Angtawtha 22 - Asang Khongso New Testament

¹ Paul mah, “Ka caeng ampui Judah kami naukamzanawk, nangcae hma-ah kangtanghhaih lok ka thuih han hae na tahngai pae oah,” tiah a naa.

² Hebru lok hoiah ka thui to a thaih o na-ah tuengtaek aiah angam o duem moa Paul loa a thuih poe:

³ “Kai loa Judah kami ni, Silisia prae Tarsas vang ah ka zah, Jerusalem ah ka qoengh tahang moa Gamaliel mah patuk ih kami ah ka oh. Aicae saezanawk ih Tawklok to hoihdak ta-ah kamtuk moa vaihni hiah kaom nangcae boih batiah Sithaw khaeah kangpaek kami ah ka oh.

⁴ Hi Loklam ka pazui kaminawk to duek khoekto ka pacaek ka pahlaek. Nongpuinawk hoi nongpanawk to ka naeh moa thongim thungah ka pakhrak.

⁵ Qaihma Kalen hoi lokcaekhaih Kawngsi kacoetanawk boih mah ka thuih ih hae loktang ni tito saksi ah angdoet o haih thai. Anihcae khaeah Damaskas ih kaom Judah naukamzanawk hanah tarik pae ih canawk to ka lak. Topongah hi kaminawk hae naeh hanah toah to ka caeh, sumqui hoiah pahlet moa raek hanah Jerusalem ah ka caeh haih.

Paul Angthahaih

⁶ “Kholong ka caeh moa Damaskas ka phak tom na-ah athun thuemtham ah van bang hoi-ih ka aang parai aanghaih maeto mah poek ai puiah ang toeh moa ka taenghaek to aang phung.

⁷ Long ah kamtim moa lok maeto mah kai khaeah, ‘Saul, Saul! Tipongmaw kai hae nang pacaekhlaek?’ tiah a thuih ih lok to ka thaih.

⁸ Kaimah, ‘Nang loa mi maw, Angraeng?’ tiah ka naa. Anih mah, ‘Kai loa nangmah nang pacaekhlaek ih Nazareth Jesuh ni,’ tiah ang naa.

⁹ Kai hoiah nawnto kangzo kaminawk mah aanghaih ih to a hnuk o, to-e kai khaeah lok ka thuikung ih lok to loa thaih o ai.

¹⁰ Kaimah, ‘Timaw ka sak han, Angraeng? tiah ka duengh moa Angraeng mah, ‘Angthawk aloa Damaskas vangthung ah caeh ah, toah to na sak hankoi Sithaw mah a suek ih cungriboih to na thui tih,’ tiah ang naa.

¹¹ Aanghaih to a aang lawnlai pongah ka mik a maengh, topongah ampuinawk mah ban hoiah ang yaeh o moa Damaskas vangthung ah to ang caeh o haih.

¹² “Ato vangpui ah kami longto ahmin Ananias naa pae ih to a oh, anih loa aicae ih Tawklok ka pazui moa bokhaih bangah panki kami ah oh, toah kaom Judah kaminawk boih mah paroeai khangza o ih kami ni.

¹³ Anih loa kai khaeah angzoh, ka taengah angdoet moa, ‘Kamnauk Saul, mik aang let ah!’ tiah ang naa. Vaipang ta-ah ka mik aang let moa anih to ka khet.

¹⁴ Anih mah, ‘Aicae saezanawk ih Sithaw mah angmah ih koehhaih to panoeksak hanah doehsoe, angmah ih Tamtoeh katoeng to hnuksak hanah doehsoe, angmah lokkaa khaeh hoiah a lokthuih ih to tahngaih hanah doehsoe nangcae to ang qoih o boah.

¹⁵ Kawmawtiah na hnuk hoi na thaih ih to mi boih khaeah thuih hanah angmah ih saksi ah na om tih.

¹⁶ Topongah vaihi tipongmaw na zing khing loa? Angthawk aloa baptisma to la aloa na zaehaih ihnawk boih to khophoehhaih hoiah thoengcaisak ah.

Gentel Kaminawk Khaeah Lokthuih Han

¹⁷ “Jerusalem ah kamlaem let moa Tempal thungah khophoeh nathuemah hnuksakhaih ih to ka hnuk.

¹⁸ Ato hnuksakhaih ih thungah Angraeng to ka hnuk, anih mah kai khaeah, ‘Amsak mue mue aloa karang ah Jerusalem to tacawt tak lai ah, kawmawtiah hi ih kaminawk mah kai ih kawng pongah saksi nang doethaih ih to talawk o mak ai,’ tiah ang naa.

¹⁹ Kaimah, ‘Angraeng, kai loa sinakok kruekah ka caeh moa nang ka taang kaminawk to ka naeh moa ka boh to anihcae mah panoek o king.

²⁰ Nangmah ih saksi Stefen to hum o na-ah kaimah khaekhaeh to ka oh moa anih hum ih to kaimah naakrak haih moa ka humkungnawk ih kahninawk to ka sinh pae,’ tiah ka naa.

²¹ Angraeng mah, ‘Caeh ah, kawmawtiah kanghla parai Gentel kaminawk khaeah kang patoeh han,’ tiah ang naa,” tiah a thuih.

²² Hitiah lok a thuih airoek loa mipui mah Paul ih lok to tahngai pae o; to-e topacoengah hoiloa anihcae mah, “To kami to anghmat angtaa na soe! Hum oah!” tiah ta-aw ka taem khoekto a hangh o.

²³ A hangh o moa khukbuenhnawk to ranui bangah ahaek o moa van bangah vaiphu to a haeh o tahang.

²⁴ Rom risa pahoikung angraeng mah Paul to risanawk ohhaih im thungah caeh o haih ah, tipongkhoe maw Judah kaminawk mah hitiah a hangh o haih tito panoek thaih hanah quiboeng hoiah bop oah, tiah lok a paek.

²⁵ To-e boh hanah taoeng o pacoeng na-ah Paul mah toah kangdoe risa angraeng khaeah, “Rom kami longto hae kawbatih zaehaih ih doehsoe lokduenghhaih om aiah boh halat hae ahlong maw?” tiah a duengh pae.

²⁶ Hi lok hae risa angraeng mah a thaih na-ah risa pahoikung angraeng khaeah a caeh moa anih khaeah, “Timaw na sak tito na panoek maw? Hi kami hae Rom kami ni!” tiah a naa.

²⁷ Topongah risa pahoikung angraeng loa Paul khaeah a caeh moa anih khaeah, “Nang loa Rom kami maw, na thui ah,” tiah a naa. Paul mah, “Ue, Rom kami ah ka oh,” tiah pathim pae.

²⁸ Risa pahoikung angraeng mah, “Kai loa tangka zetpui ka paekhaih hoiah Rom kami ah ka coengh,” tiah a naa. Paul mah, “Kai loa ka zah nahoiah Rom kami ah ka oh roep boah,” tiah pathim pae.

²⁹ Paul to lok ka dueng han kaminawk loa ahnuk bangah angnong o phrat let; Paul loa Rom kami ah a oh tihoi anih to sumqui hoiah pahlet moeng ving boah tito panoek na-ah risa pahoikung angraeng loa a mawnh moa tasoeh.

Paul Lokcaekhaih Kawngsi Hma-ah

³⁰ Risa pahoikung angraeng loa Judah kaminawk mah Paul hae timaw zaenet o haih ih to ka om tito hnuk hanah a koeh; topongah akhawnbang ah Paul pahlethaih ih sumqui to a khramhsak moa qaihma kacoetanawk hoi lokcaekhaih Kawngsi kacoetanawk boih to amkhueng o cu hanah lok a paek. Topacoengah Paul to a caeh haih moa anihcae hma-ah angdoetsak.