Angtawtha 26 - Asang Khongso New Testament

Agrippa Hma-ah Paul Angtanghhaih

¹ Agrippa mah Paul khaeah, “Nangmah kawng to nangmah na thui ah,” tiah a naa. Paul mah a ban to pazang moa angmah angtanghhaih ih lok to hitiah a thuih:

² “Sangpahrang Agrippa! Vaihni ah na hma-ah Judah kaminawk mah zae ang net o haih ihnawk hae angtanghhaih lok ka thuih thai ih tue ka hnuk pongah taham kahoih phi ah ka dawn.

³ Totiah ka dawnhaih ih loa nang loa Judah tawkcahnawk hoi lokpunghaih ihnawk boih to na panoek king pongah ni. Topongah palungsawkhaih hoiah na tahngaih pae hanah kang pacae.

⁴ “Nauktak ta nahoiah kawbangmaw kho ka sak tihae Judah kaminawk boih mah panoek o king. Ka hinghaih bum boih hae hmaloe koek ah kaimah ih ka prae thung hoi Jerusalem thungah kawbangmaw ka patoh tihae ang panoek o king.

⁵ Anihcae mah thuih han koeh o nahaeloa a panoek o toemoe ih boah ni, atangsuek nahoiah bokhaih bangah loa kangcak koek Farasi kaminawk thungih kami longto ah ka oh toeng.

⁶ Vaihi hiah lokcaek hanah kangdoethaih ih loa kaicae saezanawk khaeah Sithaw mah lok amaihhaih a suek ih to oepdoenghaih ka tawnh pongah ni.

⁷ Ato lok amaihhaih ih loa kaicae caeng hahlai hnettonawk mah Sithaw to qum thun ah ka bok o na-ah hak o thai tih tiah oepdoeng o haih ih to ni. Totiah ka oepdoeng pongah, Sangpahrang Angraeng, Judah kaminawk mah kai hae zae ang net o haih ih ni.

⁸ Hiah kaom nangcae Judah kaminawk mah tipongah maw Sithaw mah kadueh kaminawk to angthawksak let tihae kangcoeng thai ai hmuen ah na dawn o?

⁹ “Nazareth vang ih Jesuh kawng hae ka aek hanah ka sak thaih thung cungriboih hae ka sak han tiah kaimah roeroe mah ka dawn.

¹⁰ Toto ni Jerusalem ah to ka sak. Qaihma kacoetanawk khae hoi-ih akaatawnhhaih to ka hak moa Sithaw kami paroeai to thongim thungah ka pakhrak; anihcae to hum hanah lok takroek na-ah kaimah doeh naakrak pae haih toeng.

¹¹ Sinakok ah anihcae to avaih paroeai ka raek moa anihcae taanghaih ih to toenghsak hanah ka panki. Anihcae nuiah katingai palung ka phui moa pacaekhlaek hanah prae kalah vangpuinawk khoekto doeh ka caeh.

Paul Palung Anglaihhaih Kawng A Thuih

¹² “Totiah anihcae to raekrai hanah kangcaeng pongah qaihma kacoetanawk khae hoi-ih akaatawnhhaih ca to a ka lak moa Damaskas vang ah to ka caeh.

¹³ Sangpahrang Angraeng, lam ah ka caeh na-ah, a thunling ah, aw Angraeng, ni pongdoeh ka aang aep aanghaih to van bang hoitoah kangzo moa kai hoi kaimah hoiah nawnto ka caehnawk ih taenghaek ah ka toeh phung to ka hnuk.

¹⁴ Tona-ah long ah kamtim o king, topacoengah Hebru lok hoiah kai khaeah, ‘Saul! Saul! Tipongmaw kai hae nang pacaekhlaek? Maitaw tae mah angmah ka tawnkung ih cungpraek to taphet na-ah angmah to a nat lat batiah nangmah to na lat tih,’ tiah a thuih ih lok to ka thaih.

¹⁵ Kaimah, ‘Ami nang maw, Angraeng?’ tiah ka naa. Tona-ah Angraeng mah, ‘Nangmah na pacaekhlaek ih Jesuh ni.

¹⁶ To-e angthawk aloa na khok hoiah angdoe ah. Kai ih tamtoeh ah oh hanah ka koeh pongah nang khaeah kamtueng thuih boah. Vaihni ah kai nang hnuk ih kawng hoi hmalam ih kang patuek hankoi kawngnawk hae mi kalahnawk khaeah na thuih han.

¹⁷ Nang loa kang patoeh hanih Israel kaminawk hoi Gentel kaminawk khae hoitoah kang pahlong han.

¹⁸ Nangmah anihcae ih mik to na padaisak ueloa vinghaih thung hoitoah aanghaih thungah, Setan ih tharahhaih thung hoitoah Sithaw ih tharahhaih thungah nam laemsak tih, kai to taanghaih ranghoiah anihcae zaehaih ih to tahmen ah om ueloa Sithaw mah qoih ih kaminawk salak thungah ahmuenh to hak o toengh tih,’ tiah ang naa.

Paul A Toksakhaih Kawng A Thuih

¹⁹ “Topongah Sangpahrang Agrippa, van hoi-ih ka hnuk ih hnuksakhaih ih hae ka aek thai ai.

²⁰ Hmaloe koek ah Damaskas vang hoi Jerusalem vang ah, topacoengah Judea prae boih hoi Gentel kaminawk boih khaeah anihcae zaehaih ih to dawnpakhuem o moa Sithaw khaeah amlaem han hoi a anihcae mah dawnpakhuem o haih ih kamtueng sakkung hmuen to sak hanah ka thuih pae.

²¹ Ahi kawng pongah ni Judah kaminawk mah Tempal thungah ka oh nathuemah ang naeh o.

²² To-e vaihni ni karoekto Sithaw mah ang bomh, topongah hiah kangdoet moa nangcae boih, kathoeng kalen hma-ah ka panoek ih hae ka thuih o. Ka thuih ih loa tahmanawk hoi Mosi mah kangzo hankoi a thuih o sut ih hmuen to ni ka thuih toeng:

²³ Toto loa Messiah loa, aanghaih ih pahlonghaih loa Judah kaminawk ho Gentel kaminawk khaeah taphong hanah Messiah mah patang khanghaih to pauep ueloa duekhaih thung hoitoah kangthawk hmaloe koek ah om tih, tihae ni,” tiah a naa.

²⁴ Hitih haeah Paul loa angmah to angtangh na-ah Festas mah, “Paul! Nang loa namthu boah, Namtukhaih kasang mah nang to amthusak boah,” tiah a hangh thuih.

²⁵ Paul mah, “Kamthu ai, Sangpahrang Kahoih Koek! Palung kacai soek hoiah ni loktang ka thuih.

²⁶ Sangpahrang Agrippa! Nang khaeah misahoihhaih parai hoiah ka thuih thaih, kawmawtiah nang loa hi kawngnawk boih hae ka panoek king kami ah na oh pongah ni. Hi hmuennawk boih hae kanghmat aiah na panoek king tih tiah ka taang, kawmawtiah hi hmuen hae panoek boih ih ni, takiket ah hawk hmoek ih na ai ni.

²⁷ Sangpahrang Agrippa, tahmanawk na taang maw? Na taang tiah kang panoek!” tiah a naa.

²⁸ Agrippa mah Paul khaeah, “Hi tue setta thungah kai hae Khrihca ah na coenghsak thai tih tiah na dawn maw?” tiah a naa.

²⁹ Paul mah, “Atue setta ah doehsoe, atue ka sawk ah doehsoe, Sithaw khaeah khophoehhaih ih loa nang hoi vaihni ah kai ih lok tahngai kaminawk boih, ka ban pongih sumqui tiaialoa, kai batiah na oh o king thaih hanah ni,” tiah pathim pae.

³⁰ Topacoengah sangpahrang doeh, prae ukkung angraeng doeh, Bernis hoi kalahnawk boih to doeh angthawk o moa,

³¹ tacawt o pacoengah loa anihcae mah longto hoi longto, “Hi kami hae paduek han khoekto tiaibaloa thongim pakhrak han khoekto hmuen sak ih tidoeh om ai,” tiah a thuih o.

³² Agrippa mah Festas khaeah, “Rom Sangpahrang kalen koek khaeah hi kami hae azukhan ai nahaeloa prawt thai han eah mah,” tiah a naa.