Angtawtha 25 - Asang Khongso New Testament

Rom Sangpahrang Khaeah

¹ Festas loa to prae thungah a phak pacoeng ni thumto na-ah Sisaria vang hoitoah Jerusalem vang ah to a caeh.

² Toah to qaihma kacoetanawk hoi Judah kami pahoikungnawk mah Paul to zaenethaih ih a thuih pae o.

³ Anihcae mah Paul to Jerusalem vang ah caeh haih hanah Festas khaeah tahmenhaih a hnik o, kawmawtiah loklam ah hum hanah tamqu lamah angcaeng o pongah ni.

⁴ Festas mah, “Paul loa Sisaria vang ah thongim thungah suek ah oh moa kai hae toah to kamlaem let palang han.

⁵ Nangcae ih pahoikungnawk to Sisaria ah kai hoiah nawnto angzo o na soeloa sakzaehaih ih maemaeto om nahaeloa zaenethaih ihnawk to thui o na soe,” tiah a naa.

⁶ Festas loa anihcae khaeah ni hato roekrak a oh moa topacoengah Sisaria vang ah to a caeh. Akhawnbang ah lokcaekhaih zung ah to anghnut moa Paul to angzoh o haih hanah lok a paek.

⁷ Paul to ang phak na-ah Jerusalem vang hoitoah kangzo Judah kaminawk loa anih to ven o takuilut moa zaenethaih katingai zetpui to thuih amtong o, to-e zae a net o haih ih to ahmaan tangtang tiah amtuengsak o thaih ai.

⁸ To-e Paul loa angmah hoi angmah to angtangh: “Judah kaminawk ih Tawklok kawngah doehsoe, Tempal kawngah doehsoe, Rom Sangpahrang kawngah nuiah doehsoe sakzaehaih tidoeh ka sah ai,” tiah a naa.

⁹ To-e Festas loa Judah kaminawk ih mikhmai kahoih to hnuk han koeh pongah Paul khaeah, “Hi zaenethaih ihnawk hae Jerusalem ah caeh moa kai hma-ah lokcaek han na koeh maw?” tiah a duengh.

¹⁰ Paul mah, “Sangpahrang kalen koek ih lokcaekhaih zung ah vaihi kangdoet, hiah hae lok na caek o na soe. Nangmah hoihdak ta-ah na panoek batih toengah Judah kaminawk nuiah hmuen sakpazaehaih tidoeh ka sah ai.

¹¹ Tawklok to ka aek moa duek haih han kating ah ka sak ih maemaeto om nahaeloa ato to loih hanah kang hnih ai. To-e kai zaenet o haih ih hae loktang to om ai mak nahaeloa amita mah doeh anihcae ih ban thungah paek thai mak ai. Sangpahrang kalen koek hma-ah kangdoet,” tiah a naa.

¹² Topacoengah Festas mah angmah ih poekhaih kahoih ka paekkungnawk hoiah aram o pacoengah, “Sangpahrang khaeah na hnik pongah Sangpahrang khaeah na caeh han,” tiah a naa.

Agrippa hoi Bernis Hma-ah Lokthuihhaih

¹³ Atue kra pacoeng kue na-ah Sangpahrang Agrippa hoi Bernis loa sangpahrang Festas khaeah paqai hoi moa bansinh hanah Sisaria vang ah to a caeh hoi.

¹⁴ Toah to ni paroeai a oh hoi pacoengah Festas mah Paul ih kawng to sangpahrang khaeah a thuih pae: Felik mah thongim ah paung ih kami longto hiah a oh;

¹⁵ Jerusalem ah ka caeh na-ah Judah kami qaihma kacoetanawk hoi kacoeta kalahnawk mah anih to zae a net o moa lokcaek hanah kai to ang hnik o.

¹⁶ To-e Rom kaminawk loa ami doehsoe zaenet ah kaom kami hae zae ka netkungnawk hoiah mikhmai sungqum ah angqum moa zaenethaih ih to angmah khaekhaeh mah angtanghhaih ih thuih thaih toeng hanah atue pa-awh pae ai nahlanah loa anihcae ih ban thungah paek thaih ih tawk om ai, tiah ka naa pae.

¹⁷ Topacoengah hiah angzoh o na-ah atue ka krasak ai, akhawnbang ah lokcaekhaih zung ah kanghnut roep moa to kami to tacawt o haih hanah lok ka paek.

¹⁸ Zae ka netkungnawk to angdoet o moa a thuih o, to-e ka dawnhaih ih batiah zae a net o haih ih tangtang to thui o thai ai.

¹⁹ Anihcae mah zaenet o haih ih loa angmahcae bokhaih ih kawng angaekhaih ih hoi kami longto ka dueh tangcae ahmin Jesuh naa pae ih to, Paul mah ‘angthawklet boah’ tiah a naa pae ih kawng to ni.

²⁰ Hi kawng pongah kawbangmaw kamnoek aep ah ka panoek thaih han tihae dawn kanghmang sut; topongah Paul hae Jerusalem ah caeh soeloa zae a net o haih ih hae toah to lokcaek hanah na koeh maw, tiah ka duengh.

²¹ To-e Paul mah azukhan; thongim thungah hoihdak ta-ah cong rae han hoi Sangpahrang mah lok takroek let hanah a hnik. Topongah Sangpahrang khaeah ka pat thai airoekto anih to thongim thungah hoihdak ta-ah toep hanah lok ka paek.

²² Agrippa mah Festas khaeah, “Hi kami mah lokthuih ih hae kaimah khaekhaeh mah thaih han ka koeh,” tiah a naa. Festas mah, “Khawnbang ah na thaih tih hmang,” tiah pathim pae.

²³ Akhawnbang ah Agrippa hoi Bernis loa khukbuenh tarunu ah amthoep hoi arim kaom khungah risa angraeng kacoetanawk hoi vangthung ih kacoetanawk hoiah nawnto ah mipui acuhaih impui thungah akun o. Festas mah Paul to angzoh haih hanah lok a paek.

²⁴ Festas mah, “Sangpahrang Agrippa hoi hiah kaom kaminawk boih: Hi kami hae na hnuk o boah, hiah kaom Judah kaminawk hoi Jerusalem vang ih kaom Judah kami kathoeng kalen kaminawk boiboih mah kai khaeah zaenethaih ih to ang thuih o. Anihcae mah hi kami loa hing han akrah ai boah, tiah a hangh o.

²⁵ To-e duek haih han khoekto zaehaih a sak ih tita doeh ka hnuh thai ai. Angmah to Sangpahrang khaeah azukhan pongah anih to pat hanah lok ka takroek boah.

²⁶ To-e anih kawng hae Sangpahrang khaeah kamnoek ta-ah tarik hanah tidoeh ka tawn ai. Topongah anih hae nangcae hma-ah hiah kangzoh haih moa Sangpahrang Agrippa nangmah hma-ah roeroe hae kangzoh haih. Topongah anih zaenet o haih ih to lokcaek pacoengah tarik hanah ka tawn tih, tiah ka dawn.

²⁷ Kawmawtiah kaimah hanah doeh thongkrah longto ih zaenethaih kawng to hoihdak ah kamnoek ta-ah tarik aiah pat hae hoih ai tiah ka dawn,” tiah a naa.