1 Timote 3 - Asang Khongso New Testament

Khrihca Kangkom Pahoikung

¹ “Ami doeh Khrihca kangkom pahoikung ah oh han ka koeh loa tok kahoih ka koeh ni,” ti ih hae

² Khrihca kangkom pahoikung loa zaehaih thuih han ka om ai, zu maeto khueh ka tawn, mu ka nae ai, aimah hoi aimah kang uk thaih, tuengcang ta-ah kho ka sah, angvin angva khenzawn thaih hoi mi ka patuk thaih ah oh han oh.

³ Mu paquih kami ah oh han om ai, kasaeng kami ah oh han om ai, to-e palung ka naem hoi angdaehhaih ka koeh kami ah oh han oh, phoisa tangka ka koeh lawnlai kami ah oh han om ai;

⁴ angmah imthungtako hoihdak ta-ah khenzawn thai moa a caanawk mah khangzahaih hoiah a lok ka tahngai pae kami ah oh han oh.

⁵ Kawmawtiah angmah imthungtako mataeng doeh khenzawn thai ai nahaeloa kawbangmaw Sithaw ih Khrihca kangkom to khenzawn thai tih?

⁶ Taanghaih bangah palung kanglaih kangtha ah oh han om ai, toti na-ah ni loa amoek mak ai ueloa Diabol batiah zaenet ah om mak ai.

⁷ Anih loa Khrihca kangkom ih tasabang kaminawk mah khangza ih kami ah oh han oh, totiah om ai nahaeloa ahmin sae ueloa Setan ih thang pongah aman ving tih.

Khrihca Kangkom Kacoetanawk

⁸ Khrihca kangkom pahoikung kacoetanawk loa tuinuenh kahoih ka tawn hoi palungthin kacai kami ah oh han oh; mu kanae lawnlai hoi tangka ka koeh lawnlai kami ah oh han om ai;

⁹ Taphong ih loktang lok taanghaih to kasae kahoih panoekhaih kacai hoiah kacak ta-ah patawn kami ah oh han oh.

¹⁰ Anihcae loa tanoek hmaloe han oh moa coekhaih ih om ai nahaeloa tok o na soe.

¹¹ A zunawk doehsoe tuinuenh kahoih kami ah oh han oh moa lokprong ka thuih ai kami ah oh han oh; mu ka nae ai kami ah oh han oh moa cungriboih ah kami katoeng ah oh han oh.

¹² Khrihca kangkom kacoeta loa a zu maeto khueh tawnh han oh moa angmah ih canawk hoi imthungtako to ka hoihdak ta-ah ka uk thaih kami ah oh han oh.

¹³ Tok kahoih ka sah Khrihca kangkom pahoikung kacoetanawk loa angdoethaih kahoih to hak o moa Khrih Jesuh taanghaih o ih kawng to misahoihhaih hoiah a thuih o thaih.

Loktamqu Kalen

¹⁴ Hi ca hae nangcae khaeah ka tarik na-ah akraa aiah kangzoh palang moa kang hnuk o han ka oepdoeng.

¹⁵ To-e ka kraa ving nahaeloa hi ca mah Sithaw imthungtako thungah kawbangmaw aicae mah khosak han oh tito panoeksak o tih. Sithaw imthungtako loa kahing Sithaw ih khrihca kangkom ah oh moa ato khrihca kangkom loa loktang lok homtung pui hoi ka tae ka moemkung ni.

¹⁶ Aicae bokhaih ih loktamqu hae natanto maw a lenh tito mimah doeh aek thai mak ai: Anih loa kami takbum ah amtueng, ahmaan tiah Pakhra mah amtuengsak moa, vanminawk mah a hnuk o. Anih kawng to caeng kaminawk boih khaeah thuih ah oh, longnui prae kruekah kaminawk mah a taang o moa, van ah lak tahang ah oh.