Angtawtha 18 - Asang Khongso New Testament

Korin Vang Ah

¹ Ato pacoengah Paul loa Athens vang hoitoah tacawt moa Korin vang ah to a caeh.

² Toah to Pontas prae ah ka za, Judah hmin ah Akuila na pae ih to angqum. Anih loa a zu Priskilla hoiah Itali prae bang hoitoah kangzo tha ni, kawmawtiah Rom Sangpahrang Klaudias mah Judah kaminawk boih to Rom vang hoitoah tacawtsak king hanah lok a paek. Paul mah anih hnit zuva to angqum hanah a caeh moa,

³ anih hnit khaeah to a oh moa anih hnit hoiah nawnto tok a sak, kawmawtiah anih doehsoe anih hnit zuva batih toengah samdai im sakhaih hoiah zokzae kang kok kami toeng ni.

⁴ Sabbath nikruekto sinakok ah Judah kaminawk hoi Grik kaminawk to palung a vawksak hanah lok a thuih toemoe.

⁵ Silas hoi Timote hnit to Masidonia prae hoitoah ang phak hoi na-ah Paul mah angmah ih atue bum boih to tamtanglok thuihhaih bangah a patoh moa Jesuh loa Messiah ni tito Judah kaminawk khaeah kamnoek ta-ah a thuih pae.

⁶ Anihcae mah Paul to a aek o khak moa anih kawng to kasae ah a thuih o, koeh ai ih amtueng palunghoihhaih ai ih amtuengsak iah kahni pongih vaiphu to takhoek thuih moa anihcae khaeah, “Nanghmat o baloa kai pakung o hmah, nangmahcae koeh boah ni. Vaihi hoiloa Gentel kaminawk khaeah ka caeh han boah,” tiah a naa.

⁷ Topongah anihcae to tacawt tak moa Gentel kami ahmin Titias Jastas ih im ah a oh; anih loa Sithaw ka bok kami ah oh moa sinakok haek ta-ah to a oh.

⁸ Sinakok pahoikung Krispas loa angmah ih imthungtako boih hoiah Angraeng to a taang o; Korin vang ih kami paroeai mah tamthang lok to a thaih o moa a taang o, moa baptisma to a hak o.

⁹ Duemto na-ah Paul loa hnuksakhaih ih to a hnuk moa toah to Angraeng mah anih khaeah, “Zi hmah, thui poepoe aloa toeng sut hmah,

¹⁰ kawmawtiah kaimah kang oh haih. Nang to amimah doeh nganbawh na paek mak ai, kawmawtiah hi vang thungih kami paroeai loa kai ih kaminawk ni,” tiah a naa.

¹¹ Topongah Paul loa toah to saningto pacoeng a boenghto thung a oh moa Sithaw lok to patuk pae o.

¹² Gallio loa Akhaia prae ih Rom acozah ukkung ah a oh na-ah to ih kaom Judah kaminawk to takok o moa Paul to a naeh o moa lokcaekhaih zung ah to tacawt o haih.

¹³ Anihcae mah, “Hi kami mah tawklok to a aek moa Sithaw to bok hanah kaminawk to a pazoi tuektuek,” tiah a naa o.

¹⁴ Paul loa lokthuih han a ti na-ah Gallio mah Judah kaminawk khaeah, “Judah kaminawk, hi hmuen kahoih kasae kalai, tiaibaloa sakpazaehaih ih kawng ah om nahaeloa nangcae mah zaenethaih ih to palungsawkhaih hoiah ka poekdawn han hoih tih mue.

¹⁵ To-e hi hmuen loa loknawk, ahminnawk hoi nangcae ih tawk kawngnawk to angaekhaih iah oh pongah nangmahcae hoi nangmahcae mah aram o halat ah. Tobatih kawng romram pongah lokcaekkung ah oh han ka koeh ai!” tiah a naa moa

¹⁶ lokcaekhaih zung thung hoitoah tacawtsak o.

¹⁷ Sinakok pahoikung Sosthenes to a naeh o moa lokcaekhaih ih zung hma-ah to a boh. To-e Gallio mah tiadoeh dawncang pae ai.

Antiok Ah Amlaem Let

¹⁸ Paul loa Korin vang ah ani paroeai taangcanawk hoiah a oh pacoengah tacawt tak moa Priskilla hoi Akuila hnit hoiah Siria bangah palong hoiah a caeh o. Palong hoiah tacawt o ai nahlanah Kenkhria vang ah loktaphaih ih a sak pongah lu to muilum ah a aah.

¹⁹ Efesa vang to a phak o moa toah to Priskilla hoi Akuila to a caehtak. Sinakok thungah akun moa Judah kaminawk hoiah tamthang lok to aram o.

²⁰ Kaminawk mah kasawk ah oh hanah a kaang pae o, to-e a mak pae.

²¹ Amsak na-ah anihcae khaeah, “Sithaw mah naakrah nahaeloa nangcae khaeah kamlaem let han,” tiah a naa pae. Topacoengah loa Efesa vang hoitoah tuisamphaw hoiah a caeh.

²² Sisaria vang ah a phak na-ah Jerusalem ah a caeh, khrihca kangkom to ban a sinh moa topacoeng aloa Antiok vang ah to a caeh.

²³ Toah to atue kasawk roem ah patoh pacoengah tacawt moa Galatia hoi Frizia prae thung to a caeh moa taangcanawk boih to tha a rahsak.

Efesa hoi Korin Vang Ah Apollo

²⁴ Tona thuemah Alekzandria vang ah ka za, Judah kami ahmin Apollo naa pae ih to Efesa vang ah to angzoh. Anih loa lokthuih ka kop phi moa Cabu Kacai to panoek krumkrae kami ni.

²⁵ Anih loa Angraeng ih Loklam kawng to katip ah kamtuk kami ah oh moa Jesuh kawng to palung angthawkhaih phi hoiah a thuih moa kamsoem ta-ah a patuk pae. To-e anih loa Johan ih baptisma khueh to ni a panoek.

²⁶ To-e anih loa sinakok ah misahoihhaih hoiah lok a thuih. Priskilla hoi Akuila mah a thaih hoi na-ah angmah hnit im ah to a caeh haih hoi moa Sithaw ih Loklam kawng to kacai aep ah a thuih o.

²⁷ Topacoengah Apollo loa Akhaia prae ah caeh hanah amsak, topongah Efesa vang ih taangcanawk mah abom o moa Akhaia vang ih taangcanawk khaeah anih to talawk hanah pacaehaih ca to tarik pae o. Toah to a phak na-ah Sithaw tahmenhaih ranghoiah taangca ah ka omnawk hanah to bomkung kahoih koek ah oh.

²⁸ Kawmawtiah lok angaekhaih bangah a rah parai moa Jesuh loa Messiah ni tito Cabu Kacai hoitoah kacaipin ah amtuengsak moa mipui hma-ih lok angaekhaih na-ah Judah kaminawk to pazawk toemoe.