1 Timote 5 - Asang Khongso New Testament

Taangcanawk Nuiah Sak Hanih Tok

¹ Nongpa mitong milaengnawk to zoeh o hmah, ampa batih toengah lok kanaem hoiah apaeh o haih ah. Saning kanauk nongpanawk to loa naukamza batiah dawn oah.

² Saning kacoeh nongpuinawk to amno batih toengah dawn oloa saning kanauk nongpuinawk to loa palungthin thoenghaih hoiah tanuh batiah dawn oah.

³ Lumhmai tangtang angmah buengah kho ka sah to loa khangzahaih paek oah.

⁴ To-e lumhmai loa a canawk tiaibaloa a ca katunawk to tawnh nahaeloa atonawk mah hmaloe koek ah amno hoi ampa, tiaibaloa saeza nopanawk to angmahcae bokhaih bangih tawk mah nguek ih batiah khenzawn na soeloa pacah toeng na soe. Kawmawtiah ato loa Sithaw palung anghoehaih ih ni.

⁵ Angmah buengah kaom lumhmai, mimah doeh ka khen ka zawn ai loa Sithaw khueh to amoep, kho a phoeh toemoe moa abomhaih ih to qum thun a hnik.

⁶ To-e nawmhaih bangah kang paek lumhmai loa a hingh eloa ka dueh boah ni.

⁷ Lumhmainawk loa mimah doeh zaenethaih ih oh han aiah hi thuihtaekhaih ihnawk hae thui pae ah.

⁸ To-e ami doeh angmah ih sanauknawk to khenzawn ai nahaeloa, lokpui koek ah angmah ih imthungtako to khenzawn ai nahaeloa, taanghaih to hnukthung tak boah moa ka taang ainawk pongdoeh set aep.

⁹ Kawbatih lumhmai doeh saning quitarukto poeng ai nahaeloa lumhmai ahmin cazin thungah khrum o hmah.

¹⁰ Tokhueh aiah anih loa vaito khueh sava ka sah ah oh han oh.

¹¹ To-e saning kanauk lumhmainawk to lumhmai cazin thungah khrum o hmah; kawmawtiah takngan koehhaih ih to pauep thaih aiah sava sak let han koeh na-ah Khrih to hnukthung o tak toemtoem.

¹² Topongah anihcae loa atangsuek ih Khrih khaeah lok amaihhaih ih to a phraek o moa zaenethaih ih to a tongh o.

¹³ Im maeto pacoeng maeto amkaeh o tuektuek moa atue to atho kaom aiah boengsak o; ato ponghdoeh kasae aep loa, lok a pung o moa lokprong to a thuih o moa thuih koi ainawk to doeh a thuih o.

¹⁴ Topongah saning kanauk kue lumhmainawk loa sava sah o let na soeloa canawk doeh tawn o soeloa angmahcae im lawknawk to khenzawn o na soe, tihae ka koeh. Toti nahaeloa aicae misanawk mah aicae thuihsaehaih ih atue kahoih to hnuh o thaih mak ai.

¹⁵ Kawmawtiah lumhmai thoemto loa Setan hnukah baang hanah amlaem o let boah.

¹⁶ To-e Khrihca nongpui longlongto mah a imthungtako ah lumhmai to tawn nahaeloa Khrihca kangkom to hmuenzit paek han aiah anih mah a khenzawn han oh. Totih na-ah ni angmah buengah kaom lumhmai to Khrihca kangkom mah khenzawn thai tih.

¹⁷ Tok kahoih ka sah Khrihca kangkom kacoetanawk loa thatho to a let hnitto ah hak han ating tiah dawn oah; lokpui koek ah tamthang lok thuih hoi patukhaih ka zomnawk loa hak han ating aep.

¹⁸ Kawmawtiah Cabu Kacai mah, “Maitaw tae to cang atitsak na-ah tahmawh moem pae o hmah,” tiah a thui moa, “Toksahkung loa a toktho to hak han oh,” tiah a thuih.

¹⁹ Panoekkung saksi tamsi koek ah longhnetto om ai nahaeloa Khrihca kangkom kacoeta zaenethaih ih to tahngai pae o hmah.

²⁰ Zaehaih ka sah kaminawk boih to mipui hma-ah zoeh oah, toti na-ah ni mi kalah mah doeh zi o tih.

²¹ Sithaw hoi Khrih Jesuh hoi vanmi kacainawk hma-ah, kawbatih hmuen doeh na sak na-ah ami nuiah doeh mi mikhmai khethaih hoi koehhaih hloe ih om aiah hi thuihtaekhaih ihnawk hae pazui ah.

²² Angraeng ih toksak han-iah tahlanghaih ih sak han na-ah ami nuiah doeh karang ah ban koenghaih ih to paek halat hmah. Mi kalah mah sak ih zaehaih thungah apa bo hmah; kathoeng kacai ta-ah om ah.

²³ Tui khueh to nae hmah, na nat tuektuek pongtoah zok ka na to amding thaih kue hanah misurtui zetzet ta-ah nae ah.

²⁴ Kami thoemto zaehaih ih loa amtueng phaeng moa anihcae ih zaehaih loa angmahcae hma-ah taracaekhaih khaeah a phak hmaloe; to-e mi kalahnawk ih zaehaih loa hnukkhuem ah khueh amtueng.

²⁵ Tobatih toengtoeng ah hmuen kahoih sak ih to amtueng phaeng moa kamtueng ai vop mataeng to doeh hawk hmoek ah om thaih mak ai.