Angtawtha 3 - Asang Khongso New Testament

Khokbai Longto A Hoihsak

¹ Nito na-ah Piter hoi Johan loa duembang khophoeh tue, nitue thumto na-ah Tempal ah a caeh hoi.

² Toah Khongkha Kahoih tiah naa pae o ih khaeah zah tangsuek nahoiah khokbai longto a oh. Tempal ah kangzo kaminawk khaeah tangka hnik thaih hanah anih to nithokkruek ato khongkha ah to angzawn o toemoe.

³ Anih mah Piter hoi Johan hnit ka kun to a hnuk na-ah hmuen maemaeto a hnik pae hoi.

⁴ Anih to hoihdak ta-ah a khet hoi het moa Piter mah, “Kai hnit hae khenah!” tiah a naa.

⁵ Topongah anih mah vawn maemaeto hak hanah oepdoenghaih hoiah anih hnit to a khet.

⁶ To-e Piter mah anih khaeah, “Tangka tita doeh ka tawn hoi ai, to-e ka tawnh ih kang paek han: Nazareth Jesuh Khrih hmin hoiah angthawk aloa taka ah, lok kang paek,” tiah a naa.

⁷ Topacoengah anih mah a bantang ban ah sinh pae moa pathawk tahang. Vaipang ta-ah a khok hoi khokpazungnawk to thaoh pae roep moa,

⁸ angphet tahang moa khok hoiah angdoet moa takat amtong. Moa anihcae hoiah Tempal ah a caeh, takat moa angphet moa Sithaw to pahlaw.

⁹ Toah kaom kaminawk mah anih to ka taka moa Sithaw ka pahlaw to a hnuk o,

¹⁰ Khongkha Kahoih ah kanghnu toemtoem moa bantadoi kami ni tito panoek o na-ah a nuiah hmuen ka pha kawng pongah to dawnrai o moa dawn anghmang o.

Tempal Thungah Piter Lokthuihhaih

¹¹ Ato kami loa Solomon Imhup tiah naa pae o ih ahmuenh ah to Piter hoi Johan hnit khaeah a zong ving pongah mipui loa dawnrai o moa anihcae khaeah to cawnh o tapai.

¹² Piter mah a hnuk na-ah anihcae khaeah, “Ka caeng ampui Israel kaminawk, tipongmaw hi kawng pongah na dawnraisak o moa kai hnit hae mik pakhrip aiah nang khet o loa? Hi kami takatsak thai ih hae kaimah hnit ih tharahhaih tiaibaloa Sithaw hma-ah hoihhaih ranghoiah maw ka om ah na dawn o?

¹³ Abraham, Isaak hoi Jakob ih Sithaw, aicae saezanawk ih Sithaw mah Sithaw raenglenhaih to a tamtoeh Jesuh khaeah a paek boah. To-e nangcae mah akaatawn kungnawk ih bang thungah na paek o boah. Pilat mah loihsak hanah lok takroek tangcae mataeng doeh nangcae mah anih to Pilat hma-ah na takhoe o.

¹⁴ Anih loa kami kacai hoi kahoih ni, to-e nangcae mah takhoe o sut moa Pilat khaeah kami ka hum to na prawt pae oah, tiah na hnik o lat.

¹⁵ Nangcae mah hinghaih lam bangah zaehoikung to na hum o, to-e Sithaw mah anih to duekhaih thung hoitoah pathawk let moa ato kawng panoekkung saksi loa aicae hae ni.

¹⁶ Ahi khokbai kami to thaohhaih ka paekkung loa angmah hmin tharahhaih iah oh. Vaihi na hnuk hoi na panoek o ih hae anih ih hmin taanghaih ranghoiah ni sak ah oh; nangcae boih mah na hnuk o king batiah Jesuh taanghaih ranghoiah ni hi kami hae a hoihsak.

¹⁷ “Topongah ka caeng ampui Israel kaminawk, nangcae hoi nangcae ih pahoikungnawk mah Jesuh nuiah sak ih hae na panoek o ai pongah ni na sak o tito ka panoek.

¹⁸ Sithaw mah zanghnii zangkhawn ah angmah ih Messiah to patanghaih khang tih tito tahmanawk boiboih mah a thuih oekcoek boah moa ato lok to vaihi hitiah acungsak tangtang.

¹⁹ Topongah dawnpakhuem o aloa Sithaw khaeah amlaem oah, totisoe nahaeloa nangcae ih zaehaih to anih mah tahmen tih.

²⁰ Totiah na sak o nahaeloa, Angraeng khae hoitoah pakhra bangah thaohhaih ih tue kahoih to na pha ueloa anih mah nangcae hanah qoih tangcae ih Messiah naa ih Jesuh to ang patoeh tih.

²¹ Sithaw mah zanghnii zangkhawn angmah ih tahma kacainawk patohhaih hoiah a thuih roeh batiah cungriboih to kangtha ah sakhaih ih tue phak airoek anih loa van ah om vop tih.

²² Kawmawtiah Mosi mah, “Nangcae ih Angraeng Sithaw mah kai hae ang patoeh batih toengah tahma longto nangcae khaeah ang patoeh tih, moa anih loa nangmahcae ih caeng kami ah om tih. Nangcae mah sak hankoi a thuih ih boiboih to na tahngai pae o han oh.

²³ Ami doeh ato tahma mah thuih ih lok tahngai ai loa Sithaw ih kami hoitoah tapraek ah om ueloa phraek ah om tih,” tiah a thuih.

²⁴ Lok taphong hanih ka tawn tahmanawk boiboih, Samuel hoi ahnuk ih kaom tahmanawk boih mah doeh, anihcae boih mah vaihang tue ih hmuen ka om hae a thuih o zawh boah.

²⁵ Sithaw mah angmah ih tahmanawk hoiah lok amaihhaih sak ih loa nangcae hanih oh moa Sithaw mah nangcae saezanawk khaeah a sak ih paipi thungah ka paa bo kami ah na oh o. Abraham khaeah, “Nang ih cadiinawk ranghoiah longnui ih kaminawk boih to tahamhoihhaih kang paek han,” tiah a naa.

²⁶ Topongah Sithaw mah ami doeh hoihhaih ai ih tuinuenh hoitoah nam laem o moa tahamhoihhaih paek hanah angmah ih Tamtoeh to a qoih moa nangcae khaeah anih to ang patoeh hmaloe,” tiah a naa.