2 Piter 2 - Asang Khongso New Testament

Patuk Pazaenawk

¹ Zanghnii ah Israel kaminawk salak thungah tahma kalingnawk to tacawt o moa ato batih toengah patukkung kahmaan ainawk doeh nangcae salak thungah tacawt o toengh tih. Anihcae mah parohaih ih kahmaan ai tanghaih kungpui to tacawt o haih ueloa angmahcae pahlongkung Angraeng to takhoe o tih, topongah angmahcae nuiah amrohaih to poek aipuiah phasak o tih.

² Totiah oh o mataeng doeh kami paroeai mah angmahcae ih tuinuenh kahoih ai to pazui o toengtoeng tih, kawmawtiah a sakhaih o ih pongah mi kalahnawk mah Loktang Lam to kasae ah thui o tih.

³ Ahi patukkung kahmaan ainawk loa kaoeloe koeh o pongah pasoem hmang ih ruici thuihhaih ih hoiah nangcae thung hoitoah amraihaih to pakrong o tih. To-e anihcae lokcaekkung ih amsakhaih loa atue sawk parai boah moa anihcae Parokung loa iip aiah hak boah.

⁴ Zaehaih ih kasah vanminawk to Sithaw mah pahlung mak ai, kawmawtiah hell hmai thungah va o ueloa toah to kaving thungah taoeng o moa Lokcaekhaih Ni to a zing o.

⁵ Zanghnii ih long to Sithaw mah pahlung ai, Sithaw khangzahaih ka tawn ainawk ih longnui ah tuisakring to a phaksak moa toenghaih lok ka thui Noah hoi kalah kami longsarihto khueh a pahlong.

⁶ Sithaw mah Sodom hoi Gomorrah vangpui to tahnawng moa hmai hoiah a phraek; Sithaw khangzahaih ka tawn ai kaminawk nuiah ka thok hankoi khetpatawt hanah a sak ih ni.

⁷ Tawklok tidoeh ka sah ai, boe kasae kaminawk mah hnaphnae ih kami kahoih Lot to a pahlong.

⁸ Ato kami kahoih to loa anihcae salak thungah khosak moa nito hoi nito anihcae mah kahoih ai hmuensak ihnawk to a hnuk moa a thaih na-ah palung to a natsak.

⁹ Topongah Sithaw khangza kaminawk loa raihaih thung hoitoah kawbangah maw loihsak han tihoi kami kahoih ainawk loa Lokcaekhaih Ni ah raekhaih thungah kawbangah maw suek han tito Angraeng mah panoek.

¹⁰ Ato kaminawk loa panuet kaom takngan ih koehhaih bangah ka pazuinawk hoi Sithaw ih akaatawnhhaih to tiadoeh ka sah ainawk ni. Ahi patukkung kahmaan ainawk loa misahoih o moa amoek o; ranuibang van ih ka om lensawk kaminawk to khangza o ai moa kasae ah thuih o lat.

¹¹ Hi patukkungnawk pongdoeh tha kaom pahlai moa khoeh kaom pahlai vanminawk mataeng doeh Sithaw hma-ah zaenet na-ah lok kasae apae o ai.

¹² To-e hi kaminawk loa naeh moa hum romram hanah ka tapen tawmoi batiah tapenhaih maek tih dawnhaih romram hoiah hmuen to a sak o; anihcae mah panoek kop o ai ih hmuen to khetsaehaih hoiah thuihprong o. Anihcae loa tawmoi kasaeng batiah hum ah om tih.

¹³ Minawk to raihaih a paek o pongah raihaih hoiah pathok let ah om tih. Anihcae hanah nawmhaih ih loa athun khodai ah takngan koehhaih ih cungri to sakhaih hoiah palungkhuek tisak hae ni; anihcae loa lingmahaih lam bangah to pazui o li pongah nangcae khaeah buh a cak o na-ah azathaih hoi mikhmai sethaih tacawtsakkung ah oh.

¹⁴ Anihcae loa nongpui kahoih ainawk to khet tiaialoa khet han koeh ih tita doeh om ai; zae sak hanah koehhaih ih palung amrim o ai roeroe. Tha kahnaem kaminawk to dong pongah a mansak o. Anihcae ih palungthin loa kaoeloe koehhaih ih hoiah a koi. Anihcae loa Sithaw mah tangoeng ih kaminawk ni.

¹⁵ Anihcae loa lam katoeng to a caehtak o moa lam to tahmang o boah; Beor capa Balaam ih loklam to pazui o boah. Balaam loa hmuen kahoih ai sak pongah a hnuk hanih tangka to palung moa,

¹⁶ zaehaih a sak ih pongah thuihtaek ah oh. Anih ih laa hrang loa kami batiah lok to apaeh moa tahma ih amthuhaih hoiah hmuen a sak ih to a toenghsak.

¹⁷ Hi kaminawk loa vacong tui kakaang batih hoi takhisae mah a hmuh ih tamai batih ni a oh o; Sithaw mah anihcae hanah vinghaih kathuk parai thungah ahmuenh to a suek pae coek boah.

¹⁸ Anihcae loa amoek parai moa lok kahoih ai to apaeh o, sakpazaehaih thungah kho kasah kaminawk salak thung hoitoah kaloih tha kaminawk to amansak hanah takngan huedoenghaih kahoih ai to patoh o.

¹⁹ Anihcae mah ato kaminawk to loihhaih na hnuh o tih tiah lok amaih pae o e, angmahcae mataeng doeh amrohaih tuinuenh ih misong ah oh o, kawmawtiah kami hae kawbatih hmuen mah doeh anih to pazawk baloa ato pazawkkung ih misong ah oh.

²⁰ Aicae Angraeng hoi Pahlongkung Jesuh Khrih to anihcae mah panoekhaih ranghoiah longnui zaehaih panuetsoeh ka om thung hoitoah na loih o pacoengah panuet kaom zaehaih mah na naeh o moa pazawk o let nahaeloa, tobatih kaminawk loa tangsuek ih pongdoeh hnukkhuem ah a set o aep.

²¹ Toenghaih loklam to panoek o pacoeng hoi lokpaek kacai to anihcae khaeah paek ah oh pacoengah hnukah angqoi o tak let pongloa tidoeh panoek aiah om o ngala soehaeloa anihcae hanah a hoih kue.

²² Hibatih anihcae nuiah hmuen kathok to Tamtuklok mah, “Ui loa angmah ih tamlok to a cak let,” tihoi “Ok loa tui pahluk pacoengah tangkae anghawt let,” tiah thuih ih tamtuklok hae ahmaan tito amtuengsak.