1 Korin 6 - Asang Khongso New Testament

Khrihca Tazacoihaih

¹ Nangcae thungah Khrihca longto hoi longto nang zoeh nang aek o na-ah nangcae ih lokpunghaih to Sithaw kaminawk khaeah lokcaeksak aiah kawbangmaw longnui kami lokcaek kungnawk khaeah na caeh o haih vam?

² Longnui hae Sithaw kaminawk mah lokcaek tih tito na panoek o ai maw? Nangcae loa longnui mataeng doeh lok ka caekkung ah na oh o nahaeloa lokpunghaih tetta tanawk to na takroek o thaih ai maw?

³ Aicae mah vanminawk mataeng doeh lokcaek o tih tihae na panoek o ai maw? Totiah oh pongah hi longnui hing thungih hmuennawk taoe loa natanto maw lok takroek o aep han oh!

⁴ Ato batih hmuennawk to a oh na-ah Khrihca kangkom thungah kaom ai kaminawk to lok na caeksak o han maw?

⁵ Nangcae hanah azat oh parai! Khrihca naukamza salakah lokpunghaih ih ka takroek thai kacing kami longto ta loa na om o khaeh tih.

⁶ Khrihca longto hoi longto taza nang coi o moa ka taangca ainawk to lok na takroeksak o taitu!

⁷ Nangmahcae salak thungah lokpunghaih na tawnhhaih o ih mah na vawt o phi tito amtuengsak. Na sak pazae o phi langla cadoehsoe nangcae hanih loa a hoih kue na ai maw? Nangcae ih hmuen to na lomh pae o langla cadoehsoe nangcae hanih loa a hoih kue na ai maw?

⁸ Nangcae loa longto hoi longto kasae na sak o lat moa nangmahcae naukamza khaekhaeh ih hmuen mataeng doeh na lomh pae o!

⁹ Kami kahoih ai loa Sithaw Poenghaih to a toep thai mak ai tito hoihdak ta-ah na panoek o. Nangmahcae hoi nangmahcae o angling o hmah; nongpui nongpa zaehaih ka sahnawk, kraangthoi ka boknawk, pazang ka sah ka sinnawk, nongpui hoi nongpui zaehaih ka sahnawk, nongpa hoi nongpa zaehaih ka sahnawk,

¹⁰ kamqunawk, kaoe kaloe ka koehnawk, mu paquinawk, mi ka prongnawk hoi mi ih vawnsai ka lom paenawk loa Sithaw Poenghaih a toep o thaih mak ai.

¹¹ Nangcae thungih thoemto loa tobatih kami ah na oh o. To-e nangcae loa zaehaih thung hoitoah thoengcaisak ah na oh o boah; Sithaw khaeah tahlang ih kami ah na oh o boah; Angraeng Jesuh Khrih hoi aicae Sithaw ih Pakhra ranghoiah Sithaw mah kami katoeng ah ang suek o boah.

Sithaw Lensawkhaih Han Takbum Patoh Oh

¹² Thoemto kami mah, “Tiboih boih hae sak hanah paong ah oh,” na ti o. Ahlong, paong ah oh; to-e cungriboih hae nang hanah hoih ai. Kai doehsoe, “Tiboih boih sak thai hanah paong ah ka oh,” tiah ka thuih thai toeng, to-e kawbatih ih misong ah doeh kang paek mak ai.

¹³ Kalah thoemto mah, “Caknaek loa zok hanih ni, zok loa caknaek hanih ni,” tiah na thui o tih. Ahlong; ato hnetto to Sithaw mah boengsak qoiqai tih. Takbum loa nongpui nongpa zaesakhaih hanah patoh hanih na ai ni, Angraeng ih toksakhaih hanah patoh hanih ni; Angraeng mah doehsoe takbum angtoenghaih ih to a paek pae toengh.

¹⁴ Sithaw mah Angraeng to duekhaih thung hoitoah angthawksak let moa aicae doeh anih mah a tharahhaih hoiah angthawksak let toeng tih.

¹⁵ Nangcae ih takbum loa Khrih ih takbum kampraek ni tito na panoek o. Khrih ih takbum kampraek to ka lak moa kangzaw nongpui ih takbum kampraek ah ka sak han maw? Sah mak ai roeroe!

¹⁶ Tiaibaloa nongpa longto to kangzaw nongpui hoiah angkom na-ah ato nongpui hoiah takbum maeto ah coengh tito na panoek o ai maw? Cabu Kacai mah, “Hnetto to takbum maeto ah coengh boah,” tiah kamnoek ta-ah a thuih.

¹⁷ To-e ami doeh Angraeng hoiah kangpaeh loa anih hoiah pakhra bangah maeto ah oh.

¹⁸ Nongpui nongpa zaesakhaih ih to yaetak o ving ah. Zaehaih kalah kalah mah loa kami hae paro parai ai; to-e nongpui nongpa zaesakhaih ih ka sah loa angmah ih takbum nuiah to zaehaih a sak.

¹⁹ Nangcae ih takbum loa nangmahcae thungah kaom Sithaw mah paek ih Cai Pakhra ih tempal ni tito na panoek o ai maw? Nangcae loa nangmahcae ih na ai ni, Sithaw ih ni;

²⁰ nangcae loa atho hoiah qanh ih boah ni. Topongah nangcae ih takbum to Sithaw lensawkhaih hanah patoh oah.