1 Thesalon 2 - Asang Khongso New Testament

Thesalonika Vang Ah Paul Toksakhaih

¹ Naukamzanawk, nangcae khaeah kangzoh o hae azom ai tito nangmahcae khaeh mah na panoek o.

² Thesalonika vang ah kang phak o ai nahlanah Filipi vang ah natanto maw ang pacaekhlaek o moa tamhnuih tamsak lok ang sak haih o tito na panoek o. Aektaihhaih ih katingai om langla cadoehsoe angmah khae hoitoah kangzo Tamthang Kahoih to nangcae khaeah thuih hanah Sithaw mah misahoihhaih to ang paek o.

³ Nangcae khaeah kang thuih o ih hae pazaehaih ih doehsoe, palungthin kathoeng ai pongah doehsoe takung angsut ai; mi kawbatih doehsoe aling hanah kangcaeng o ai.

⁴ Totiah sak pongah loa, Sithaw mah thuihsak han ang koeh ih to ni loa ka thuih o lat, kawmawtiah Sithaw mah kaicae hae oepthok kami ah ang hnuk moa Tamthang Kahoih taphong hanah tok ang paek. Kaicae loa kami to palunghoihsak hanah ka zom o ai, to-e aicae ih palungthin tanoekkung Sithaw to palunghoihsak hanah ka panki o.

⁵ Nang panoek o batiah nangcae khaeah kangzoh o na-ah nangcae pakoeh saphawhaih ih lok to ka thui o ai, kaoe kaloe koehhaih ih to khuk hmoek hanih lok to doeh ka patoh o ai, Sithaw loa kaicae panoek haih bomkung ni.

⁶ Nangcae khae hoi-ih doehsoe, mi kalah khae hoi-ih doehsoe, ami kawbatih khae hoi-ih doehsoe, pakoehhaih ih to hak hanah ka zom o ai.

⁷ Khrih ih kawkpatoeh ah ka oh o batiah nangcae khaeah hak hankoi to kang hnik o thaih. To-e nangcae khaeah nawnto ka oh o na-ah amno mah a canawk to congdawn batiah palung ka naem ta-ah ka oh.

⁸ Nangcae to kang palung o phi pongah Sithaw khaeih Tamthang Kahoih khueh aiah kaimahcae hinghaih mataeng doeh paek hanah coengcoe ah ka oh o. Kang palung o phi ih kami ah na oh o!

⁹ Naukamzanawk, natanto tha kana ah maw tok ka sak o tito hoihdak ta-ah nang panoek o. Sithaw khaeih Tamthang Kahoih ka thuih o na-ah nangcae to raihaih tidoeh paek han aiah qum thun tok ka sak o.

¹⁰ Nangcae loa kaicae ih saksi ah oh moa tobatih toengah Sithaw doeh saksi ah oh toeng. Nangcae ka taang kaminawk nuiah kaicae ih palungthin suekhaih ning loa kathoeng, katoeng hoi pazaehaih ka om aiah a oh.

¹¹ Ampa mah a canawk to a congdawn ih batih toengah nangcae boih to kaicae mah kang congdawn o tito na panoek o.

¹² Nangcae to tha kang paek o, kang mongsak o moa angmah ih Poenghaih hoi lensawkhaih to abo thaih hanah nangcae ka kawkkung Sithaw to palung kanghoesak tuinuenh to tawnh hanah kang pacae o.

¹³ Topacoengah Sithaw khaeah kawn lok ka thuihhaih o toemoe ih ahlong kalah a oh vop. Nangcae khaeah Sithaw ih tamthang to kang sinh o na-ah kami ih lok batih na aiah, Sithaw ih lok tangtang batiah na thaih o moa na talawk o. Kawmawtiah Sithaw loa ka taangnawk nangcae thungah tok a sak.

¹⁴ Naukamzanawk, Judea prae thung Sithaw ih Khrihca kangkomnawk hoi toah ka om Khrih Jesuh ih kaminawk khaeah hmuen ka thok to nangcae khaeah doeh ang thohthuih toeng. Nangcae loa nangmahcae kaminawk khae hoi-ih pacaekhlaekhaih to na pauep o batiah anihcae doeh angmahcae Judah kaminawk khae hoi-ih patang khanghaih to pauep o.

¹⁵ Judah kaminawk loa Angraeng Jesuh hoi tahmanawk to paduek o moa aicae hae ang pacaekhlaek o. Natanto maw Sithaw to palung a setsak o! Natanto maw mi boiboih ih misa ah a oh o!

¹⁶ Anihcae loa Gentel kaminawk khaeah pahlonghaih tamthang lok to thuih hanih mataeng doeh pakaa hanah angcaeng o. Totitoah a sak o toemoe ih angmahcae ih zaehaih ihnawk boih to acungsak o moa vaihi hnukkhuem aloa Sithaw palungphuihaih ih to anihcae nuiah phak boah.

Paul Mah Caeh Let Han A Koeh

¹⁷ Nauk amzanawk, aicae palungthin thungah loa ampraek o ai eloa takbum bangah atue setta thung nangcae hoiah ampraek o han na-ah hae kang dawn o phi moa nangcae hoi angqum let hanah natanto maw ka zom!

¹⁸ Nangcae khaeah angzoh let han ka koeh o. Kaimah doeh nangcae khaeah angzoh hanah vaito cang ai kangcaeng, to-e Setan mah kaicae hae ang pakaa vingving.

¹⁹ Tangtang ah ti nahaeloa, mi kalah ami doeh na aiah, nangmahcae khaeh hae aicae Angraeng Jesuh angzoh let moa pazawkhaih hoiah a hma-ah angdoet o na-ah nangcae loa kaicae ih oepdoenghaih, anghoehaih hoi kamluehaih ah na om o tih.

²⁰ Nangcae hae kaicae ih kamluehaih hoi kanghoehaih ih ni.