2 Korin 1 - Asang Khongso New Testament

¹ Sithaw koehhaih hoiah qoih ih Khrih Jesuh ih kawkpatoeh kai Paul hoi aicae ih amnauk Timote mah, Korin vang ih kaom Sithaw ih Khrihca kangkom hoi Akhaia prae boih thungih Sithaw ih kaminawk boiboih khaeah ca kang pat o.

² Aicae Ampa Sithaw hoi Angraeng Jesuh Khrih mah tahmenhaih hoi monghaih to paek o na soe.

Paul Mah Kawn Lok A Thuih

³ Aicae Angraeng Jesuh Khrih ih Ampa hoi Sithaw, tahmenhaih hoiah ka koi aicae Ampa, tiboih boih ah ngabomkung Sithaw khaeah kawn lok thui o si!

⁴ Aicae mah raihaih congca tongh o na-ah Angmah to ang bomh; topongah aicae mah Sithaw khae hoitoah hak o ih abomhaih to patohhaih hoiah raihaih a congca ka tongh kaminawk to aicae mah abom o thaih tih.

⁵ Khrih mah pauep ih patang khanghaih zetpui to aicae mah pauep o haih bom batiah Khrih ranghoiah aicae doeh Sithaw ih abomhaih thungah apa o toeng.

⁶ Kaicae mah patang khanghaih to pauep o nahaeloa nangcae abomhaih han hoi pahlonghaih hanih ni; kaicae hae abomhaih ka hak o nahaeloa nangcae doeh abomhaih to na hak o moa kaicae mah pauep ih patang khanghaih ih to palungsawkhaih hoiah pauep thai hanah tharahhaih to na hak o.

⁷ Topongah nangcae nuiah oepdoenghaih ka tawnh ih to natuekah ah anghuen vaih ai.

⁸ Naukamzanawk, Asia prae thungah raihaih ka tongh ih to kang thaihsak let han ka koeh. Kaicae nui ih hmuenzit ka om loa a lenh parai moa a zit phi pongah hingh han doeh ka dawn o ai boah.

⁹ Kaicae loa duek hanah lok takroek ih batiah ni ka dawn o boah. To-e hitiah ohhaih ih loa kaimahcae hoi kaimahcae to kangoep o aiah duekhaih thung hoitoah kang thawksak letkung Sithaw to kangoephaih o hanah ni.

¹⁰ Tobatih duekhaih zit-om thung hoitoah Sithaw mah ang pahlong o moa hmabang doeh ang pahlong bae tih. Khophoehhaih hoiah nang bom o pongah ang pahlong let bae tih, tiah Sithaw nuiah oepdoenghaih to ka tawnh o.

¹¹ Kaicae hanah kanoi paraiah kho na phoeh ihnawk to Sithaw mah ang pathim ueloa kaicae to tahamhoihhaih paek tih. Mi paroeai mah kaicae hanah kawn lok na thui pae o tih.

Paul Amsakhaih Ih Amkhraihaih

¹² Kasae kahoih panoekhaih ih mah kamnoek ta-ah ang panoeksak o ih loa hae ni: hi longnui ah ka hingh o na thungah, lokpui koek ah nangcae hoiah angpaeh o na-ah hae kami ciinghaih hoiah uk ih kami ah ka om ai. Sithaw tahmenhaih ih tharahhaih hoi Sithaw mah paek ih palungthin thoenghaih hoi palungthin toenghaih hoiah uk ih kami ah ni ka oh o.

¹³ Nangcae khaeah ca kang tarik o na-ah hae na kroek o thai ih hoi na thaih o thai ih khueh ni kang tarik o.

¹⁴ Vaihi loa nangcae mah ahap apai khueh ni nang panoek o vop, to-e ka koep ta-ah nang panoek o tih tito ka oep; aicae Angraeng Jesuh ih Ni ah loa nangcae mah kaicae hae namlue o haih ueloa kaicae mah doeh nangcae to kamlue o haih toeng tih.

¹⁵ Nangcae mah tahamhoihhaih vaihnetto na hak o thaih hanah nangcae khaeah kangzoh hmaloe hanah amsakhaih to ka tawnh tito hoihdak ta-ah ka panoek.

¹⁶ Kawmawtiah Masidonia ah caeh taroi ah nangcae khaeah kangzoh hanah kangcaeng moa kamlaem na-ah doeh nangcae khaeah kangkun let han kangcaeng; Judea prae bang ka caeh na-ah doeh nang bom o thai tih, tiah ka dawn.

¹⁷ Hitiah kamsak na-ah hae palung kangphae sang hoiah maw ka oh? Kamsak na-ah kaimah taham khueh poek moa, “Ue, ue,” tiah ka thuih pacoengah, “Na ai, na ai,” tiah kangpuen lilue kami ah maw ka oh?

¹⁸ Sithaw loa loktang lok ka thuikung ah a oh batiah nangcae khaeah lok kamaihhaih loa, “Ue” hoi “Na ai” kangbaeh puk na ai ni.

¹⁹ Kawmawtiah nangcae khaeah, Silas, Timote hoi kaimah taphong o ih Sithaw ih Capa Jesuh Khrih loa “Ue” tihoi “Na ai” tiah kangpuen lilue ah om ai. Anih loa “Ue” Sithaw ni.

²⁰ Kawmawtiah Jesuh Khrih loa Sithaw ih lok amaihhaih boiboih khaeah, “Ue” ah a oh. Topongah Jesuh Khrih ranghoiah Sithaw lensawkhaih hanah aicae mah “Amen” tiah thuih o.

²¹ Kaicae doehsoe, nangcae doehsoe, nawnto ah Khrih hoiah maeto ah oh o, tiah kacaipin ah kamnoeksak takung loa Sithaw Angmah hae ni. Sithaw mah Angmah iah oh hanah ang pahloe o lah boah.

²² Angmah iah coenghhaih ih to aicae nuiah mathaih to a suek boah moa aicae hanah ang suek pae ih boiboih to amahkhan hanah aicae palungthin thungah Cai Pakhra to ang suek pae.

²³ Hi lok panoekhaih bomkung hanah Sithaw to ka palawk, anih mah kai ih palungthin to panoek! Korin vang ah kangzoh han aiah ka poekhaih ih loa nangcae to nangcae taham ka dawn pongah ni.

²⁴ Nangcae mah kawbatih to maw taang o han tito akaa paek hanah ka zom ai; nangcae loa taanghaih pongah nang cak o tito ka panoek. Topongah nangcae hoiah toksak nawn ih loa nangcae palung anghoehaih han ih ni.