Angtawtha 20 - Asang Khongso New Testament

Masidonia hoi Grik Prae Ah

¹ Lokpunghaih to aboeng pacoengah loa Paul mah taangcanawk to a kawk cu moa thapaekhaih lok to a thuih pae pacoengah, ngantui ta-ah om oah, tiah a naa moa Masidonia prae bangah to a caeh.

² Anih loa to praenawk ah to a caeh amkaeh moa thapaekhaih loknawk to a thuih pae. Topacoengah Akhaia prae ah to a phak moa

³ toah to khrah thumto a oh. Siria prae ah caeh hanah amsak na-ah anih to Judah kaminawk mah anih to tamqu lamah hum hanah angcaeng o tito a panoek; topongah anih loa Masidonia prae bang hoitoah amlaem let han angcaeng.

⁴ Berea vang ih Pirrhas capa Sopater loa anih to a caeh haih; to batih toengah Thesalonika vang ih Aristarkas hoi Sekundas, Derbe vang ih Gaias, Asia prae ih Taikhikas hoi Trofimas, hoi Timote cae mah doeh a caeh haih o.

⁵ Anihcae loa hmaloe ah a caeh o moa kaicae to Troas vang ah angzing o.

⁶ Kaicae loa Tae thuh-ai Takaw Poi aboeng pacoengah Filipi vang hoitoah palong hoiah ka caeh o moa ni pangato akraa pacoengah Troas vang to ka phak o moa toah to tabaih maeto kamdam o.

Troas Ah Hnukkhuem Kholong Caehhaih

⁷ Ni taruk ni duembang ah angkomhaih buh ven hanah kamkhueng o cu. Paul loa akhawnbang ah caeh hanah oh boah pongah qumning khoekto lok a thuih.

⁸ Kaicae acuhaih ih imnui akhaan ah hmai-im to pa-ang o mangh.

⁹ Thendoeng longto ahmin Zutikhas loa thokbuengh ah to anghnut moa Paul mah anghak aiah a thuih poepoe na-ah Zutikhas loa iih angam aep aep, hnukkhuem bangah loa a iih tangtang ving boah moa imnui sakroeng thumto nahoiah long ah a krak. Akhuih o na-ah a duek boah.

¹⁰ To-e Paul loa a hum tathuk moa pathawk moa tapom. Anih mah, “Tasoeh o hmah, hingh vop hmang!” tiah a naa.

¹¹ Topacoengah Paul loa imnui ah to a dawh tahang let, takaw to a aeh moa a cak o. Ni tacawk khoekto, atue kasawk paraiah lok a thuih pacoengah a caeh.

¹² Thendoeng to loa kahing ah im ah a caeh o haih moa paroeai palungmong o.

Troas Hoitoah Miletas Ah

¹³ Kaicae loa tuisamphaw hoiah hmaloe ah Assos ah to ka caeh o, toah to Paul loa aicae ih tuisamphaw ah to angthuengsak han a oh.

¹⁴ Assos vang ah aicae hoiah angqum na-ah anih to tuisamphaw ah angthuengsak o moa Mitilene vang ah to ka caeh o.

¹⁵ To hoitoah ka tacawt o moa akhawnbang ah Khios to ka phak o. Omvaih ah loa Samos tuilanglum to ka phak o moa omvaih akhawnbang aloa Miletas vang to ka phak o.

¹⁶ Paul loa Asia prae thungah atue boengsak han aiah Efesa vang to caehtak han a dawn. Anih loa Jerusalem to phak mue mue hanah a tawt, angcoeng thai nahaeloa Pentikos ni to kae han a koeh.

Efesa Ah Paul Lokpathaih

¹⁷ Paul mah Miletas vang hoitoah kami to patoeh moa Efesa vang ih Khrihca kangkom kacoetanawk to angzoh moa angmah hoiah angqum o hanah lok a pat.

¹⁸ A phak o na-ah anih mah, “Asia prae ah ka phak tangsuek nahoi nangcae khaeah ka oh nathung kawbangmaw atue ani boih to ka patoh tito na panoek o.

¹⁹ Judah kami thoemto mah tamqu lamah hum hanah ang patoem o pongah raihaih katingai ang phak nathuemah mi hlimah angdokhaih hoi mikkhraetui hoiah Angraeng ih tamtoeh ah ka oh batiah ka tok to ka sak.

²⁰ Tamthang lok ka thuih moa mipui kamtueng ah doeh, im thungah doeh ka patuk na-ah nangcae hanih atho kaom hankoi tidoeh ka taphat ih om ai tito na panoek o.

²¹ Judah kami doehsoe, Gentel kaminawk doehsoe nangcae boih mah zaehaih caehtak moa Sithaw khaeah amlaem moa Angraeng Jesuh to taang hanah kana dakah acoehaih kang paek o.

²² Vaihi loa Cai Pakhra ih lok tahngaihhaih ranghoiah Jerusalem ah ka caeh han, toah ka nuiah tihmuen maw pha tih tito ka panoek ai.

²³ Cai Pakhra mah thongkrakhaih hoi raihaih ih mah ang zing sut tihae vang kruekah Cai Pakhra mah kai hae acoehaih ang paek ih khueh to ni ka panoek.

²⁴ To-e kai han loa ka hinghaih hae tidoeh tamu ka suem ai; Sithaw ih tahmenhaih kawng Tamthang Kahoih thuih taphong hanah Angraeng Jesuh mah ang paek ih tok hae kacung ta-ah pacoeng thai king khueh hae ni ka koeh.

²⁵ “Kaimah nangcae boih khaeah kamkaeh moa Sithaw Poenghaih kawng to kang thuih o. Vaihi loa amita mah doeh kai hae nang hnuh o let mak ai boah tihae ka panoek.

²⁶ Topongah vaihni ah hae kana dakah thuih han ka koeh ih loa: nangcae thungih longlongto nang hmat o nahaeloa kai hae na pakung o hmah.

²⁷ Kawmawtiah Sithaw ih amsakhaih ih boih to nangcae khaeah kang thuih o king moa taphat ih tidoeh om ai.

²⁸ Topongah nangmahcae hoi nangmahcae to acoe o aloa nangcae ih ban thungah Cai Pakhra mah suek ih tuuhu to khetzawn oah. Sithaw mah a Capa duekhaih ranghoiah angmah han-iah a sak ih khrihca kangkom ih tuukroekung ah om oah.

²⁹ Kang caeh o tak nahnuk ah tasui kasaeng to nangcae salak thungah angzo ueloa tuuhu to pahlung mak ai.

³⁰ Nangmahcae kaminawk thungih thoemto mah amsawn amlai to thui o ueloa taangcanawk to angmahcae bangah zaehoihaih ih tue to na pha tih.

³¹ Topongah acoehaih hoiah om o aloa saning thumto thung nangcae boih mikkhraetui hoiah qum thun kang patuk o to pahnet o hmah.

³² “Vaihi loa Sithaw khetzawnhaih hoi a tahmenhaih lok thungah nangcae to kang tahlang o, ato mah nangcae to qoengsak thai ueloa mi boih hanah Sithaw mah a suek ih tahamhoihhaih to na paek o tih.

³³ Kai loa ami ih maku doehsoe, sui doehsoe, khukbuenh doehsoe ka khithaih ih om ai.

³⁴ Kaimah hoi kampuinawk mah kangtoeng o ih cungriboih to paek hanah kaimah ih ban roeroe hoiah tok ka sak tito nangcae khaekhaeh mah na panoek o.

³⁵ Hitih haeah toksakhaih ranghoiah ka vawt ka thoek kaminawk to abom han oh tito tiboih ah kang patueng o boah moa Angraeng Jesuh angmah khaekhaeh mah, ‘Talawk pongdoeh paek hae palung anghoehaih a oh,’ tiah a thuih ih lok to palung thungah pakuem o poe ah,” tiah lok a taquk.

³⁶ Paul loa lok a thuih boih pacoeng na-ah anihcae hma-ah khokkhu samkrawn moa khophoeh.

³⁷ Anihcae boih mah a qah o, Paul to sakop o moa a mok o, ngantui ta-ah caeh aa, a naa o.

³⁸ Anihcae mah palungset o haih koek ih loa kai hae nang hnuh o let mak ai boah tiah a thuih pae pongah ni. Topacoengah tuisamphaw ohhaih ih karoekto a thak o.