Angtawtha 16 - Asang Khongso New Testament

Paul hoi Silas Khaeah Timote Caeh

¹ Paul loa Derbe vang hoi Listra vang ah to a phak. Listra vang ah Khrihca longto ahmin Timote naa pae ih to a oh. Amno doeh Khrihca ah oh moa Judah kami ah oh, to-e ampa loa Grik kami ah oh.

² Listra hoi Ikoniam vang ih kaminawk boih mah Timote to pakoeh o.

³ Paul mah Timote to angmah hoiah nawnto caeh haih han a koeh, anih mah tangzat-hin a aah pae. Totiah a sak pae haih ih loa Timote ampa loa Grik mi ni tito ato hmuenh ih kaom Judah kaminawk boih mah panoek o king pongah ni.

⁴ Anihcae loa avangnawk to akun o moa a caeh o na-ah Jerusalem vangpui ih kaom kawkpatoehnawk hoi kacoetanawk mah lok takroek ih tawknawk to taangcanawk khaeah a thuih pae o moa atonawk to pazui hanah a thuih pae o.

⁵ Topongah khrihca kangkomnawk loa taanghaih bangah tha a rah o moa nithokkruek ah kami to a pung tahang aep aep.

Troas Vang Ah Paul Hnuksakhaih

⁶ Asia prae ah tamthang lok to thuih hanah Cai Pakhra mah paong ai pongah Frizia hoi Galatia thungah to a caeh o poe.

⁷ Misia khoqik to a phak o na-ah Bithinia prae thungah akun han panki o, to-e Jesuh Pakhra mah anihcae to paong pae ai.

⁸ Topongah Misia prae to a caeh o poe moa Troas vang to a phak o.

⁹ Ato duem ah to Paul mah hnuksakhaih ih maeto to a hnuk moa ato amtuenghaih ih pongah to Masidonia prae kami longto angdoet moa, “Masidonia prae bangah angzo oloa kaicae hae na bom oah!” tiah ka pacae tuek to a hnuk.

¹⁰ Paul mah hi hnuksakhaih ih to a hnuk hoiloa Masidonia prae bangah to caeh hanah kamsak o roep, kawmawtiah to ih kaminawk khaeah Tamthang Kahoih to taphong hanah Sithaw mah ang kawk tiah ka taang o.

Filipi Ah Lidia Palung Anglaihhaih

¹¹ Troas vang hoitoah tuisamphaw hoiah ka tacawt o moa Samothrasia bangah to ka toengpat ah caeh o moa akhawnbang ah Neapolis vang to ka phak o.

¹² To hoitoah oeng bangah ka caeh o moa Filipi vang to ka phak o, Filipi loa Masidonia prae thungih kapoeng hmaloe koek ih vanglipui ah oh moa Rom mah uk ih avang ah doeh oh bae. To vang ah to ani paroeai kamdam o.

¹³ Sabbath ni ah vangpui thung hoitoah ka tacawt o moa tuivataeng ah to ka caeh o, toah to Judah kaminawk mah khophoeh hanah acuhaih ih hmuenh to om kalang tih tiah ka dawn o. Kanghnut o moa toah kacu toengh nongpuinawk khaeah to lok ka thuih pae o.

¹⁴ Kaicae ih lok ka thaih kaminawk thungih longto loa Thiatira vang ih Lidia ni, anih loa kahni kamling ka zawkung ah oh. Lidia loa Sithaw ka bok kami ah oh moa Paul mah lokthuih ih to tahngai hanah Sithaw mah palungthin thok to paong pae.

¹⁵ Angmah hoi angmah ih imthungtako kaminawk boih to baptisma a hak o pacoengah anih mah, “Kai hae Angraeng ih taangca tangtang ah na dawn o nahaeloa angzo o aloa kai im ah toem oah,” tiah ang pacae o. Totiah to pacae khruek pongtoah ka caeh o.

Filipi Thongim Ah

¹⁶ Nito loa khophoehhaih hmuenh ah ka caeh o na-ah taqawk kasae ka tawn tamtoeh nongpui longto to kangqum o, anih loa taqawk kasae mah hmalam bang hmuen kangzo hankoi to a thuihsak thai. Hmalam bang hmuen kangzo han kawng a thuih ranghoiah angmah ih tawnkung angraengnawk hanah tangka katingai a hak pae.

¹⁷ Anih loa Paul hoi kaicae hnukah baang moa, “Hi kaminawk loa Kasang Koek Sithaw ih tamtoehnawk ni! Nangcae mah kawbangmaw pahlong ah om o thaih tih tito a thuih o,” tiah a hangh.

¹⁸ Hitiah ani paroeai thung a hangh tuek, Paul loa palung a khueksak pongah a hnuk bangah anghae moa taqawk kasae khaeah, “Jesuh Khrih hmin hoiah anih thungih kaom tacawt hanah lok kang paek!” tiah a naa. Vaipang ta-ah taqawk kasae loa tacawt roep.

¹⁹ Angmah ka tawnkung angraengnawk loa tangka pakronghaih ih loklam to om ai boah tito panoek o na-ah Paul hoi Silas to a naeh o moa mipui amkhuenghaih ih hmuenh ah akaatawn kungnawk hma-ah to a yaeh o.

²⁰ Rom prae kami angraengnawk hma-ah to tacawt o haih moa, “Hi hnit loa Judah kami ni, kaicae ih vangpui thungah lokpunghaih tacawtsak hoi.

²¹ Kaicae ih tawk hoiah ka kaih ai tawkcah to patuk hoi; kaicae loa Rom kami ah ka oh o, hi tawknawk hae ka talawk o thai mak ai moa ka pazui o thai mak ai,” tiah a naa o.

²² Tona-ah mipui mah doeh a bong o moa Paul hoi Silas to angthawk thuih o. Topacoengah ukkung angraengnawk mah Paul hoi Silas hnit ih khukbuenh to asih pae o moa boh hanah lok a paek pae o.

²³ A boh o patsat pacoengah thongim ah paung o moa kacak ta-ah pahlet hanah thongim ukkung to lok a paek o.

²⁴ Totitoah thongim ukkung mah lokpaek ih to a hnuk pongah thongim thung a thung aep ah a suek o moa khok ah to hlongthuk pae o.

²⁵ Qumning tang thuemtham ah loa Paul hoi Silas loa khophoeh hoi moa Sithaw saphawhaih laa a sak hoi, thongkrah kalahnawk mah to tahngaih pae o.

²⁶ Poek ai puiah tali kana paraiah a hnawh moa thongim loa takung khoekto anghuen. Vaipang ta-ah thoknawk boih to am-ong king moa thongkrahnawk boih ih sumquinawk to angkhram king.

²⁷ Thongim ukkung loa anglawt moa thongim thoknawk kam-ong king to a hnuk na-ah thongkrahnawk to cawnh o king boah tiah a dawn; topongah angmah ih songsen to a zuh moa angmah hoi angmah to angthunh han a thuih.

²⁸ To-e Paul loa khoeh puiah hangh moa, “Nangmah hoi nangmah to nganbawh paek hmah! Hiah ka oh o boih!” tiah a naa.

²⁹ Thongim ukkung angraeng loa hmaithaw angzo o haih ah tiah a naa, karang ah akun moa Paul hoi Silas hnit ih khokkung ah to tasoeh takuen hoiah tabok pae.

³⁰ Topacoengah tasabang ah to a caeh haih moa, “Angraeng hnit, pahlong ah oh hanah timaw ka sak han?” tiah a naa.

³¹ Anih hnit mah, “Angraeng Jesuh to taang ah, nangmah hoi na imthungtako to pahlong ah om tih,” tiah a naa pae hoi.

³² Topacoengah anih hnit mah Angraeng ih lok to anih hoi a imthung ah kaom kaminawk boih khaeah a thuih pae hoi.

³³ Ato qum roeroe ah thongim ukkung mah anih hnit to a caeh hoi haih moa ahmanawk to pasaeh pae; angmah hoi a imthungtako boih mah baptisma to a hak o roep.

³⁴ Topacoengah Paul hoi Silas to angmah ih im ah to a caeh haih moa caknaek to a paek. Angmah hoi a imthungtako loa Sithaw to taang o pongah anghoehaih hoiah koi o.

³⁵ Akhawnbang ah Rom kami akaatawn kungnawk mah palik angraengnawk to patoeh moa, “Ato kaminawk to prawt o lai ah,” tiah lok a paek o.

³⁶ Topongah thongim ukkung mah Paul khaeah, “Angraengnawk mah nang hoi Silas to prawt hanah lok a paek o boah. Topongah tacawt hoi aloa kamong ta-ah caeh hoi ah,” tiah a naa.

³⁷ To-e Paul mah palik angraengnawk khaeah, “Kaicae zaehaih tidoeh hnuh o ai, to-e mipui hma-ah ang boh o, kai hnit hae Rom kami toeng bae! Topacoengah thongim thungah ang paung o moa vaihi tamqu lamah kahla ah patoeh han koeh o. Hitiah sak hae tueng ai! Rom kami angraengnawk khaeh to mah hiah angzo o soeloa kaicae hae na prawt o na soe,” tiah a naa pae.

³⁸ Palik angraengnawk mah hi lok hae Rom angraengnawk khaeah to a thuih pae o; Paul hoi Silas loa Rom kami ni tito a thaih o na-ah a mawnh o.

³⁹ Topongah a caeh o moa anih hnit khaeah tahmenhaih a hnik o; topacoengah thongim thung hoitoah a prawt o moa vangpui to tacawt hoi tak hanah tahmenhaih a hnik pae o.

⁴⁰ Paul hoi Silas loa thongim hoitoah tacawt hoi moa Lidia im ah to a caeh hoi. Toah to taangcanawk hoiah angqum o moa thapaekhaih loknawk to a thuih pae hoi pacoengah a caeh hoi tak.