1 Thesalon 1 - Asang Khongso New Testament

¹ Paul, Silas hoi Timote mah, Pa Sithaw hoi Angraeng Jesuh Khrih ih kami ah kaom Thesalonika vang ih Khrihca kangkom kaminawk khaeah ca kang pat o. Tahmenhaih hoi monghaih loa nangcae khaeah om na soe.

Thesalon Kaminawk Hinghaih hoi Taanghaih

² Kaicae mah nangcae boih hanah Sithaw khaeah kawn lok ka thuih o toemoe moa kho ka phoeh o kruekah nangcae kang poek o toemoe.

³ Kawmawtiah nangcae taanghaih to hinghaih pongah amtuengsakhaih ih kawng, amlunghaih na tawnh o pongah toksak pankihaih ih kawng hoi Angraeng Jesuh Khrih ah oepdoenghaih kangcak na tawnh o ih kawng to khophoehhaih hoiah Pa Sithaw khaeah ka thuih toemoe.

⁴ Naukamzanawk, nangcae to Sithaw mah ang palung o moa angmah ih kami ah oh hanah ang qoih o tito kang panoek o.

⁵ Kawmawtiah Tamthang Kahoih hae lok hoiah khueh aiah tharahhaih hoi Cai Pakhra hoiah doehsoe, loktang ah ohhaih to hoihdak ta-ah panoekhaih hoiah doehsoe, nangcae khaeah kang sinh o. Nangcae hoiah nawnto ka oh na-ah kawbangmaw kho ka sak o tito nang panoek o; nangmahcae ih hoihhaih hanah ni.

⁶ Kaicae hoi Angraeng to khenpatawt oah; patanghaih katingai na pauep o langla cadoehsoe Cai Pakhra khae hoitoah kangzo anghoehaih hoiah tamthang lok to na tapom o.

⁷ Topongah Masidonia hoi Akhaia prae ih kaom taangcanawk boiboih hanah khetpatawt kahoih ah na oh o.

⁸ Kawmawtiah Angraeng ih kawng tamthang to nangcae khae hoitoah Masidonia hoi Akhaia prae kruekah a phak khueh aiah nangcae ih Sithaw taanghaih ih kawng to ahmuenh kruekah amthang.

⁹ Nangcae to kangzoh o na-ah kaicae hae kawbangmaw nang talawk o tihoi, kraangthoi bokhaih thung hoitoah kawbangmaw Sithaw khaeah nang qoi o tihoi, katoeng hoi kahing Sithaw ih tok to kawbangmaw na sak o tito doeh ato kaminawk boih mah ang thuih o moa,

¹⁰ van bang hoi-ih a Capa kangzo han na zing o ih to doeh ang thuih o. A Capa Jesuh to duekhaih thung hoitoah angthawksak let ih hoi kangzo hankoi Sithaw palungphuihaih thung hoitoah pahlongkung ni.