1 Korin 9 - Asang Khongso New Testament

Kawkpatoehnawk Ih Taham hoi Tok

¹ Kai loa kaloih kami ah ka om ai maw? Kawkpatoeh ka om ai maw? Aicae Angraeng Jesuh to ka hnuk boah na ai maw? Nangcae loa Angraeng hanah tok ka sak ih aquih athaih na ai maw?

² Mi kalah mah kawkpatoeh batiah na tapom o ai langla cadoeh nangcae mah loa nang tapom o tangtang! Nangcae loa Angraeng hoiah angpaehhaih ih hinghaih ranghoiah kawkpatoeh ah ka oh tihae amtuengsak kung loa nangcae to ni.

³ Minawk mah ang thuihsae o na-ah kai kangtangh kacaahaih ih loa hitiah ni:

⁴ Tok ka sak taham ah tui hoi caknaek hae ka hnuk toeng hanah tueng ai maw?

⁵ Kawkpatoeh kalahnawk hoi Angraeng ih amnauknawk hoi Piter mah kholong caeh na-ah angmahcae ih zunawk to ahoih o batiah kai doehsoe anihcae sakhaih ih to khetpatawthaih hoiah kholong ka caeh na-ah Khrihca zu to ka caeh haih thai toeng mak ai maw?

⁶ Barnabas hoi kai khueh hae maw kaimah hnit zokzae angkokhaih hanih ah toksak han ka om?

⁷ Ami risa to maw angmah ih phoisa tangka pasaenghaih hoiah risa to ka sah vaih? Ami lawksahkung to maw angmah dum takha thungih misur thaih ka caa aiah ka om? Ami tuu congkung to maw angmah ih tuu khae hoitoah hnuk ih tahnutui ka nae aiah ka om?

⁸ Hinawk hae nithokkruek ka tongh ih hoitoah khueh patahhaih ih ka thui ai, kawmawtiah Tawklok mah doeh hitih toengah ni a thuih.

⁹ Mosi ih Tawklok thungah, “Maitaw tae to cang a titsak hanah patoh na-ah tahmawh to moem pae hmah,” tiah a oh. Hitiah thuih na-ah Sithaw mah maitaw tae taham to maw dawn moa a thuih?

¹⁰ Ato to a thuih na-ah aicae hae thuih koehhaih ih na ai maw? Ato loa aicae hanah tarik ih ni. Lekok ka tok hoi cang ka aat loa cang hak hanih oepdoenghaih hoiah a tok o.

¹¹ Nangcae salak thungah kaicae mah pakhra cangti to ka haeh o. Nangcae khaeih longnui hmuenmaenawk to ka aah o nahaeloa pop lawnlai na ti o maw?

¹² Mi kalahnawk mah nangcae khaeih hibatih hak hanah oepdoenghaih ih tawn o nahaeloa kaicae loa ka pop aep ah oepdoeng hanah oh na ai maw? To-e kaicae mah loa totiah sak han ka koeh o ai. Kaicae loa Tamthang Kahoih Khrih kawng pongah pakaakung oh han aiah cungriboih to pauep ah ka pauep o lat.

¹³ Tempal ah tok ka sahkungnawk loa Tempal khae hoi-ih caknaek to a hak o moa bokting pongah angbawnhaih ih ka paekkungnawk mah doeh angbawnhaih moi pongih angmahcae taham to a hak o tito na panoek o king.

¹⁴ Tobatih toengah tamthang lok ka thuikungnawk doeh tamthang lok thuihhaih hoiah zok angkok han a oh tihae Angraeng ih lokpaek ni.

¹⁵ To-e kai loa hibatih hmuen ka hak hankoi hae maeto ta boe doeh ka la ai, vaihi ca kang pat o ih hae doeh ato batih hmuen ka hak hankoi to ka hnik koeh pongah na ai ni. Totiah ka hnik pongloa duek doeh ka koeh kue! Kamluehaih ih kahmaan hae mita mah doeh lok romram ah coenghsak han ka koeh ai!

¹⁶ Tamthang lok ka thuih pongah kamluehaih thaih ih ka tawn ai. Thuih tangtang nahaeloa, lokpaek ah oh pongah ka thuih. Tamthang lok ka thui ai nahaeloa kawkruk maw kai hanah hmalam khobing tih!

¹⁷ Kawmawtiah ka tok hae kaimah ih koeh qoihhaih hoiah ka sak nahaeloa toktho hak hanah ka oepdoenghaih ka tawn thai tih; to-e ka sak hanih tok roeroe batiah ni ka sak, kawmawtiah hi tok hae sak hanah Sithaw mah ang paek ih ni.

¹⁸ Totih soehaeloa toktho timaw ka hak? Ka hak ih loa atho hoiaiah Tamthang Kahoih thuih thaih ih hoi toktho hak aiah tamthang lok hanih ka tok ih hae ni.

¹⁹ Kai loa kaloih kami ni, mita ih misong ah doeh ka om ai; to-e angcoeng thaih thungah kami kapop ah lak thai hanah mi boih ih misong ah kaimah hoi kaimah hae kang coeng.

²⁰ Judah kaminawk khaeah tok ka sak nathuemah anihcae to ka lak thaih hanah Judah kami batih toengah ka oh; Mosi ih Tawklok thungah ka om ai boah e Tawklok thungah kaom kaminawk khaeah tok ka sak na-ah anihcae to ka lak thaih hanah Tawklok thungah ka hing batih toengah ka oh.

²¹ Tobatih toengah Gentel kaminawk khaeah tok ka sak na-ah anihcae to ka lak thaih hanah Judah Tawklok ka pazui ai Gentel kami batih toengah ka oh. Hitiah ka oh hae Sithaw tawk ka pazui ai tihaih ih na ai ni; Khrih ih tawk thungah ni ka oh.

²² Taanghaih tha ka zok kaminawk salak thungah anihcae to ka lak thaih hanah angmahcae batih toengah ka oh. Topongah kawbatih ninglam bang hoitoah doehsoe anihcae to ka pahlong thaih hanah mi boiboih khaeah a coenghhaih o rip ih batiah ka oh.

²³ Tamthang kahoih tahamhoihhaih ih to pazet patoeng hanah kai loa tamthang lok hanih ah hi boiboih hae ka sak.

²⁴ Cawnh kang noek paroeainawk loa angnoek na-ah apa o toeng, to-e longto khueh mah ni zomtho to a hak. Topongah zomtho hak hanah cawn oah.

²⁵ Angnoekhaih poi ah ka paa han kami boih loa amtuk o na-ah tawk to kacak ah pazui o. Totiah sakhaih o ih loa ka zaem thaikoi apawk takae ih lumuek to hak koeh pongah ni; to-e aicae loa ka zaem thai ai kangcak poe apawk lumuek to hak hanah sak o.

²⁶ Topongah ni kai loa patoephaih ih bangah to katoeng ta-ah ka cawnh poe. Kai loa ban tamhluem hoiah takhi ka thongkung romram batiah ka om ai.

²⁷ Kai loa minawk to angnoekhaih poi ah thum hanah pacae pacoengah kaimah hae tahnawng sut ah ka oh moeng han aiah kaimah ih takbum hae kang thong kang raek moa kang uk kaang.