Angtawtha 27 - Asang Khongso New Testament

Rom Ah Paul A Caeh

¹ Itali prae ah palong hoiah caeh hanah lok takroek pacoengah Paul hoi thongkrah kalah thoemtonawk to “Sangpahrang sangkoek ih Risabu” tiah naa pae ih Rom risabu thungih risa angraeng Julias ih ban thungah a paek o.

² Asia prae ih tuisamphaw anghakhaih hmuenh bangah caeh hanah ka om coek Adramitium vang hoitoah kangzo palong to kang thueng moa ka caeh o. Masidonia prae Thesalonika vang ih Aristarkas doeh kaicae khaeah angzoh toeng.

³ Akhawnbang aloa Sidon vang to ka phak o. Julias loa Paul nuiah tahmenhaih palungthin to a tawnh moa angtoeng ihnawk to hak thai hanih ah angmah ih ampuinawk khaeah paqaih moa angqum thai hanah atue paongh pae.

⁴ To hmuenh hoitoah ka caeh o poe moa takhi to kaicae bangah ngai angsongh pongah takhi anguphaih Saiparas tuilanglum bang hoitoah ka caeh o.

⁵ Silisia prae hoi Pamfilia prae kadok ah tuiculi to caeh o pat moa Lisia prae Mira vang to ka phak o.

⁶ Toah to risa angraeng mah Alekzandar vang hoitoah Itali prae ah ka caeh han palong maeto to a hnuk moa ato palong pongah to angthuengsak.

⁷ Amzaita hoiah ni paroeai ka caeh o moa hnukkhuem aloa karai parai hoiah Snidas vang taengah to ka phak o. Ato lam bangah caeh poe hanah takhi mah pakaa ving boah pongah Krete tuilanglum takhi anguphaih bang hoitoah ka caeh o moa Salmon prae tahmawh congngawk taeng hoitoah ka caeh o pat.

⁸ Tuiculi tuitaeng ka hnai ah ka caeh o poe moa raihaih katingai hoiah ‘Palong Anghakhaih Suenghaih Hmuenh’ naa pae o ih to ka phak o, ato hmuenh loa Lasia vang hoitoah anghla parai ai boah.

⁹ Toah to ani kakra paraiah kamdam o, Akranghaih Ni to doeh aboeng ving boah pongah hmabang ah kholong caeh han hae zit oh parai boah. Topongah Paul mah anihcae khaeah poekhaih to hitiah a paek:

¹⁰ “Naukamzanawk, hi hoitoah aicae mah caeh hanih loklam loa zitthoh han oh parai tiah ka hnuk; na phawh o ih vawnsainawk hoi tuisamphaw amrohaih katingai om ueloa aicae hinghaih ih doeh anghma angtaa tih,” tiah a thuih pae.

¹¹ To-e risa angraeng loa Paul mah thuih ih lok pongdoeh tuisamphaw ka congkung angraeng hoi ka tawnkung hnit ih lok to palung thungah akun pae lat.

¹² Ato tuisamphaw anghakhaih hmuenh ah sik tue nathung loa oh hanah hoih ai pongah kami kanoi mah loa angcoeng thaih nahaeloa Finik karoekto phak moa toah sik tue thung loa oh han a koeh o. Finik loa Krete tuilanglum thungih tuisamphaw anghakhaih hmuenh maeto ah oh moa niduem aloihbang hoi niduem aluekbang ah to kanghae ah ka om ni.

Takhipui A Songh

¹³ Aloihbang hoitoah takhi amzai ta-ah songh amtong moa poekhaih ih batiah caeh thai tih tiah a dawn o, topongah tuisamphaw paehhaih ih sum kawnvawn to aphongh o moa Krit tuilanglum tuitaeng kamzui kahnai ah to ka caeh o poe.

¹⁴ To-e akraa aiah “Niangzae aluekbang Takhi” kaham parai to tuilanglum bang hoitoah angsongh tathuk.

¹⁵ Ato takhi mah tuisamphaw to a daengh, tuisamphaw to takhi bangah paqoi hanah angcoeng thai ai pongah ka zom o haih ih hae ka toengh o sut boah moa takhi mah koehkoeh na-ah a caeh haih romram boah.

¹⁶ Kauda tuilanglum ta aloihbang ah ka phak o na-ah a buephaih ih ka hnuk o kue. Toah to tuisamphaw mah aken ih okduk palong to amro ving han aiah karai parai hoiah hoihdak ta-ah ka suek o.

¹⁷ Okduk palong to loa yaeh o moa tuisamphaw nuiah to a thuengh o pacoengah tuisamphaw pongah to khawkqui hoiah kacak ah a komh o rat. Libia prae tuilitaeng bang tui thungih savuet sa-ih kangpop to suh moeng hanah a zit o pongah kahnizang ih to pakhrawt o ving moa tuisamphaw loa takhi mah caeh haih nabangah amzawksak o.

¹⁸ Takhi loa kaham paraiah a songh toengtoeng, topongah akhawnbang aloa tuisamphaw mah phawh ih hmuenmae thoemto loa tui thungah a vah o.

¹⁹ Omvaih aloa tuisamphaw hmuenmae thoemto loa a vah o.

²⁰ Ani paroeai thung ni hoi sakaenawk to ka hnuh o thaih ai, takhi loa kana paraiah a songh toemoe. Hnukhuem aloa ka loih o vop tih tiah oephaih ih tetta doeh ka tawn o ai boah.

²¹ Kaminawk loa buh hoiaiah ka sawk paraiah oh pacoengah Paul loa anihcae hma-ah angdoet moa, “Naukamzanawk, ka lok hae na tahngaih o moa Krete tuilanglum bang hoitoah caeh aiah oh o nahaeloa hitih khoekto amrohaih om mak ai ueloa sunghaih doeh om mak ai han to.

²² To-e vaihi palungmawn o hmah, tiah kang pacae o. Kami longto doeh dueh mak ai; tuisamphaw khueh ni amro tih.

²³ Kawmawtiah zangduem qum ah kai ka tawnkung hoi ka bok ih Sithaw ih vanmi longto kai khaeah angzoh moa,

²⁴ ‘Paul, zi hmah baa! Rom Sangpahrang hma-ah nangdoet han angtoeng. Sithaw loa angmah ih hoihhaih ranghoiah nangmah hoiah nawnto ka caeh kaminawk hae longto boe doeh dueh aiah hinghaih to pahlung boih tih,’ tiah ang naa.

²⁵ Topongah naukamzanawk, palungboeng o hmah. Kawmawtiah ka thuih batih toengah om tih tiah Sithaw to ka taang.

²⁶ To-e tuilanglum maemaeto ih tuitaeng ah takhi mah na takhoe zawzaw tih,” tiah a naa.

²⁷ Duem hlaipalito a phak boah, Mediterranian tuiculi ah to takhipui mah hmuh nabangah kamzawk o taitu boah. Qumning thuemtham aloa tuisamphaw thungih toksahkungnawk loa oeng bangto a hnaih hruet hruet kalang boah mue tiah a dawn o.

²⁸ Topongah khawkqui hoiah hlung pahlet o moa pakhrak o tathuk na-ah tui loa pe cumvaito pacoeng pumto a thuk tito panoek o; nawnetta oh pacoengah a nawt o let bae moa pae quitakawtto oh tito panoek o.

²⁹ Tuisamphaw mah hlung to daeng moeng tih tito a mawnh o, topongah tuisamphaw ih ahnuk bang hoitoah sum kawnvawn palito to tui thungah pakhrak o tathuk moa khophoeh lamhoiah khodai a zing o.

³⁰ Topacoengah tuisamphaw thungih toksahkungnawk loa cawnh ving hanah angcaeng o, okdukpalong to tui pongah pakhrak o tathuk moa tuisamphaw hmabang hoitoah sum kawnvawn to ka pakhrah tathuk han batiah to a oh o.

³¹ To-e Paul mah risa angraeng hoi risanawk khaeah, “toksahkungnawk hae tuisamphaw nuiah om o ai nahaeloa nangcae hingh hanah oepdoenghaih ih tidoeh om ai,” tiah a na.

³² Topongah risanawk mah okdukpalong paehhaih ih aqui to takroek o patpat moa tui thungah pakhrak o.

³³ Khodai ai ta na-ah Paul loa anihcae to caknaek cak o hanah a thuih pae. “Nangcae mah mawnhhaih hoiah na oh o ih hae vaihi ni hlaipalito phak boah, ato nathung boiboih ah tita doeh na caa o ai.

³⁴ Topongah na hingh o haih hanah nangtoeng o ih caknaek to caa oah. Nangcae lu nui-ih sammaeh maeto mataeng doeh anghma mak ai,” tiah a naa.

³⁵ Hi lok hae a thuih pacoengah Paul loa takaw thoemto to a lak moa anihcae boih hma-ah Sithaw khaeah kawn lok to a thuih pacoengah a aeh moa a cak.

³⁶ Anihcae loa palungthin to mongsak o moa zetzet ta-ah a cak o rip.

³⁷ Tuisamphaw nuiah kaom kami loa sungqum boih ah cumvaihnet quisarih tarukto ka oh o.

³⁸ Mi boih mah ka boep ah cak o pacoengah tuisamphaw to tahoepsak kue hanah tun cang boiboih to tuiculi thungah a vah o.

Tuisamphaw Amro

³⁹ Khodai na-ah tuisamphaw thungih toksahkungnawk loa tuicing oeng to mat o ai, to-e tuiculi kingkunh bangah oeng maeto to a hnuk o moa angcoeng thaih nahaeloa toah tui padae nabangah tuisamphaw to anghaksak hanah angcaeng o.

⁴⁰ Topongah tuisamphaw paehhaih ih aqui to takroek o pat moa sum kawnvawn to loa tuiculi thungah a tupsak o; topacoengah tuisamphaw taqoi talaehaih ih tampai komhhaih qui to doeh a khramh o. Topacoengah tuisamphaw to takhi tha mah a caeh haih thai hanah ahmabang ah kahnizaang ih to padoet o moa tuicing oeng bangah to a caeh o.

⁴¹ To-e tuisamphaw loa tuicing oeng savuet sa-ih kacong to a suh khung moa angtang sut. Tuisamphaw tahmawh bang to savuet thungah angtang caengh moa angtawt thai aiah oh nathuemah ahnukbang to tuiphu kangthawk mah a daengh moa a koih king.

⁴² Risanawk loa thongkrahnawk to tui alaek o ueloa tuicing bangah angkhoe o na-ah cawn o king tih tito a mawnh o pongah hum king hanah angcaeng o.

⁴³ To-e risa angraeng mah Paul to pahlong hanah koeh pongah totiah sak han aiah pakaa pae ving. Anih mah tui ka laek thai kaminawk to palong nui hoitoah longpung o hmaloe moa tuicing bangah alaek hanah lok a paek;

⁴⁴ kanghmat kami thoemtonawk mah thingphaek, tiaibaloa tuisamphaw kamro ih thingphaek a boengh a tumhnawk to amkhoeh o moa anihcae hnukah alaek o toeng. Totitoah kasueng ta-ah tuicing bangah ka phak o king.