Angtawtha 9 - Asang Khongso New Testament

Paul Palung Anglaihhaih

¹ To tue nathuem tham ah Angraeng ih hnukbangnawk to Saul mah pacaekhlaek moa hum hanah angcaeng. Qaihma Kalen khaeah a caeh moa

² Damaskas vang ih sinakok ukkungnawk khaeah panoek bomhaih ih ca to a hnik. A patoephaih ih loa ato vang ah Angraeng ih Loklam pazuinawk om nahaeloa nongpui doehsoe, nongpa doehsoe naeh moa Jerusalem ah caeh haih han hae ni.

³ Saul loa a caeh moa Damaskas vangpui a phak tom na-ah nawnetta ah van bangih aanghaih maeto mah a toeh moa a taenghaek to aang phung.

⁴ Anih loa long ah amtim moa lok maeto mah, “Saul, Saul, tipongmaw kai hae nang pacaekhlaek?” tiah a naa.

⁵ “Ami nang maw, Angraeng?” tiah a naa. Lok mah, “Kai hae nang pacaekhlaek ih Jesuh ni,” tiah a naa pae.

⁶ “To-e angthawk aloa vangpui thungah to akun ah, toah to na sak hanih to na thui o tih,” tiah a naa.

⁷ Saul hoiah kholong ah caeh kaminawk loa angdoet o sut, lok cungto doeh apae o ai; lok to loa a thaih o, to-e mita doeh hnuh o ai.

⁸ Saul loa angthawk tahang moa a mik to padai, to-e tita doeh hnuh thai ai. Topongah a ban ah yaeh o moa Damaskas vang thungah to akun o haih.

⁹ Ni thumto thung loa mikhnuh aiah oh moa ato nathung loa tita doeh ca ai, tui doeh nae ai.

¹⁰ Damaskas vang ah taangca longto ahmin Ananias to a oh. Anih loa hnuksakhaih to a tawnh. Ato hnuksakhaih ih thungah Angraeng mah anih khaeah, “Ananias!” tiah a kawk. Anih mah, “Hiah ka oh, Angraeng,” tiah a naa pae.

¹¹ Angraeng mah anih khaeah, “Amsak aloa ‘Lam Katoeng’ naa pae iah to caeh ah, Tarsas vang ih kami longto ahmin Saul naa pae o ih to Judas im ah pakrong ah. Anih loa kho a phoeh li moa

¹² a hnuksakhaih ih thungah kami longto ahmin Ananias naa pae o ih to akun moa mik aang let thai hanah a nuiah a ban ka koeng to a hnuk,” tiah a naa.

¹³ Ananias mah, “Angraeng, hi kami ih a kawng kami paroeai mah ang thuih o boah moa Jerusalem ah kaom nangmah ih kaminawk nuiah zit-om hmuen a sak ihnawk kawng to doeh ang thuih o.

¹⁴ Topacoengah nang ka bok kaminawk boih to naeh hanah qaihma kacoetanawk ih akaatawnhhaih hoiah Damaskas ah angzoh boah,” tiah a naa.

¹⁵ Angraeng mah anih khaeah, “Caeh ah, kawmawtiah anih loa Gentel kaminawk hoi sangpahrangnawk hoi Israel kaminawk khaeah ka hmin amthangsak han hoi kai ih toksak hanah ka qoih boah.

¹⁶ Topacoengah anih loa kai hanih pongah patanghaih pauep hanih boiboih to kaimah khaekhaeh mah kang patuek han,” tiah a naa.

¹⁷ Topongah Ananias loa a caeh moa Saul ohhaih ih im ah to akun, a nuiah ban to a koeng pae. “Kamnauk Saul, hiah kangzoh nathuemah loklam ah nang khaeah kamtueng Angraeng Jesuh angmah khaekhaeh mah kai hae ang patoeh. Na mik to aang let thai han hoi Cai Pakhra hoiah na koi hanah ni kai hae ang patoeh,” tiah a naa.

¹⁸ Vaipang ta-ah Saul ih mik loa tivai maemaeto tangaa hlip batih a krak moa kho ka aang a hnuk thai let. Angthawk moa baptisma to a hak;

¹⁹ topacoengah cak naek to a cak pacoengah loa tha a oh let. Saul loa Damaskas vang ih taangcanawk khaeah ah ani zetta thung a oh.

Damaskas Ah Tamthang Lok A Thuih

²⁰ Anih loa sinakok boih ah to a caeh phrat moa Jesuh loa Sithaw Capa ni tito a thuih pae.

²¹ Anih ih lokthuih ka thaih kaminawk boih mah dawnrai o moa, “Anih loa Jerusalem ah Jesuh ka bok kaminawk to ka hum kami na ai maw? Ato kaminawk to naeh hanah kangcaeng moa qaihma kacoetanawk khaeah caeh haih hanah hiah kangzo kami na ai maw?” tiah a thuih o.

²² To-e Saul ih tamthang lok thuih ih loa tha a oh aep aep moa Jesuh loa Messiah ni tiah a thuihhaih thai ih mah minawk ih palungthin a vawksak pongah Damaskas vang ih kaom Judah kaminawk mah pathim pae o thai ai.

²³ Ani zetpui kraa pacoengah Judah kaminawk loa angqum o cu moa Saul to hum hanah angcaeng o,

²⁴ to-e anihcae ih angcaenghaih ih to thuih pae o. Anih to hum hanah vangpui khongkha ah to qum thun a cong o.

²⁵ To-e duemto loa Saul to angmah ih ampuinawk mah a lak o, vangpui sipae tapang kam-awh to paong o moa tasabang ah tapom hoiah pakhrak o tathuk.

Jerusalem Ah Saul

²⁶ Saul loa Jerusalem ah a caeh moa hnukbangnawk to a bong hanah panki. To-e anih loa hnukbang longto ah oh toeng boah tito taang pae o ai moa a zit o lat.

²⁷ Tona-ah Barnabas to anih abom hanah angzoh moa kawkpatoehnawk khaeah to a caeh haih. Saul mah loklam ah Angraeng a hnukhaih kawng hoi Angraeng mah a thuih pae ih kawng to anihcae khaeah a thuih pae. Damaskas vang ah Saul mah Jesuh hmin hoiah misahoihhaih hoiah tamthang lok a thuih ih kawng to doeh a thuih pae bae.

²⁸ Topongah Saul loa anihcae hoiah nawnto ah oh moa Jerusalem vang bum boih ah caeh moa Angraeng hmin hoiah misahoihhaih hoiah tamthang lok to a thuih.

²⁹ Grik lok kapae Judah kaminawk hoiah doeh lok aram o moa angaek o, to-e anihcae mah hum hanah angcaeng o.

³⁰ Taangcanawk mah ato kawng to a panoek o na-ah Saul to Sisaria vang bangah a caeh o haih moa Tarsas vang ah to patoeh o.

³¹ Topacoengah loa Judea prae, Galili prae hoi Samaria prae thungih Khrihca kangkomnawk boih mah monghaih tue to a hnuk o. Angraeng to khangzahaih hoiah oh o moa Cai Pakhra abomhaih ranghoiah tha a oh o aep aep moa kami doeh a pung o tahang.

Lidda hoi Joppa Ah Piter

³² Piter loa vang kruekah a caeh moa vaito na-ah Lidda vang ih ka om Sithaw kaminawk to a tazit.

³³ Toah kami longto ahmin Ainias to angqum, anih loa amkhawn sut moa iihkroeng pongah saning tazetto thung angthawk thai ai boah.

³⁴ Piter mah anih khaeah, “Ainias, Jesuh mah ang hoihsak boah. Angthawk aloa nangmah ih hnibaih taoeng ah,” tiah a naa. Vaipang ta-ah Ainias loa angthawk roep.

³⁵ Lidda hoi Sharon ih kho kasah kaminawk boih mah a hnuk o moa Angraeng bangah angqoi o.

³⁶ Joppa vang ah nongpui longto ahmin Tabitha to oh moa anih loa taangca longto ni. (Anih ih hmin Grik lok aloa Dorkas moa thuihkoehhaih ih loa ‘tasuk’ tihaih ih ni.)

³⁷ To tue na-ah anih loa ngannat moa duek ving. A qok loa tui pahluk o moa imnui akhaan ah pasong o.

³⁸ Joppa vang loa Lidda vang hoitoah anghla parai ai moa Joppa ih taangcanawk mah Piter loa Lidda ah oh tito a thaih o na-ah kami longhnetto patoeh moa, “Karang ah amsak aloa angzo ah,” tiah lok a pat pae o.

³⁹ Topongah Piter loa amsak moa anih khaeah to a caeh. A phak na-ah imnui ah to a dawh o haih, toah anih to lumhmainawk boih mah ven o khuk, a qah o moa Dorkas mah a hingh nathuemah akong ih laihawnawk hoi laihawnuinawk boih to a patuek pae o.

⁴⁰ Piter mah kaminawk to imthung hoitoah tacawtsak boih moa khokkhu samkrawn hoiah kho a phoeh; qok bangah to anghae moa, “Tabitha, angthawk ah,” tiah a naa. A mik to padai moa Piter to a hnuk na-ah anghnut.

⁴¹ Piter mah a ban to talawk moa a pathawk tahang. Topacoengah taangcanawk hoi lumhmainawk boih to a kawk moa kahing ah anihcae khaeah a paek pae.

⁴² Hi tamthang loa Joppa vang bum boih ah amthang king moa kami paroeai mah Angraeng to a taang o.

⁴³ Piter loa Joppa vang ih moihin ka sahkung Simon khaeah to ani zetpui thung a oh.