Angtawtha 28 - Asang Khongso New Testament

Malta Tuilanglum Ah

¹ Tuicing oeng bangah kasueng ta-ah ka phak o boih na-ah ato tuilanglum loa Malta tuilanglum ni tito ka panoek o.

² To ih kaminawk loa kaicae nuiah paroeai hoih o parai. Kho angzoh moa angqai parai pongah hmai angcenh pae o moa angkhet angzawn o.

³ Paul loa thing kangqo to cong moa hmai ah to a tik. Hmai a bet pongah thing thung hoitoah paqui maeto tacawt moa Paul ih ban pongah angkhet moa angbangh pae lawngkawng.

⁴ To ih prae kaminawk mah Paul ban pongih paqui kangbang lawngkawng to a hnuk o na-ah longto hoi longto to, “Hi kami loa kami a hum kalang mue, tuiculi thung hoitoah a loih langla cadoehsoe nii sithaw mah hinghsak han koeh ai kalang mue hae!” tiah a thuih o.

⁵ To-e Paul loa paqui to hmai thungah thuek zawh moa angmah to ahma tidoeh om ai.

⁶ Anihcae mah loa takbum boih to bawk pae tih, tiaibaloa akraa aiah amtim kawng ueloa dueh tih, tiah a dawn o moa a zing o. To-e atue kakra parai thung a zing o pacoengah kawbangah doeh om pae ai to a hnuk o na-ah dawnhaih ih to amkhraih o let moa, “Hi kami hae sithaw kalang mue!” tiah a thuih o.

⁷ Ato hmuenh hoiah kahla parai aiah ato tuilanglum ukkung angraeng Publias ih lawknawk to a oh. Anih mah kaicae to hoihdak ta-ah ang khetzawn moa ni thumto thung anih ih angvin ah ka oh o.

⁸ Publias ampa loa tazet hoi zokcik hoiah a nat moa iihkroeng pongah angsong sut; Paul loa anih ih imlaek thungah caeh moa khophoeh, anih nuiah a ban to koeng moa ngan a tuisak.

⁹ Totiah hmuen ka om to a thaih o na-ah ato tuilanglum ih ka om ngan ka tui ai kaminawk boiboih loa Paul khaeah angzoh o cu moa ngantuihaih to a hnuk o.

¹⁰ Tamqum zetpui ang paek o moa ka caeh o han na-ah loklam ah kangtoeng o hankoi hmuennawk to doeh tuisamphaw nuiah ang suek pae o.

Malta Hoitoah Rom Ah

¹¹ Khra thumto pacoengah Alekzandria vang hoitoah kangzo tuisamphaw ahmin “Sithaw Caphae” naa pae ih pongah kang thueng o. To tuisamphaw loa sik angqai thung ato tuilanglum ah ka om ni.

¹² Sirakus vangpui to ka phak o moa ato vang ah ni thumto kamdam o.

¹³ To vang hoitoah ka caeh o let moa Rezium vangpui to ka phak o. Akhawnbang ah aloihbang hoitoah takhi a songh moa ni hnetto pacoengah Puteoli vang to ka phak o.

¹⁴ Toah to taangca thoemtonawk a oh o moa anihcae khaeah tabaih maeto thung oh hanah ang pacae o. To hmuenh hoitoah Rom vang to ka phak o.

¹⁵ Rom vang ih kaom taangcanawk mah kaicae ih tamthang to a thaih o moa vawnsai zawhhaih Appius naa pae ih vang hoi toemhhaih Im Thumto naa pae ih vang karoekto ang dawt o. Paul mah anihcae to a hnuk na-ah Sithaw khaeah kawn lok a thuih moa thahmaehaih ih to paroeai a tawnh.

Rom Vang Ah

¹⁶ Rom vang ah ka phak o na-ah Paul loa angmah hmawk ah a ohsak o moa risa longto mah a toep.

¹⁷ Ni thumto pacoengah Paul mah a vangthung ih Judah pahoikungnawk to angqum cu hanah pacae. Acu o na-ah Paul mah anihcae khaeah, “Ka caeng ampui Israel kaminawk, kai loa aimahcae ih kaminawk nuiah doehsoe, aicae saezanawk khae hoitoah hnuk o ih tawkcahnawk nuiah doehsoe hoihhaih ai ih tidoeh ka sah ai eloa Jerusalem ah thongim ah ang pakhrak o moa Rom kaminawk ih ban thungah ang paek o.

¹⁸ Lok ang duengh o na-ah duekhaih han khoekto sakzaehaih tidoeh om ai tito a hnuk o pongah Rom kaminawk mah kai hae prawt han a koeh o.

¹⁹ To-e ato to Judah kaminawk mah aek o na-ah kaimah ih kaminawk nuiah zaenethaih ih tidoeh ka tawn ai eloa Rom Sangpahrang khaeah azukhan ai loa angcoeng thaih ai.

²⁰ Topongah nangcae hoiah angqum moa lok apaeh hanah ka koehhaih ih to a oh. Thuih tangtang nahaeloa hitiah sumqui hoiah pahlet ah ka ohhaih ih loa Israel kaminawk mah oepdoeng o ih kami kawng pongtoah ni,” tiah a naa pae.

²¹ Anihcae mah, “Nang ih kawng to Judea prae hoitoah ca tidoeh ka hnuh o ai; ato hmuenh hoitoah tamthang ka sin kaicae kami ami doeh om ai; nang ih kawng to kasae ah ka thui mi doeh om ai.

²² To-e nang ih poekdawnhaih to thaih hanah ka koeh o, kawmawtiah nang ih bu kawng hae ahmuenh kruekah kaminawk mah a thuihsae o,” tiah a naa o.

²³ Topongah Paul hoiah angqum hanih ani to adok o moa ato ni ah to Paul toemhhaih ih khaeah kami paroeai angzoh o. Akhawnbang hoikamtong aduembang khoekto Sithaw Poenghaih kawng tamthang to kacai ah a thuih pae, Mosi ih Tawklok hoi tahmanawk mah tarik ih thung hoitoah a lak moa Jesuh kawng to thaihkopsak hanah a zom moa a thuih pae.

²⁴ Thoemto loa a thuih ih lok to thaihkop o e thoemto loa taang han koeh o ai.

²⁵ Topongah angmahcae salak thungah palungdue ai hoiah amlaem o. Paul mah, “Tahma Isaiah patohhaih hoiah Cai Pakhra mah nangcae saezanawk khaeah a thuih ih to ahmaan parai.

²⁶ A thuih ih loa: ‘Caeh aloa hi kaminawk khaeah thui pae ah, Tahngaih loa na tahngai o tih, to-e na thaih o kop mak ai; Khet loa na khen o tih, to-e na hnuh o mak ai;

²⁷ Kawmawtiah hi kaminawk ih palungthin to a maengh o moa naa to a tamuep o moa mik to pasim o khoep. totiah om ai nahaeloa anihcae ih mik mah hnuh o ueloa naa mah thaih o tih, palungthin mah thaihkop o ueloa kai khaeah amlaem o moeng ueloa kaimah ka hoihsak moeng tih,’ tiah Sithaw mah a thuih, tihae ni,” tiah a naa.

²⁸ Topacoengah Paul mah aboenghaih koek ah, “Topongah Sithaw ih pahlonghaih tamthang lok loa Gentel kaminawk khaeah patoeh ah oh boah. Anihcae mah tahngai o tih,” tiah a naa.

²⁹ (Paul mah hi lok hae a thuih boih pacoengah Judah kaminawk loa angmahcae hoi angmahcae to katingai angaek o moa amlaem o ving.)

³⁰ Saning hnetto thung Paul loa toah to im a hlai moa a oh, angmah to hnuk han ka koeh moa kangzo kaminawk boiboih to hoihdak ta-ah loklang apaeh haih.

³¹ Sithaw Poenghaih kawng to taphong moa misahoihhaih hoi pakakung hoiah om aiah thuih moa Angraeng Jesuh Khrih kawng to a patuk.