Angtawtha 14 - Asang Khongso New Testament

Ikoniam Vang Ah

¹ Tobatih toengtoeng ah Ikoniam vang ah doeh a oh: Paul hoi Barnabas loa sinakok ah to a caeh hoi, lok to a thuih hoi moa Judah kaminawk hoi Gentel kaminawk to taangca ah a coengh o.

² To-e taang han ka koeh ai Judah kaminawk mah Gentel kaminawk to pacung o moa taangcanawk to angzoeh angaeksak o.

³ Kawkpatoeh hnit loa toah to ka sawk paraiah a oh hoi, Angraeng kawng to misahoihhaih hoiah a thuih hoi moa anih ih tahmenhaih kawng a thuih hoi ih to tangtang ni tito amtuengsak hanah dawnraihaih hoi matsakhaih ihnawk to sak hanah tharahhaih ih to a paek pae hoi.

⁴ Vangpui ih kaom kaminawk loa ampraek o hlak: thoemto mah Judah kaminawk bangah to a bong o moa thoemto loa kawkpatoeh hnit bangah to a bong o.

⁵ Topacoengah Gentel kaminawk hoi Judah kaminawk loa angmahcae ih pahoikungnawk hoiah nawnto ah kawkpatoeh hnit to pacaekhlaek han hoi hlung hoiah vah mat hanah lok takroek o.

⁶ Ato kawng to kawkpatoeh hnit mah panoek hoi na-ah Likaonia prae ih kaom Listra vang hoi Derbe vang taengvai prae ah to a cawnh hoi.

⁷ Toah to Tamthang Kahoih to a thuih hoi.

Listra hoi Derbe Vang Ah

⁸ Listra vang ah zah tangsuek nahoiah khokbai longto a oh moa taka thai ai roeroe.

⁹ Anih loa toah to anghnut moa Paul ih lok to tahngai toeng. Paul loa a thuih ih to ato kami mah a taang moa ngan a tui thai tito a hnuk na-ah anih to a khet daptap moa

¹⁰ lok to khoeh puiah, “Na khok hoiah katoeng ta-ah angdoe ah!” tiah a naa pae. Ato kami loa angphet tahang moa a takat thai.

¹¹ Paul mah a sak ih to mipui mah a hnuk o na-ah angmahcae Likaonian lok hoiah a hangh o moa, “sithaw hnit loa kami batiah angcoeng hoi moa aicae khaeah angzoh tathuk boah!” a thuih o.

¹² Anihcae mah Barnabas to Zeus tiah ahmin to a paek o moa Paul loa lok ka thuikung kacoeta ah oh pongah Hermes tiah ahmin to a paek o.

¹³ Avang laep qongha ah Zeus sithaw ih tempal to a oh moa ato ih qaihma mah maitaw taenawk hoi apawknawk to khongkha ah to angzoh haih, kawmawtiah angmah hoi mipuinawk mah kawkpatoeh hnit khaeah angbawnhaih to sak hanah a koeh o.

¹⁴ Totitoah sak hanih to Paul hoi Barnabas mah a thaih hoi na-ah kahni to a sinh hoi moa mipui salak thungah a cawnh hoi.

¹⁵ “Tipongkhoe maw hitiah na sak o? Kai hnit loa nangcae batih kami romram toengh ni! Nangcae mah kavang kalang ai hmuennawk to caehtak moa van hoi long hoi tuiculi hoi a thungih hmuen kaomnawk boiboih ka sahkung kahing Sithaw bangah angqoi hanah Tamthang Kahoih taphong hanih ni hiah kangzoh hoi.

¹⁶ Zanghnii thuemah loa kaminawk boih to angmahcae koehhaih bang lam pazui rip hanah paongh pae.

¹⁷ To-e angmah a oh tito hmuen kahoih a sakhaih ih hoiah amtuengsak toemoe: anih moa van bang hoitoah kho to angzohsak moa atue nathuemah thingthaih qumpo to ang paek; caknaek to ang paek moa anghoehaih hoiah a koisak o,” tiah a naa pae hoi.

¹⁸ Hitiah lok a thuih pae hoi mataeng doeh mipui mah anih hnit khaeah angbawnhaih sak han aiah to pakaa pae hoi thai ai.

¹⁹ Pisidia prae Antiok vang hoi Ikoniam vang hoitoah Judah kami thoemto to angzoh o; mipui to angmahcae bangah bong hanah palungthin to pazawk o, Paul to hlung hoiah vah o moa a duek boah mue tiah a dawn o pongah vangpui sipae laep bangah to a yaeh o.

²⁰ To-e taangcanawk mah anih to a ven o khuk na-ah angthawk moa vang thungah to a caeh let. Akhawnbang ah Barnabas hoiah Derbe vang ah to a caeh hoi.

Siria Prae Antiok Ah Amlaem Hoi Let

²¹ Paul hoi Barnabas loa Derbe vang ah Tamthang Kahoih to a thuih hoi moa hnukbang paroeai a hak hoi. Topacoengah Listra vang, Ikoniam vang hoi Pisidia prae Antiok vang ah to a caeh hoi.

²² Anih hnit mah taangcanawk to tha a rahsak hoi moa taanghaih pongah kangcak ta-ah oh poe hanah tha a paek hoi.

²³ Khrihca kangkom kruekah kacoetanawk to a qoih pae hoi moa khophoehhaih hoi buhzahhaih hoiah a taang o ih Angraeng ban thungah to tahlang pae hoi.

²⁴ Pisidia prae to a poeng hoi pacoengah Pamfilia prae ah to a phak hoi.

²⁵ Toah to Perga vang ah tamthang lok to a thuih hoi moa Attalia ah to a caeh hoi.

²⁶ To hoitoah Antiok ah to palong hoiah amlaem hoi let; Antiok vang loa vaihi a sak hoi pacoeng ih tok han-iah Sithaw tahmenhaih thungah tahlang hoi haih ih ahmuenh ni.

²⁷ Antiok ah a phak hoi na-ah Khrihca kangkom ih kaminawk to nawnto ah amkhuengsak hoi moa anih hnit ranghoiah Sithaw mah a sak ihnawk boih hoi Gentel kaminawk mah taang o thai hanah lam a paong pae ihnawk boih to a thuih pae hoi.

²⁸ Anih hnit loa toah to taangcanawk hoiah atue ka sawk paraiah oh o.