Angtawtha 13 - Asang Khongso New Testament

Barnabas hoi Saul Patoeh O

¹ Antiok vang ih Khrihca kangkom thungah tahma hoi patukkung thoemto a oh. Atonawk loa Barnabas, (kamnum naa pae o ih) Simeon, (Sairin vang ih) Lusias, (Acozah ukkung angraeng Herod hoiah ka qoeng nawn ampui) Manaen hoi Saul cae hae ni.

² Anihcae loa Angraeng to bok moa buhzah o li nathuemah Cai Pakhra mah anihcae khaeah, “Barnabas hoi Saul to kai ih toksak hanah pahloe o lah ah,” tiah a naa.

³ Buhzah moa khophoeh o, anih hnit nuiah ban to koeng pae o moa patoeh o.

Saiparas Ah

⁴ Barnabas hoi Saul loa Cai Pakhra mah patoeh pacoengah Seleucia ah to caeh hoi moa to hoitoah palong hoiah Saiparas tuilanglum ah to a caeh hoi.

⁵ Salamis vang to a phak hoi na-ah sinakok ah Sithaw lok to a thuih hoi. Anih hnit ih tok ka bom hanah Johan Marka to a caeh haih hoi.

⁶ Anihcae loa ato tuilanglum thungah caeh o poe moa Pafos vang to a phak o. Toah to miklet kakop longto ahmin Bar-Jesuh to angqum o, anih loa Judah kami ah oh moa tahma longto ah ka oh, tiah a thuih.

⁷ Anih loa ato tuilanglum ukkung angraeng Serzias Paulas naa pae o ih, palungha parai kami ih ampui ah a oh. Ukkung angraeng mah Sithaw lok to thaih han a koeh pongah Barnabas hoi Paul to angmah khaeah a kawk.

⁸ To-e anihcae to miklet kakop Elimas (hi loa Grik hmin ni) mah a aek moa ukkung angraeng mah taanghaih to tawnh thai han aiah a panki.

⁹ Topacoengah Paul tiah doeh naa pae o ih Cai Pakhra hoiah a koi Saul mah miklet kakop kami to a khet daptap moa,

¹⁰ “Nang Diabol capa! Nang loa hmuen cungriboih ih misa ni. Nang loa lingmahaih kahoih ai congca hoiah kakoi kami ah na oh moa Angraeng ih loktang to kamlai ah coengsak hanah na panki.

¹¹ Angraeng ih ban loa vaihi nang nuiah na pha tih; mik na maeng ueloa nawnetta thung thun kho ka aang to na hnuh mak ai,” tiah a naa. Vaipang ta-ah Elimas ih a mik loa tamai kamnum mah kraeng khoep ih batiah oh pae moa a ban ah zaehoi hanih kami to pakrong hanah avah taitu boah.

¹² Ukkung angraeng mah hmuen kaom to a hnuk na-ah a taang; kawmawtiah Angraeng ih kawng patukhaih ih to katingai dawn a rai.

Pisidia Prae Antiok Vang Ah

¹³ Paul hoi angmah ih ampuinawk loa Pafos hoitoah palong hoah a caeh o moa Pamfilia prae ih Perga vangpui to a phak o, tohoi toah Johan Marka loa amlaem tak moa Jerusalem ah to ahloih.

¹⁴ Anihcae loa Perga hoitoah a caeh o poe moa Pisidia prae Antiok vang ah to a phak o; Sabbath ni ah sinakok ah to akun o moa anghnut o.

¹⁵ Mosi ih Tawklok cabu hoi tahmanawk ih tarik ih cabu to a kroek o pacoengah sinakok ukkungnawk mah, “Naukamzanawk, mipui hanah thapaekhaih ih lokthuih han na tawnh o nahaeloa thuih han kang koeh o,” tiah kami to patoeh moa a thaihsak o.

¹⁶ Paul loa angdoet, a ban to ahaek moa lokthuih amtong: “Israel caeng kami ampuinawk hoi hiah Sithaw ka bok Gentel kaminawk boih, ‘Tahngai oah!

¹⁷ Israel kaminawk ih Sithaw mah aicae saezanawk to a qoih moa Izipt prae ah prae kalah kami batiah khosak o nathuemah caeng kami kalenpui ah a sak. Sithaw mah angmah ih hmuensak thaihaih ih kalen hoiah anihcae to Izipt prae thung hoitoah tacawtsak moa,

¹⁸ saning quipalito thung praetanghaeng ah anihcae to ka pauep pathae pae.

¹⁹ Kanaan prae thungah caeng kami caeng sarihto to a phraek moa angmah kaminawk to prae ka tawnkung ah a sak.

²⁰ Hitiah hmuen kaom hae saning cumvai palito pacoeng quipangato roekrak a kra. “Hi pacoengah loa tahma Samuel dung roekto lokcaek kungnawk to a paek pae.

²¹ Topacoengah anihcae mah sangpahrang to a hnik o na-ah saning quipalito thung sangpahrang ah oh hanah Benjamin caeng thungih Kish capa Saul to Sithaw mah a paek pae o.

²² Anih to a tok hoitoah anghaksak pacoengah Sithaw mah David to anihcae ih sangpahrang ah a suek pae. Angmah kawng Sithaw mah a thuih ih loa, ‘Jesse capa David hae ka koeh ih kami ni, anih loa sak hanah ka pacin ih boih to ka sah hankoi kami ni,’ tiah a thuih.

²³ Sithaw mah lok amaih batiah Israel kaminawk hanah Pahlongkung paek ih loa David catawn thungih Jesuh hae ni.

²⁴ Jesuh loa a tok amtong ai nahlanah Johan loa Israel kaminawk boiboih khaeah a zaehaih o ihnawk to dawnpakhuem moa baptisma hak o hanah tamthang lok to a thuih.

²⁵ Topacoengah Johan loa a toksakhaih ih topacoeng tom na-ah mipui khaeah, ‘Kai hae ami ah maw na dawn o? Kai hae na zing o ih kami na ai ni. To-e tahngai oah! Anih loa kai hnukah angzoh li moa kai loa anih ih khokbuen qui khramh pae han boe doeh kamcuk ai,’ tiah a naa.

²⁶ “Ka caeng ampui Israel kaminawk, Abraham ih cadiinawk hoi hiah Sithaw ka bok Gentel kaminawk boih: Hi pahlonghaih tamthang lok paek ih hae aicae hanih ni!

²⁷ Kawmawtiah Jerusalem ah kho kasah kaminawk hoi anihcae ih pahoikungnawk mah anih loa Pahlongkung ni tito panoek o ai moa Sabbath ni kruekah kroek tuektuek ih tahmanawk mah tarik ih lok to doeh thaihkop o ai. To-e Jesuh to humhaih hoiah tahmanawk ih lok to acungsak o boah.

²⁸ Topacoengah anihcae mah Jesuh hum thai hanah akawng alam to hnuh o thai ai e aloa anih to hum hanah Pilat khaeah a hnik o.

²⁹ Anih ih kawng Cabu Kacai mah thuih ih cungriboih to a sak o pacoengah a qok to kraws nui hoitoah a khringh o pacoengah taprong thungah up o.

³⁰ To-e Sithaw mah anih to duekhaih thung hoitoah angthawksak let moa,

³¹ Galili hoitoah Jerusalem ah angmah hoiah nawnto kholong ka caeh kaminawk khaeah ani zetpui thung amtueng pae.

³² Topongah Sithaw mah aicae saezanawk khaeah ka sak han, tiah amaih ih Tamthang Kahoih hae nangcae khaeah sinh hanah hiah hae kangzoh o.

³³ Sithaw mah Jesuh to hinghaih bangah angthawksak let ranghoiah saezanawk ih cadii ah ka om aicae khaeah vaihi ang sak pae boah. Saam cabu hnetto thungah: ‘Nang loa ka capa ni, vaihni ah nang ih Ampa ah ka coengh boah,’ tiah tarik ih batiah to a oh.

³⁴ Topacoengah taprong thungah qong ai roeroe ah duekhaih thung hoitoah angthawksak lethaih kawng Sithaw mah a thuih ih loa: ‘David khaeah lok kammaih ih to kacai hoi oepthok kaom tahamhoihhaih kang paek han,’ tihae ni.

³⁵ Topacoengah hmuenh kalah bangah doeh, ‘Nang ih oeptang kaom tamtoeh to taprong thungah na qonghsak mak ai’ tiah a oh bae.

³⁶ Kawmawtiah David loa angmah ih hingh tue thungah Sithaw koehhaih ih to a sak pacoengah a duek; angmah ih saezanawk khaeah aphum o moa a qok loa taprong thungah to a qongh a prawn.

³⁷ To-e Sithaw mah duekhaih thung hoitoah angthawksak let ih kami to loa totiah to om ai.

³⁸ Ka caeng ampui Israel kaminawk, nangcae mah panoek hanih loa Jesuh ranghoiah zae tahmenhaih kawng to ni nangcae khaeah kang thuih o.

³⁹ Mosi Tawklok mah loihsak thai ai ih zaehaih ihnawk boiboih to angmah ka taang kami boih loa a loih o boah, tihae panoek oah.

⁴⁰ Topongah tahmanawk mah a thuih o ih to nangcae khaeah pha moeng han aiah acoe oah:

⁴¹ ‘Khen oah, nangcae mi pahnuih haih kaminawk! Dawnrai oloa dueh oah! Kawmawtiah vaihiah ka sak ih loa kami longlongto mah nangcae khaeah thuihpacaih langla cadoeh na taang o han ai ih hmuen ni!’ tiah a thuih o,” tiah a naa.

⁴² Paul hoi Barnabas loa sinakok hoitoah tacawt hoi na-ah mipuinawk mah hmabang ih Sabbath ni ah angzoh let moa hi hmuennawk kawng hae kanoi aep ah thuih hoi let hanah pacae pae o.

⁴³ Mipuinawk loa acuhaih hoitoah tacawt o pacoengah Judah kami paroeai hoi Judah bokhaih ka pazui Gentel kami paroeainawk mah Paul hoi Barnabas hnukah a baang o. Kawkpatoeh hnit mah anihcae khaeah lok a thuih pae hoi moa Sithaw ih tahmenhaih thungah hingh o thai poe hanah tha a paek pae hoi.

⁴⁴ Hmabang ih Sabbath ni ah loa vang thungih kaom kaminawk boih tuemtang ah Angraeng ih lok to tahngai hanah angzoh o.

⁴⁵ Judah kaminawk mipuinawk to a hnuk o na-ah uthaih ih hoiah a koi o; Paul mah thuih ih to angaek o moa anih to thuihsae o.

⁴⁶ To-e Paul hoi Barnabas loa misa kahoih aep aep ah a thuih hoi: “Nangcae khaeah Sithaw lok thuih hmaloe hae angtoeng parai. To-e nangcae loa ato to na koeh o ai moa nangmahcae hoi nangmahcae to dungzan hinghaih hnuk hanah ka krah ah na dawn o ai pongah kang caeh hoi tak moa Gentel kaminawk khaeah kang caeh hoi han boah.

⁴⁷ Kawmawtiah Angraeng mah aicae hanah ang paek ih lokpaek loa: ‘Longnui prae bum boih hae pahlong ah oh hanah nangcae loa Gentel kaminawk hanah aanghaih ah kang suek boah,’ tihae ni,” tiah a naa hoi.

⁴⁸ Ato to Gentel kaminawk mah a thaih o na-ah palung anghoe o moa Sithaw ih lok to pakoeh o; dungzan hinghaih hnuk hanah qoih ih kaminawk loa taangca ah coengh o.

⁴⁹ Angraeng ih lok loa ato prae thung ahmuenh kruekah amthang anghaeh.

⁵⁰ To-e Judah kaminawk loa vangpui ih pahoikungnawk hoi Sithaw ka bok khangza koi kaom Gentel nongpuinawk to palung pahruek pae o. Anihcae mah Paul hoi Barnabas to pacaekhlaekhaih amtong o moa angmahcae ih prae thung hoitoah pathok o.

⁵¹ Kawkpatoeh hnit loa palung angaih ai ih amtuengsakhaih iah angmah hnit khok pongih vaiphu to takhoek hoi thuih moa Ikoniam vang ah to a caeh hoi tak.

⁵² Antiok ih kaom taangcanawk loa anghoehaih hoi Cai Pakhra hoiah a koi o.