3 Johan 1 - Asang Khongso New Testament

¹ Kacoeta khae hoi-ih, Ka palung tangtang ih Gaias khaeah ca kang pat.

² Ka palung ih kampui, cungriboih to hoihdak ta-ah oh thai han hoi ngantui ta-ah oh thai hanah kho ka phoeh. Pakhra bangah ngantui ta-ah na oh tito kang panoek.

³ Nang loa loktang lok thungah na oh batiah loktang lok pongah oep ka thok ah na oh, tiah thoemto Khrihca naukamzanawk to angzoh o moa ang thuih na-ah katingai palung kanghoe.

⁴ Ka canawk mah loktang lok thungah kho a sak o tiah ka thaih laep ah kai palung anghoesak aepkung kalah tidoeh om ai.

Gaias To A Pakoeh

⁵ Ka palung ih ampuinawk, nangmah ih Khrihca naukamzanawk hoi nangmah panoek ai ih kaminawk hanah doeh, na sak ih tok pongah oepom phi ah na oh.

⁶ Anihcae mah nangcae ih amlunghaih kawng to hi ih Khrihca kangkom khaeah a thuih o boah. Anihcae kholong ah caeh o poe hanah Sithaw ih palung ka ngaih ah abom o rae ah.

⁷ Kawmawtiah anihcae loa Khrih ih toksak na-ah ka taang ai kaminawk khae hoitoah abomhaih tita doeh hnuh aiah kholong ah amsak o.

⁸ Topongah anihcae ih loktang lok thungah toksak hae tok ka sah haih bomkung ah oh hanah aicae Khrihcanawk mah doeh hibatih kaminawk hae loa abom han oh.

Diotrifis hoi Demetrias

⁹ Khrihca kangkom khaeah ca ka duem tet kang tarik; to-e anihcae ih pahoikung ah oh han ka koeh Diotrifis mah loa ka lokthuih hae tiadoeh sah mak ai.

¹⁰ Topongah kangzoh na-ah a sak ihnawk boih hoi aicae ih a kawng kahoih ainawk a thuih ih hoi amsawn thuih ihnawk boih to ka taphong pae king han. Topacoengah hi khueh aiah aicae ih Khrihca naukamzanawk to angzoh na-ah talawk o ai, anihcae to talawk moa toemhsak han ka koeh kaminawk to doeh pakaa pae o moa Khrihca kangkom thung hoitoah anihcae to pakak ving hanah panki o.

¹¹ Ka palung ih ampuinawk, kahoih ai hmuen to kuu la o hmah aloa kahoih hmuen to kuu la oah. Ami doeh hmuen kahoih ka sah loa Sithaw kami ah oh moa ami doeh hmuen kahoih ai ka sahnawk boih loa Sithaw to hnuh o ai.

¹² Demetrias ih a hoihhaih hae mi boih mah a thuih o; loktang lok roeroe to mah anih ih a hoihhaih to a thuih. Aicae mah doeh a hoihhaih to thuih o moa kaimah ka thuih ih hae amsoem tiah na panoek o.

Lokpahlenhaih

¹³ Nang khaeah thui han paroeai ka tawnh, to-e cacung hoi catui hoiah thuih han ka koeh ai.

¹⁴ Angqum o palang ueloa to na-ah takbum hoiah aicae mah lok aram o sungqum tih hmang.

¹⁵ Nangcae khaeah monghaih oh na soe. Nangcae ih ampuinawk boih mah ban angsinh o. Aimahcae ampuinawk boih to miloeng rip ah ban na sin pae ah.