2 Korin 12 - Asang Khongso New Testament

Paul Ih Hnuksakhaih hoi Lokphong

¹ Ka hoihhaih tidoeh om ai langla cadoehsoe kamlue han ka tawnh. To-e Angraeng mah paek ih hnuksakhaih hoi lokphong kawng to vaihi thuih han ka tawnh.

² Hnuk bang saning hlaipalito na-ah ka panoek ih Khrihca longto van kasang koek sakroeng thumto khaeah tahoeng tahang ah oh (ahi hae tangtang maw tiaibaloa hnuksakhaih a hnuk ih maw ka panoek ai, Sithaw mah khueh ni panoek).

³ Ka thuih let bae han, ahi kami loa Paradis ah tahoeng ah oh tiah ka thaih. (Ahi hae tangtang maw, hnuksakhaih maw, ka panoek ai; Sithaw mah khueh ni panoek).

⁴ Toah to anih mah lok hoiah thui thai ai ih hmuennawk to a thaih moa kami pahnii pakhaa mah doeh thui thai ai ih hmuennawk to a thaih.

⁵ Topongah hi kami kawng hae kamlue haih han, to-e ka thazokhaih kamtuengsakkung hmuen tiaialoa kaimah ih kawng loa kamlue haih mak ai.

⁶ Kamlue hanah ka koeh nahaeloa kamthu ah loa ka om mak ai. To-e kamlue mak ai; kawmawtiah ka sak ih to mimah ang hnukhaih ih hoi ka thuih ih to mimah ang thaihhaih pongdoeh kasang ah mimah doeh poekhaih to tawnh han to ka koeh ai.

⁷ To-e ka hnuk ih dawnrai hmuen to a pop parai pongtoah kam-oek moeng han aiah ka takbum pongah khring to ang paek moa ato khring mah Setan ih laicae batiah tok a sak moa kam-oek moeng han aiah kai hae ang raek moa pakakung ah a patoh.

⁸ Ahi kawng pongah vaithumto Angraeng khaeah kho ka phoeh moa na la pae ving ah tiah ka hnik.

⁹ To-e ang pathimhaih ih loa, “Kang tahmenhaih ih loa nang hanah khawt; kawmawtiah na thazok na-ah ka tharahhaih hae amtueng,” tihae ni. Topongah Khrih tharahhaih hoi angdunghaih to kai khaeah oh hanah ka thazokhaih ih hae palung kanghoe ta-ah kamlue haih boah.

¹⁰ Khrih han-iah tha ka zok na-ah doehsoe, pacaekhlaek na-ah doehsoe, patang palai pacap na-ah doehsoe, raekrai na-ah doehsoe, raicang na-ah doehsoe kanghoe thaih boah. Kawmawtiah tha ka zok na-ah ni tha ka rah.

Paul Mah Korin Kaminawk Poek Toemoe;

¹¹ Kai loa kamthu batiah ka tok, totiah tok hanah nang sak o. Kai nuiah palungkhuek tihaih ih kamtuengsak hanih loa nangcae hae ni. Kawmawtiah kai loa tidoeh na ai e nangcae ih “kawkpatoeh” kahoih takren tiah na naa pae o ihnawk pongdoeh kawbangah doeh ka hnaem hloe ai.

¹² Palungthin ka sawk parai hoiah nangcae salak thungah dawnrai hmuen hoi matsak ih paroeai ka sak moa ato mah to kawkpatoeh longto ah ka oh tito amtuengsak.

¹³ Khrihca kangkom kalahnawk pongdoeh kasae aep ah kawbangah maw kang sak. Phoisa tangka abomhaih hnik hoiah raihaih kang paek o ai khueh hae na ai maw? Ka pazaehaih ih hae na tahmen oah!

¹⁴ Vaihi hae nangcae khaeah kangzoh han kangcaenghaih ih avaih pathumhaih boah ni, tidoeh kang hnih o mak ai. Ka koeh ih loa phoisa na ai ni, nangmahcae to ni. Thuih tangtang nahaeloa, canawk mah amno ampa to kok han om ai, amno ampa mah ni canawk to kok han oh.

¹⁵ Nangcae to abom hanah ka tawnh ih boiboih hoi ka takbum hae doeh anghoehaih hoiah ka patoh han. Nangcae to kang palung o phi pongah kai hae nang palung o ai kueah ka oh han maw?

¹⁶ Topongah kai loa nangcae hanah hmuenzit ah ka om ai tito nangcae mah doeh ahlong na ti o tih. To-e kami longlongto mah loa mi kaling kama ni, amlaihaih hoiah thang ah amansak tiah na thui o tih.

¹⁷ Kawbangah maw kang ling o loa? Kang patoeh ih laicae longlongto ranghoiah nangcae khaeih amraihaih to kang lak pae o vaih maw?

¹⁸ Titas hae nangcae khaeah caeh hanah ka pacae moa anih hoiah nawnto Khrihca naukamza kalah longto to doeh kang patoeh. Titas loa angmah amraihaih han-iah a patoh tiah na thuih o han maw? Anih hoi kai loa palungthin maeto kanghmonghaih hoiah tok ka sak hoi nawn moa tuinuenh doeh kanghmong hoi na ai maw?

¹⁹ Nangcae hma-ah kaimahcae hoi kaimahcae to kang tangh o haih hanah apaeh o romram tuektuek titoah doeh na dawn o kalang mue. Totiah na ai ni. Sithaw hma-ah Khrih mah a thuihsak hanah a koeh ih to ni ka thuih o. Palung ih ampuinawk, cungriboih ka sak o ih hae nangcae abomhaih hanih ngai ni ka sak o.

²⁰ To-e nangcae khaeah ka phak na-ah totiah om na soe, tiah ka koeh ih batiah om aiah kalah kaang ah kang hnuh o moeng tih tito ka mawnh moa, kai doeh totiah om na soe tiah nangcae mah koeh ih batiah ka om ai moeng tih, tito ka mawnh parai toengh. Nangcae salak thungah angzoeh angaekhaih, utcethaih, palungduemhhaih, aimah taham khueh poekhaih, tamhnuihlok sakhaih; lokprong thuihhaih hoi polaihaih ihnawk to kang hnuh o moeng tih tihae ka mawnh parai.

²¹ Nangcae khaeah kangzoh let bae na-ah ka Sithaw mah nangcae hma-ah na zatsak moeng tih tihae ka mawnh; hnuk bangih zaehaih ka sah kaminawk, tuinuenh kahoih kapaih aiah ka hing moa takngan huedoenghaih hoi nongpui nongpa zaehaih a sak o ih to dawnpakhuem ai kaminawk hanah ka qah moeng tih tihae ka mawnh.