2 Korin 11 - Asang Khongso New Testament

Paul hoi Kawkpatoeh Kalingnawk

¹ Kamthu kue langla cadoehsoe na pauep pae o thaih hanah kang koeh o. Tahmenhaih hoiah na pauep pae o rae ah!

² Sithaw mah duengkhoe batiah kaimah doehsoe nangcae to ka duengkhoe thuih toengh; nangcae loa Khrih angmah khueh hoiah angoh hanah kam-aih tangcae ih tangla kacai batiah na oh o.

³ Pahui mah palunghahaih hoiah Evi to aling thaih batiah, nangcae palungthin to qong-ak moeng ueloa kacung hoi thoengcai ta-ah Khrih na patawnhaih o ih to na prawt o sut moeng tih tihae ka mawnh.

⁴ Kawmawtiah kaicae mah thuih taphong ih kami na aiah Jesuh kawng to kalah kaang ah ka thui moa nangcae khaeah kangzo kami longlongto kawnhaih hoiah na talawk o; nangcae loa kaicae khae hoi-ih na hak o ih tamthang kahoih hoi Pakhra na aiah pakhra kalah kaang hoi tamthang lok kalah kaang to doeh na tapom o.

⁵ Kaicae loa nangcae mah, “Kawkpatoeh tangtang” tiah nang naa o ihnawk pongdoeh setta doeh ka hnaem o ai tiah ka dawn!

⁶ Loklang apaeh hae ka kop ai kalang doeh om tih, to-e panoekhaih bangah loa ka hnaem ai roeroe; kawbatih ih tue ah doehsoe hi kawng hae kamnoek ta-ah kang thuih o boah.

⁷ Tamthang Kahoih to nangcae khaeah ka thuih na-ah atho tidoeh kang la pae o ai; nangcae to lokpui ah suek hanah kaimah hoi kaimah hae kanghnaem. Totiah ka oh to ka pazae maw?

⁸ Nangcae khaeah tok ka sak nathuemah Khrihca kangkom kalah kalah mah kai hae ang khetzawn o. Thuih nahaeloa, nangcae to abom hanah anihcae ih hmuen to ka lomh pae batiah ni a oh.

⁹ Nangcae hoiah ka oh nawn nathuem tangka kangtoeng na-ah nangcae to raihaih kang paek o ai; Masidonia prae bang hoitoah kangzo naukamzanawk mah kangtoenghaih ih cungriboih to ang sinh o. Hnuk bangih batiah hmalam bangah doehsoe nangcae hanah natuek doeh hmuenzit ah ka om mak ai.

¹⁰ Hi kamluehaih ih hae Akhaia prae thung vang kruekah amimah doeh pakaa thai mak ai tito ka thungih Khrih loktang lok kaom ranghoiah kam-aih.

¹¹ Kang palung o ai pongah hitiah lok ka paeh maw? Kang palung o tito Sithaw mah panoek.

¹² Kawkpatoeh kalahnawk mah anihcae batiah ka tok o toeng, tiah thuih o moa amoek o thaih han aiah vaihi ka tok ih hae ka tok poe han.

¹³ Ato kaminawk loa kawkpatoeh tangtang na ai ni, kawkpatoeh kalingnawk ni. Anihcae loa a toksakhaih kawng pongah amsawn amlai to a thuih o moa angmahcae hoi angmahcae to Khrih ih kawkpatoeh tangtang batiah angsak o.

¹⁴ Ato loa dawnrai han om ai, Setan mataeng doeh angmah hoi angmah to aanghaih vanmi batiah angsak thai!

¹⁵ Topongah anih ih tamtoehnawk mataeng mah doeh angmahcae hoi angmahcae to toenghaih toksahkungnawk batiah angsah o langla cadoehsoe dawnrai han om ai. Hnukkhuem aloa a sak o ih batih toengah a hak o han kating to hak o tih.

Paul Patang khanghaih

¹⁶ Ka thuih bae han: Mimah doeh kamthu ah na dawn o hmah na soe. To-e nangcae mah na dawn o nahaeloa kamthu batiah na talawk oah, tona-ah ni kamlue hanih zetta doeh ka tawn thaih tih.

¹⁷ Vaihi lok ka paeh ih hae Sithaw mah thuihsak hanah ang koeh ih na ai ni; hi amluehaih kawng pongah hae kamthu batiah ni ka paeh.

¹⁸ To-e kami kawng romram pongah kamlue kami hae paroeai oh pongah kai doeh kamlue toeng han.

¹⁹ Nangcae loa na cing o parai pongah kamthunawk to anghoehaih hoiah na pauep o thaih!

²⁰ Nangcae loa akaa hoiah ang uk o na-ah, thang pongah ang mansak o na-ah, ang khetsae o na-ah, mikhmai ah ang tabaeng o na-ah, na pauep na pathae o thaih.

²¹ Kaicae loa ato hmuennawk to sak hanah azat a kamnga o lawnlai tito taphong hanah ka zat o! To-e kamthu batiah lok ka paeh nahaeloa, ami doeh hmuen maemaeto kawng pongah kamlue vam baloa kai doeh anih batiah misa ka hoih toeng han.

²² Anihcae loa Hebru kami ah maw a oh o? Kai doeh ka oh toeng. Israel kami ah maw a oh o? Kai doeh ka oh toeng. Abraham ih cadii ah maw a oh o? Kai doeh ka oh toeng.

²³ Khrih ih toksahkung tamtoeh ah maw a oh o? Kai hae kamthu hoiah ahmong, to-e anihcae pongdoeh tamtoeh kahoih aep ah ka oh, anihcae pongdoeh tha kana aep ah ka tok, vaih paroeai thongim thungah kang ung, vaih paroeai boh ah ka oh moa vaih paroeai ka duek dui dui.

²⁴ Judah kaminawk mah vaih quithumto pacoengah vaih takawtto bohhaih ih hoiah vaih pangato ang caep o.

²⁵ Rom kaminawk mah vaithumto ang boh o; vaito loa hlung hoiah ang vah o. Tuisamphaw amrohaih vaithumto ka tongh moa vaito loa nazi pumphae palito thung tuiculi nuiah kamzawk.

²⁶ Vaih paroeai kholong caeh na-ah tui kalennawk hoi zit kaom kamqu kamcanawk to ka tongh moa kaimah ih caeng ampui Judah kaminawk hoi Gentel kaminawk khae hoi-ih zit kaom to ka tongh; vangpuinawk thungah zit kaom hmuennawk to ka tongh, taw thungah zit kaom hmuennawk to ka tongh, tuiculi nuiah zit kaom hmuennawk to ka tongh moa ampui kahoih ai khae hoi-ih zit kaom hmuennawk to ka tongh tuektuek.

²⁷ Toksak patanghaih apet aiah a oh moa iih boep aiah ka oh tuektuek; zok kamhlam hoi tui kanghae ah ka oh; caknaek ka boep ai hoiah ka oh tuektuek, a buep a kanhaih im tawn ai hoi khukbuenh tawn aiah ka oh tuektuek.

²⁸ Hmuen kalahnawk loa thui aiah Khrihca kangkomnawk taham ka dawnhaih mah nithokkruek ah hmuenzit batiah ang taeh.

²⁹ Kami longlongto tha a hnaem na-ah kai doeh tha ka hnaem toeng; longlongto zaehaih thungah amtim na-ah palung angpho hoiah ka koi.

³⁰ Kamlue nahaeloa ka thazokhaih kamtuengsakkung hmuennawk to kamlue haih han.

³¹ Angraeng Jesuh ih Ampa hoi Sithaw ahmin loa dungtasawk ah pakoehhaih oh na soe! Lok kamlai ai tito Angmah panoek.

³² Damaskas vang ah ka oh na-ah Aretas sangpahrang hlimah tok kasah ukkung angraeng mah vangpui khongkha ah kai naeh hanah palik to a suek.

³³ To-e sipae tapang kam-awh khae hoitoah tasabang ah tapom hoiah ang pakhrak o tathuk moa ka loih.