengh tahang.

Khrih Thungah Hinghaih

¹⁷ Topongah Angraeng hmin hoiah acoehaih kang paek o: Sithaw ka panoek ai kaminawk batiah hing o poe hmah lai ah. Anihcae poekhaih ihnawk loa azompui ah oh moa,

¹⁸ palungthin loa ving o khak. Sithaw mah paek ih hinghaih thungah a paa o ai, kawmawtiah tidoeh panoek pacak o ai moa palungthin to a thah o krang.

¹⁹ Azathaih ih doeh panoek o ai boah; angmahcae hoi angmahcae to zaehaih thungah angthumh o puet moa amquemhaih ih om aiah zaehaih congca to a sak o.

²⁰ Khrih kawng na panoek o ih loa totiah na ai ni;

²¹ Khrih kawng loa na thaih o moa angmah ih hnukbang ah na oh o batih toengah Jesuh thungah kaom loktang lok to namtuk o boah.

²² Topongah hmawnh ih na hinghaih o ih batih toengah ka hingsakkung hinghaih kangquem to angkhring o lai ah; ato hinghaih kangquem loa kami ka ling thaih takngan huedoenghaih ih mah ka paro toemoe to ni.

²³ Nangcae ih palungthin hoi poekhaih ih boih to sak kangtha ah oh king hanah oh.

²⁴ Sithaw ih tungkraang hoiah kahmong ah sak ih kami kangtha to anghlong oah, ato loa katoeng hoi kacai ah kamtueng hinghaih ih tangtang ni.

²⁵ Topongah amsawn lok to thui o hmah laiah. Longto hoi longto loktang lok to thui oah, kawmawtiah aicae boih loa Khrih takbum pongih kampraek ah oh o king.

²⁶ Palung na phui nahaeloa palungphuihaih ih mah zaehaih thungah na caeh haih hmah na soe; na palungphuihaih ih to niduem haih hmah.

²⁷ Diabol to atue kahoih paek hmah.

²⁸ Kamqu kaminawk loa amqukhaih ih to toengh o lai na soe; angmah hanah katoeng ta-ah zokzae angkok han hoi mithoe naqahnawk to abom thaih hanah tok to sah na soe.

²⁹ Lok kaham to patoh o hmah. Minawk hanah atho kaom lok, angtoenghaih ih to hoihhaih ka tacawtsak thaih lok khueh to apae oah. Tona-ah ni lok napaeh o ih to ka thaih kaminawk mah hoihhaih to hnuh o tih.

³⁰ Cai Pakhra to palungsaesak o hmah; kawmawtiah Pakhra loa Sithaw ih boah ni tito amathaih ih hoi Sithaw mah nangcae loihsakhaih Ni to pha tih tito amahkhanhaih ih ni.

³¹ Palungkhahaih, takngan huedoenghaih hoi palungphuihaih ihnawk boih to vah o ving ah. Hraw-anghaih, mi kasae thuihhaih hoi mi hnukmaahaih ih kalah kalah to tawn o hmah laiah.

³² Totoek pongloa longto hoi longto tahmen hoi palungthin ka naem hoiah om o aloa, Khrih ranghoiah Sithaw mah nangcae to zaehaih tahmen batiah longto hoi longto zaehaih tahmen toengh oah.