Ephesi 3 - Asang Khongso New Testament

Gentel Kaminawk Hanah Paul Toksakhaih

¹ Hi kawng pongah Khrih Jesuh hanah thongkrah ah kaom kai Paul mah nangcae Gentel kaminawk hanih pongah Sithaw khaeah kho ka phoeh.

² Sithaw mah a tahmenhaih ranghoiah nangcae hoihhaih hanah hi tok hae sak hanah kai ang paek boah tito na panoek o king boah.

³ Sithaw mah tamqu lamah amsakhaih ih to taphong moa kai khaeah amtuengsak boah. (Hi kawng hae setta ah kang tarik o boah,

⁴ ka tarik ih to na kroek o nahaeloa Khrih ih loktamqu ka thaihkophaih ih kawng to na panoek o thaih tih).

⁵ Zanghnii aloa hi loktamqu hae kaminawk khaeah thuih ah om ai, to-e ato to vaihi aloa Sithaw mah a Pakhra hoiah angmah ih kawkpatoeh kacainawk hoi tahmanawk khaeah to taphong boah.

⁶ Ato loktamqu loa tamthang kahoih ranghoiah Gentel kaminawk doeh Judah kaminawk hoiah nawnto Sithaw tahamhoihhaih ih ka hnuhkung ah oh o toeng boah; takbum maeto thungah a paa o toeng moa Khrih Jesuh ranghoiah Sithaw lok amaihhaih ih thungah taham a tawnh o toengh boah.

⁷ Sithaw mah paek ih langrae ranghoiah tamthang kahoih ih tamtoeh ah ka oh. Ato langrae loa a tharahhaih ih toksakhaih ranghoiah Sithaw mah kai ang paek.

⁸ Kai loa Sithaw kaminawk boih thungah kathoeng koek pongdoeh kathoeng kueah ka oh; to-e Khrih angraenghaih ka boeng kanghmang Tamthang Kahoih to Gentel kaminawk khaeah thuih han hoi,

⁹ Sithaw amsakhaih ih loktamqu to kawbangah maw amtueng ah om tih tito kami boiboih to hnuksak hanah Sithaw mah tok ang paek. Cungriboih ka sahkung Sithaw mah hnuk bangih dung thung boiboih ah loktamqu to a hawk hmoek.

¹⁰ Vaihi tue aloa Khrihca kangkom ranghoiah vannui ih vanmi ukkung hoi akaatawn kungnawk mah Sithaw ciinghaih kalah kalah to panoeksak o hanah ni.

¹¹ Sithaw mah a dungzan amsakhaih to a tawnh batih toengah aicae Angraeng Khrih ranghoiah acungsak.

¹² Aicae loa Khrih hoiah angpaehhaih hoi taanghaih ranghoiah Sithaw ohhaih ih khaeah misahoihhaih hoi angoephaih hoiah akun thaihaih ih to tawnh o.

¹³ Topongah nangcae hanah patang khanghaih ka pauep pongah palungboeng o hmah, nangcae hoihhaih hanih ngai ni a oh.

Khrih Amlunghaih

¹⁴ Hi kawng pongah Sithaw hma-ah khokkhu samkrawn moa lawk ka thuih.

¹⁵ Angmah khae hoitoah van ih imthungtako kruek ih kaminawk hoi longnui ih kaminawk boih mah angmahcae ih ahmin tang to a hak o.

¹⁶ A lensawkhaih ih katingai thung hoitoah nangcae a thung bangih kami coenghhaih ih to a Pakhra ranghoiah tharahhaih to paek hanah Sithaw khaeah kho ka phoeh moa,

¹⁷ taanghaih ranghoiah nangcae ih palungthin thungah Khrih mah a ohhaih ih im ah sak hanah kho ka phoeh. Nangcae mah tangzun hoi amprawkhaih takung to amlunghaih thungah na tawnh o thaih hanah kho ka phoeh bae vop,

¹⁸ tona-ah ni Sithaw kaminawk boih hoiah nawnto palungthin maeto ah Khrih amlunghaih kalen kasawk hoi kathuk kasang to na panoek o thaih tih.

¹⁹ A palunghaih ih hae kacung ah na panoek o thaih ai cadoehsoe na panoek o tih; topongah Sithaw coenghhaih kacung hoiah na koi o boih tih.

²⁰ Aicae thungah a tharahhaih hoiah tok ka sahkung mah hnik o thaih ih hoi poekdawn o thaih ih pongdoeh kamhlai ah a sak thai.

²¹ Khrihca kangkom thung hoi Khrih Jesuh thungah angmah Sithaw khaeah pakoehhaih loa dungzan hoi dungzan ah om poe na soe! Amen.