Angtawtha 21 - Asang Khongso New Testament

Paul Jerusalem Ah Caeh

¹ Kaicae mah anihcae to ngantui ta-ah om oh, tiah ka naa o moa ka caeh o tak. Katoeng ta-ah palong hoiah ka caeh o moa Kos tuilanglum to ka phak o; akhawnbang ah Rods tuilanglum to ka phak o moa toah to Patara ah to ka caeh o poe.

² Toah to Fonisia ah ka caeh han tuisamphaw to ka hnuk o moa kangthueng o moa ka caeh o.

³ Saiparas tuilanglum hnuk thai ih ahmuenh to ka phak o moa to hoitoah aloihbang ah kangqoi o moa Siria prae ah palong hoiah ka caeh o. Taiar vang ah kanghum o moa toah to tuisamphaw mah phawh ih hmuennawk to pathong o.

⁴ Toah to taangca thoemto to kangqum o moa anihcae hoiah tabaih maeto ka oh o. Cai Pakhra ih thuihhaih ranghoiah anihcae mah Paul to Jerusalem ah caeh han aiah a kaang pae o.

⁵ To-e anihcae hoiah ka oh o nawn ih tue to aboeng na-ah ka tacawt o moa ka caeh o let. Anihcae loa angmahcae ih a zunawk hoi a canawk boih hoiah avang laep tuipuitaeng roekto ang thak o, toah khokkhu samkrawn o moa kho ka phoeh o.

⁶ Topacoengah longto hoi longto ampraekhaih ban kang sinh o moa kaicae loa tuisamphaw nuiah ka dawh o moa anihcae loa im bangah amlaem o.

⁷ Taiar vang hoitoah palong hoiah ka caeh o let moa Ptolemais vang to ka phak o, toah to taangcanawk hoiah kangqum o moa anihcae khaeah nito ka oh o.

⁸ Akhawnbang aloa ka tacawk o tak moa Sisaria vang to ka phak o. Toah to Tamthang kahoih thuikung Filip im ah ka toemh o, anih loa Jerusalem vang ah bomkung longsarihto qoih ih thungih longto ni.

⁹ Anih loa sava ka sah ai canu longpalito a tawnh moa anihcae loa Sithaw lok ka thuikungnawk ni.

¹⁰ Kaicae toah to ani paroeai ka oh o pacoengah tahma longto ahmin Agabas naa pae ih to ang phak.

¹¹ Kaicae khaeah angzoh, Paul ih kaengkaeh to a lak moa a khok hoi a ban to taoeng pae moa, “Cai Pakhra mah hitiah a thuih: Hi kaengkaeh ka tawnkung hae hitiah Jerusalem ih Judah kaminawk mah taoeng o ueloa Gentel kaminawk ih ban thungah paek o tih,” tiah a naa.

¹² Hi lok hae kaicae mah ka thaih o na-ah toah kaom kaminawk hoi kaicae mah Paul to Jerusalem ah caeh han aiah ka kaang pae o.

¹³ To-e anih mah, “Tikhoemaw hitiah na qah o moa kai ih palung to na setsak o? Kai loa Angraeng Jesuh han-iah Jerusalem vang ah taoeng ah ka oh khueh aiah duek han mataeng doeh coengcoe ah ka oh,” tiah a naa.

¹⁴ Kaicae mah ka kaang o thai ai pongah ka toengh o tak sut moa, “Angraeng koehhaih ih batiah oh na soe,” tiah ka naa o.

¹⁵ Toah to atue setta thung ka oh o pacoengah hmuennawk kamhuek o moa Jerusalem bangah to kamsak o.

¹⁶ Sisaria vang ih hnukbang thoemto loa kaicae khaeah angzoh o toeng moa ka toemh o hanih Mnason im ah to angcaeh haih. Anih loa Saiparas vang ih kami ah oh moa zanghnii hoitoah taangca ah a oh boah.

Jaem Khaeah Paul Paqaih

¹⁷ Jerusalem vang ah ka phak o na-ah taangcanawk mah kawnhaih hoiah ang dawt o.

¹⁸ Akhawnbang ah Paul loa Jaem to angqum hanah kaicae khaeah angzoh moa khrihca kangkom kacoetanawk boih doeh acung o.

¹⁹ Paul mah ban a sinh king moa a toksakhaih ranghoiah Gentel kaminawk salak thungah Sithaw mah a sak ihnawk boih to kacung ta-ah a thuih pae.

²⁰ A lokthuih ih to tahngai o boih pacoengah Sithaw to saphaw o. Topacoengah anihcae mah, “Kamza Paul, Judah kami sang paroeai mah kawbangmaw taangca ah a coengh o moa Tawklok to natanto maw palung a nat o tito na hnuk king.

²¹ Gentel kaminawk prae thungih kaom Judah kaminawk boih khaeah, nangmahcae ih canawk to tangzat-hin aahsak hmah, Judah kaminawk ih tawkcahnawk to pazuisak o hmah, tiah na thuih pae moa Mosi ih Tawklok to caehtak hanah na patuk tito anihcae mah a thaih o boah.

²² Nangcae hiah na phak o ih tamthang to anihcae mah thaih o tih tito loa amnoek lai boah. Totibaloa kawbangmaw sak o han?

²³ Na sak o hanah kang koeh o haih ih loa hitiah ni. Hiah hae lok amaihhaih ka sah tangcae kami longpalito a oh.

²⁴ Anihcae hoiah nawnto caeh aloa thoengcaihaih tawkcah a sak o ih to sah toeng aloa rong hankoi to loa rong pae oah; topacoengah angmahcae ih lu to muilum ah aat o thai tih. Hitih haeah nang ih kawng a thuih ihnawk boih to loktang ai ni tito mi boih mah panoek o ueloa nangmah roeroe to Mosi ih Tawklok hoiah kamcuk ah kho ka sah ni tito mi boih mah panoek o tih.

²⁵ To-e Gentel taangcanawk han-iah loa kaicae mah ca ka pat pae o boah, ca ka pat o ih thungah kraangthoi khaeah tahlang ih caknaek to cak han om ai, athii to cak han om ai, tahnong panamh moa paduek ih moi to cak han om ai, nongpui hoi nongpa zaehaih sak han om ai, tiah lok takroek ih kang pat o boah,” tiah a naa o.

²⁶ Topongah Paul mah kaminawk to a caeh haih moa akhawnbang ah thoengcaihaih tawkcah to a sak pae o. Topacoengah tempal thungah akun moa thoengcaihaih tawkcah sakhaih ni aboeng khoekto ni nazetto maw akraa tih tihoi natuekah maw angbawnhaih to longto rip hanah sak han om tih tito doeh a thuih pae.

Tempal Thungah Paul Naeh O

²⁷ To-e ni sarihto aboeng tom na-ah Asia prae ih kaom Judah kami thoemto mah Paul to Tempal thungah a hnuk o. Anihcae mah mipui boih to pahruek o moa Paul to a naeh o.

²⁸ Anihcae mah, “Israel kaminawk! Na bom oah!” tiah a hangh o. Hi kami loa vang kruekah caeh moa Israel kaminawk doehsoe, Mosi ih Tawklok doehsoe, hi Tempal doehsoe kasae ah thuih moa kaminawk to a patuk. Vaihi ah hi Tempal thungah Gentel kaminawk to akun haih moa hi hmuenh kacai hae anuenhsak!” tiah a hangh o.

²⁹ (Anihcae mah hitiah a hangh o haih ih loa Efesa vang ih Trofimas to Paul hoiah vang thungah a hnuk o moa Paul mah anih to Tempal thungah akun haih kalang mue, tiah a dawn o pongah ni).

³⁰ Vangpui thung boih ah lokpunghaih ih mah a koi, kaminawk boih loa angcawnh o moa Paul to a naeh o moa Tempal thung hoitoah tasabang ah a yaeh o. Topacoengah Tempal thoknawk to a khah o phrat.

³¹ Mipui mah Paul to hum hanah angcaeng o na-ah Jerusalem vangpui thung boih ah lokpunghaih ih a oh tiah Rom risa pahoikung risa angraeng khaeah tamthang to a thaihsak o.

³² Risa pahoikung risa angraeng loa risa angraeng thoemto hoi risanawk to a caeh haih moa mipui khae bangah to angcawnh o. Mipui mah risanawk hoi ato risa angraeng kangzo to a hnuk o na-ah Paul a boh o ih to a toengh o sut.

³³ Risa pahoikung risa angraeng loa Paul khae bangah angzoh moa anih to a naeh, sumqui bokhnetto hoiah pahlet hanah lok a paek. Topacoengah anih mah, “Hi kami hae ami maw? Ti zaehaih ih maw a sak?” tiah a duengh.

³⁴ Mipui thoemto mah hmuen maeto a hangh o haih, thoemto mah hmuen kalah to a hangh o haih. Totiah lok pung pongah risa pahoikung risa angraeng mah tihmuen to maw ka om tito kamnoek ta-ah panoek thai ai pongah angmah ih kaminawk khaeah Paul to risanawk ohhaih im thungah caeh haih hanah lok a paek.

³⁵ A caeh o haih na-ah hlakkung roekto khueh a phak o haih thaih, topacoeng hoiloa mipui to a saeng o parai ving pongah Paul to risanawk mah angzawn ah angzawn o.

³⁶ Mipui loa a hnukah patom o batsarat moa, “Hum oah,” tiah a hangh o.

Paul Angmah Angtanghhaih

³⁷ Risanawk mah Paul to angmahcae ohhaih ih im thungah akun o haih tom na-ah anih mah risa pahoikung angraeng khaeah, “Lok zetta ka thui thai tih maw?” tiah a naa. Risa angraeng mah, “Grik lok na kop maw?

³⁸ Toti nahaeloa zanghnii thuem kueah misa kangthawk moa kami sangpalito to kakung haih moa kanoe kamsum hoiah praetanghaeng thungah ka caeh haihkung Izipt kami to na ai maw?” tiah a naa.

³⁹ Paul mah, “Kai loa Judah kami ni, Silisia prae Tarsas vang ah ka za kami ni, ahmin kamthang vangpui ih ka om toengh ni. Tahmenhaih hoiah mipui khaeah lok na thuisak ah,” tiah pathim pae.

⁴⁰ Risa pahoikung risa angraeng mah lokthuihhaih ih to pa-awh pae, topongah Paul loa hlakkung ah angdoet moa mipui to sap tiah oh hanah a ban to pazangh thuih o. Lok apae aiah anghngai o cing na-ah Paul mah Hebru lok hoiah anihcae khaeah lok a thuih.