2 Korin 6 - Asang Khongso New Testament

¹ Topongah Sithaw hoiah nawnto toksahkung ah ka oh o pongah Sithaw ih tahmenhaih na hak o ih to azom ah na coenghsak o han aiah kang pacae o.

² Sithaw mah, “Nangcae khaeah mikhmai kahoih kamtuengsak han tue phak na-ah lok to kang thaih pae o; Nangcae ka pahlong hanah ani to phak na-ah kang bom o,” tiah a thuih. Tahngai oah! Vaihi hae Sithaw ih mikhmai kahoih hakhaih ih tue boah ni; vaihni hae pahlonghaih ih tue boah ni!

³ Kaicae toksak ih hae mimah doeh coek han ka koeh o ai, topongah ami ih loklam to doeh pakhaa pae han ka zom o ai.

⁴ Ka sak o ih cungriboih pongah khrukhrahaih, patang palai pacaphaih, hoi raicanghaih ihnawk to palung kasawk ah pauephaih hoiah Sithaw ih tamtoeh ah ka oh o tito kamtuengsak o.

⁵ Ang boh o, thongim ah ang pakhrak o, mipui mah angbom thuih o; takbum mah pazawk ai khoekto tok ka sak o moa iip ai hoi buh hoiaiah ka oh o.

⁶ Thoengcaihaih hoiah doehsoe, panoekhaih hoiah doehsoe, palungsawkhaih hoiah doehsoe, tahmenhaih hoiah doehsoe, Cai Pakhra hoiah doehsoe, amlunghaih hoiah doehsoe,

⁷ loktang lok taphonghaih ih hoi Sithaw tharahhaih hoiah doehsoe, Sithaw ih tamtoeh ah ohhaih ih to kamtuengsak o. Toenghaih ih to misa tuk han na-ah hoi misa angdungh han na-ah Sithaw toenghaih ih to lithom batiah ka patoh o.

⁸ Kaicae loa khangzahaih ih hoi azat phawhhaih to ka tongh o; ang pahnuihthuih o moa pakoehhaih ih doeh ka tongh o. Amsawn lok ka thui batiah ni ang suek o, to-e kaicae loa loktang to ni ka thuih o;

⁹ mimah panoek ai batiah ang dawn o, to-e mi boiboih mah ang panoek o; kadueh kami batiah ka oh o, to-e na hnuk o batiah ka hingh o. Ang raek o, to-e ang paduek o ai.

¹⁰ Palung ang setsak o e kanghoe o toemoe; kamtang kamlai ah ka oh o e kami paroeai to kangraengsak o; tidoeh ka tawn o ai e cungriboih ka tawnkung ah ka oh o.

¹¹ Korin vang ih ampui palung ihnawk! Nangcae khaeah kamnoek ah kang thuih o boah; palungthin hae ka kauk ah kang paong pae o.

¹² Nangcae hanah palungthin thok kang kha pae o ai; nangcae mah ni kaicae hanah palungthin thok to nang khah o.

¹³ Kai ih ka canawk batiah vaihi kang thuih o: nangcae khaeah ka tawnh o ih palungthin batih toengah kaicae khaeah amtuengsak oah. Palungthin thok to ka kalen ah paong oah!

Lawkih Kaminawk Acoepaekhaih

¹⁴ Ka taang ai kaminawk hoiah kangvan ah nawnto toksah o hmah, kawmawtiah nawnto toksak han angcoeng thaih ai. Kawbangmaw katoeng hmuen hoi katoeng ai hmuen to loa ampui ah om hoi thaih tih? Kawbangmaw aanghaih hoi vinghaih to loa om hoi nawn thaih tih?

¹⁵ Kawbangmaw Khrih hoi Diabol to loa palungdue hoi thaih tih? Taangca hoi taangca ai mah timaw tawn hoi maek thai ih ka om?

¹⁶ Kawbangmaw Sithaw ih tempal hoi kataang ainawk ih kraang kathoinawk to loa angdaeh o thaih tih? Kawmawtiah kaicae loa kahing Sithaw ih tempal ah ka oh o! Sithaw Angmah khaekhaeh mah: “Ka im hae kaimah ih kaminawk hoiah ka sak han moa anihcae salak thungah ka oh han; Kai loa anihcae ih Sithaw ah ka oh han moa, anihcae loa kai ih kami ah om o tih,” tiah a thuih.

¹⁷ Topongah Angraeng mah, “Anihcae to caeh o tak aloa anihcae khae hoitoah ampraek oah. Kacai ai to loa sui hmah aloa kang talawk o han.

¹⁸ Kai loa nangcae ih Ampa ah ka oh han moa, nangcae loa ka ca hoi canu ah na om o tih, tiah Lensawk Koek Angraeng mah a thuih,” tiah a thuih.