1 Thesalon 4 - Asang Khongso New Testament

Sithaw Palung Anghoesak Ih Hinghaih

¹ Aboenghaih koek ah naukamzanawk, Sithaw to palung anghoesak hanah kawbangmaw na hingh o han oh tito kai khaeah nam tuk o boah. Totiah na hingh o boah e ato ponghdoeh kamhlai ah na hingh o thaih aep hanah Angraeng Jesuh hmin hoiah kang pacae o.

² Kawmawtiah Angraeng Jesuh ih akaatawnhhaih hoiah nangcae khaeah kang patukhaih ihnawk to na panoek o.

³ Sithaw mah nangcae to kacai ah oh han hoi nongpui nongpa zaehaih sak han ai roeroe ah ang koeh.

⁴ Nongpa boih mah kacai ta hoi khangza ka om ah nangmahcae ih zu hoiah kho na sak o han oh;

⁵ Sithaw ka panoek ai lawkih kami batiah takngan koehhaih ih pazui hoiah hing o hmah.

⁶ Hi kawng pongah hae amimah doeh angmah ih Khrihca ampui to pazae hmah na soeloa hak hankoi to la pae hmah na soe. Hi hae kang thuih o zawh boah moa tobatih ka sah kaminawk loa Angraeng mah na raek o tih tihae kana dakah acoehaih kang paek o.

⁷ Sithaw mah nongpui nongpa zaehaih sak hanah ang kawk ai, kacai ah hing hanah ni ang kawk.

⁸ Topongah ami doeh hi patukhaih ih pazui han ka koeh ai loa kami ih lok to aek ai moa, Cai Pakhra ka paekkung Sithaw ih lok to ni a aek.

⁹ Nangmahcae taangca ampuinawk palunghaih han kawng to loa tarik han angaih ai boah. Nangmahcae roeroe to Sithaw mah longto hoi longto amlung o han oh tiah ang patuk o.

¹⁰ Tangtang ah nangcae loa Masidonia prae boih thungih kaom naukamzanawk boih nuiah totitoah na hingh o boah. Topongah naukamzanawk, ato ponghdoeh kamhlai ah na palung o aep hanah kang pacae o.

¹¹ Kang thuih o hmaloe ih batih toengah mong katae ta-ah khosak hanah angcaeng oloa nangmahcae ih toklaek pongah palungthin to paek oloa nangmahcae zokzae angkok angtang hanah toksah oah.

¹² Totitoah ka taang ai kaminawk ih khangzahaih to na hnuh o ueloa nangtoeng o ih boih to mita nuiah doeh pangtung han aloe mak ai.

Angraeng Angzohhaih

¹³ Naukamzanawk, oepdoenghaih ka tawn ai kaminawk batiah palung na set o han aiah kadueh tangcae kaminawk ih a kawng loktang to na panoek o hanah kang koeh o.

¹⁴ Jesuh loa a duek moa angthawklet tito ka taang o; topongah Jesuh taanghaih hoiah kadueh kaminawk loa Sithaw mah angmah khaeah Jesuh hoiah nawnto na la let tih tito ka taang o.

¹⁵ Vaihi kang patuk o ih hae Angraeng ih patukhaih ih ni: Angraeng angzoh let na-ah aicae kahing kaminawk mah kadueh kaminawk to hmaloe ah caeh o tak mak ai.

¹⁶ Lokpaek ih hangh tuen, vanminawk ih hangh tuen, Sithaw ih mongkah uengh tuen to amthang ueloa Angraeng loa vannui hoitoah anghum tih. Khrih taanghaih hoiah kadueh kaminawk to angthawk hmaloe tih;

¹⁷ topacoengah to tue nathuem ih kahing kanghmat aicae mah kangthawk hmaloenawk hoiah nawnto ah Angraeng to angqum hanah nilavan tamai thungah kangcu o han.

¹⁸ Topongah hi lok hoiah longto hoi longto tha ang paek oah.