1 Thesalon 5 - Asang Khongso New Testament

Coengcoe Ah Om Oah

¹ Naukamzanawk, hi hmuennawk ka thok han atue aninawk kawng to nangcae khaeah tarik han aloe ai.

² Kawmawtiah Angraeng ih Ni loa aqum ih kamqu kangzo batiah angzo tih tito nangmahcae khaekhaeh mah hoihdak ta-ah na panoek o.

³ Kaminawk mah, “Cungriboih hae amdingrue moa a sueng boih,” a ti o nathuemah poek ai puiah amrohaih ih mah na daeng o tih. Nongpui mah naukzah han na-ih zoknat patanghaih ka pha batiah poek ai puiah na pha ueloa mita mah doeh loih o mak ai.

⁴ To-e naukamzanawk, nangcae loa vinghaih thungah na om o ai boah moa ato Ni mah kamqu batiah nangcae to tamqu tamqai ah na kae o mak ai.

⁵ Nangcae boih loa aanghaih thungah kaom kaminawk ni; athun ih kaminawk ah na oh o. Aicae loa aqum ih kaminawk na ai moa vinghaih ih kaminawk doeh na ai ni.

⁶ Topongah mi kalahnawk batiah iih qongh han om ai; hruek hanah oh moa palungcai han oh.

⁷ Kami loa aqum ah ni a iih o; aqum ah ni mu paquih o.

⁸ To-e aicae loa athun ih kaminawk ni, palung kaha ah oh han oh. Taanghaih hoi amlunghaih to puicaiphae batiah angbung o siloa aicae mah oepdoeng o ih pahlonghaih to sumlumuek batiah angmuek o si.

⁹ Sithaw mah a palungphuihaih ih to pauepsak hanah ang qoih ai, to-e aicae Angraeng Jesuh Khrih ranghoiah pahlonghaih hak hanah ni ang qoih.

¹⁰ Aicae Angraeng angzoh let na-ah kahing doehsoe, kadueh doehsoe, angmah hoiah oh nawn hanah aicae hanah a duek.

¹¹ Topongah vaihi ih na sak o batih toengah longto hoi longto tha angpaek oloa angbom anghlom oah.

Hnukkhuem Loktaqukhaih hoi Pringlanghaih

¹² Naukamzanawk, nangcae ih Khrihca hinghaih zaehoikung , thuitaekkung hoi nangcae salak thungah tok ka sahkungnawk to khangzahaih paek hanah kang pacae o.

¹³ Anihcae toksakhaih ih pongah khangzahaih kasang koek hoi amlunghaih ih to paek oah. Nangmahcae salak thungah angdaeh hoiah om oah.

¹⁴ Naukamzanawk, tha kasaenawk to acoehaih paek oah, palung kanauk kaminawk to misahoihsak oah, tha kahnaem kaminawk to abom oloa mi boih nuiah palungsawkhaih hoiah om oah, tiah kang pacae o.

¹⁵ Mi doeh hoihhaih ai ih to hoihhaih ai ih hoiah pathok o hmah, to-e longto hoi longto nuiah doehsoe, mi boiboih nuiah doehsoe, hoihhaih to sak hanah panki o toemoe ah.

¹⁶ Anghoe toemoe ah,

¹⁷ apet aiah khophoeh oah,

¹⁸ kawbatih angdoet hmuenh ah doehsoe kawn lok thui oah. Toto loa Khrih Jesuh hoiah angpaehhaih ranghoiah totiah sak hanah Sithaw mah ang koehhaih ih ni.

¹⁹ Cai Pakhra to pakaa o hmah;

²⁰ Pakhra mah tanawthaih hoiah thuih ih loknawk to tiadoeh dawn aiah om o hmah.

²¹ Tiboih boih to tanoek o hmaloe ah: kahoih to loa tapom oloa,

²² hmuen kahoih ai boih to loa yaetak oah.

²³ Aicae monghaih paekkung Sithaw mah cungriboih ah nangcae to thoengsak o na soeloa aicae Angraeng Jesuh Khrih angzoh let na-ah nangcae ih takbum boiboih, na pakhra, na hinghaih hoi na takbum to pakuem soeloa sakzaehaih ih thung hoiah loihsak na soe.

²⁴ Nangcae na kawkkung loa oepthoh pongah ato to sah tih.

²⁵ Naukamzanawk, kaicae hanih doeh kho na phoeh pae o toeng ah.

²⁶ Taangcanawk boiboih to mokhaih kacai hoiah angmok oah.

²⁷ Angraeng ih akaatawnhhaih hoiah taangcanawk boiboih khaeah hi ca hae kroek pae o hanah kang pacae o.

²⁸ Aicae Angraeng Jesuh Khrih tahmenhaih loa nangcae khaeah om na soe.