Angtawtha 1 - Asang Khongso New Testament

¹ Palung ih Theofilas: Ka cabu hmaloe koek thungah Jesuh mah toksak amtong tangsuek hoitoah van ah lak tahang ah oh karoekto

² a sak ihnawk hoi a patuk ihnawk boiboih to ka tarik boah. Van ah lak tahang ah oh ai nahlanah kawkpatoehnawk hanih ah a qoih ih kaminawk to Cai Pakhra tharahhaih hoiah

³ A duek pacoeng ni quipalito thung anihcae khaeah vai paroeai amtueng moa a hing let tito oepvawthaih om aiah lam kalah zetpui hoiah amtuengsak. Anihcae mah angmah to a hnuk o moa anih mah Sithaw Poenghaih kawng to a thuih pae.

⁴ Moa anihcae khaeah a oh nathuemah hi lokpaek hae a paek: “Jerusalem vang hae tacawt o tak hmah, to-e Pa mah amaih ih langrae kang thuih o ih to zing oah.

⁵ Johan mah tui hoiah baptisma to a paek, to-e ani zetta thungah Cai Pakhra hoiah baptisma paek ah na om o tih,” tiah a naa.

Jesuh Van Ah Dawh

⁶ Kawkpatoehnawk loa Jesuh hoiah nawnto amkhueng o na-ah anihcae mah, “Angraeng, vaihiah hae maw Israel kaminawk hanah Poenghaih to na paek let han?” tiah a duengh o.

⁷ Jesuh mah anihcae khaeah, “Atue hoi ani loa Pa angmah ih akaatawnhhaih hoiah khaeh ah o moa nangcae mah panoek han angaih ai.

⁸ To-e nangcae nuiah Cai Pakhra ang phak na-ah loa tharahhaih hoiah na koi o ueloa Jerusalem ah, Judea hoi Samari prae boih ah, long taemtuer khoekto ah kai ih saksi ah na om o tih,” tiah a naa pae.

⁹ Hi lok thuih pacoengah a khet o nathuemah van ah lak ah oh, moa tamai mah a vingh khoep moa hnuh o thaih ai boah.

¹⁰ Anihcae mah ka laem zawh to nilavan bangah khet o li nathuemah, laihaw kanglung kangkhuk kami longhnetto anihcae taengah angdoet pae phrat moa,

¹¹ “Galili kaminawk, tipongah maw van bang doeng lamhoi nangdoet o loa? Nangcae khae hoi-ih lak tahang ah kaom Jesuh hae, van bangah ka daw to na hnuk o batih toengah angzo let tih,” tiah a naa pae hoi.

Judas Zuengah Qoihhaih

¹² Topacoengah kawkpatoehnawk loa Oliv Mae hoitoah Jerusalem ah to amlaem o. Ato maesom loa Jerusalem hoitoah meng hapto thuemtham ni a oh.

¹³ Anihcae loa Vangpui thungah akun o moa angmahcae toemhhaih ih akhaan ah to a dawh o tahang: Piter, Johan, Jaem hoi Andru, Filip hoi Thomas, Bartholomew hoi Mathai, Alfaias capa Jaem, acaeng palung kana Simon, hoi Jaem capa Judas cae ni.

¹⁴ Anihcae loa nongpuinawk hoi, Jesuh ih amno Meri hoi angmah ih amnauknawk hoi, abu ta-ah nawnto khophoeh hanah angqum o toepsoep.

¹⁵ Ani zetta kra pacoengah taangcanawk acu o moa sungqum boih ah cumthawn pumto a oh; Piter loa angthawk moa,

¹⁶ “Naukzanawk, Jesuh ka naehkungnawk zaehoikung Judas kawng David pakhaa ah Cai Pakhra mah thuihcoek ih Cabu kacai thungah tarik ih to acung han oh.

¹⁷ Judas loa aicae ih tok thungah apa toeng hanah qoih ah oh pongah aicae ih kami thungah apa toeng,” tiah a naa.

¹⁸ (Judas loa hmuen kahoih ai a sak ih hoiah a hnuk ih tangka hoiah lawk maeto a qanh, ato hmuenh ah amthaek moa a duek; zok to koih phawt moa takoh tazaenawk doeh tacawt boih.

¹⁹ Ato kawng to Jerusalem vang ih kaom kaminawk boih mah a thaih o moa ato lawk to angmahcae lok hoiah ‘Akeldama’ tiah phui o; thuihkoehhaih loa “Athii Lawk,” tihaih ih ni.)

²⁰ Piter mah, “Kawmawtiah Saam cabu thungah, ‘Anih ih im to a kokkak ah om na soeloa, mita mah doeh oh haih hmah na soe,’ tiah tarik ah oh. Topacoengah, ‘Anih ih tokhaih ahmuenh toah mi kalah longlongto mah angkhrum kroek na soe,’ tiah tarik ah oh bae.

²¹ “Totiah oh moa Jesuh angthawklethaih to panoek haih bomkung saksi ah oh hanah longlongto mah aicae hae angbong hanah angtoeng.

²² Anih loa Johan mah baptisma kawng a thuih nahoiah kamtong Jesuh mah van ah ang caehtak ni karoekto, Angraeng Jesuh mah aicae hoiah kholong caeh amkaeh nathung boiboih aicae thungah ka thum toengah om tih,” tiah a ti.

²³ Topongah kami longhnetto: Barabbas tiah kawk o ih Joseph (Justus tiah doeh naa pae o ih) hoi Matthias to tacawt haih o.

²⁴ Topacoengah anihcae mah, “Angraeng, nang loa mi boih ih palungthin dawnhaih to na panoek king, ahi longhnetto thungah amito maw na qoih tito amtuengsak ah;

²⁵ angmah a tok ih hmuenh ah caeh hanah ka tacawt tak Judas ih ahmuenh ah kawkpatoeh tok ka sah han-iah amnoeksak ah,” tiah khophoeh o.

²⁶ Topacoengah ato longhnetto thungah amito maw qoih han tito panoek han-iah qoihcung to a zuh o moa a qoih o ih loa Matthias ni; anih loa kawkpatoeh hahlaitonawk ih abu thungah akun.