1 Korin 3 - Asang Khongso New Testament

Sithaw Ih Tamtoehnawk

¹ Naukamzanawk, thuih tangtang nahaeloa Pakhra ka tawn kaminawk khaeah ka thuih batiah nangcae khaeah ka thuii thai ai; hi longnui ih kami batiah hoi Khrihca taanghaih bangah naukta batiah nangcae khaeah ka thuih hanah oh.

² Nangcae loa buh kaham to na caa o thaih ai vop pongah tahnutui hoiah kang kok han angaih vop. Vaihi mataeng doeh buh kaham to na caa o thaih ai vop,

³ kawmawtiah hi longnui kaminawk ih hinghaih tawk batih toengah vaihi khoekto na hingh o vop.

⁴ Nangcae salak thungah uthaih ih to a oh moa longto hoi longto nang zoeh nang aek o na-ah hi longnui ih kami ah na oh o moa hi longnui ih tawk batiah na hingh o tito amtueng na ai maw?

⁵ Apollo loa ami maw? Paul loa ami maw? Kaicae loa Sithaw ih tamtoeh ah oh o moa nangcae to taangca ah coenghsak hanah pahoi kungnawk ni. Kaicae longto rip hae Angraeng mah paek ih tok to ni sak o.

⁶ Kaimah atimu to ka patit, Apollo mah tui a bawh, to-e ka qoengsakkung loa Sithaw ni.

⁷ Atimu ka pati kami hoi tui ka bawh kami loa lokpui na ai ni. Lokpui koek loa Sithaw ni, kawmawtiah Angmah ni loa atimu kamprawk to a qoenghsak.

⁸ Atimu ka patikung hoi tui ka bawhkung to lahhaih ih tidoeh om ai; Sithaw mah longto rip to tok a sak o ih batih toengah toktho to paek tih.

⁹ Kawmawtiah kaicae loa Sithaw han-iah toksah haih nawn ah ka oh o moa nangcae loa Sithaw ih lawk ah na oh o. Nangcae loa Sithaw ih im ah doeh na oh o.

¹⁰ Sithaw mah ang paek ih langrae patohhaih hoiah im sahkung kakop parai batiah amtonghaih imtakung ka pahung moa ato nuiah mi kalah mah a sak. To-e kawbangmaw a sak o tito mi boih mah acoe rip han oh.

¹¹ Kawmawtiah Sithaw mah Jesuh Khrih to imtakung maeto khueh ah oh hanah a suek boah moa mi kalah mah imtakung to pahung o bae thai mak ai boah.

¹² Thoemto mah ato imtakung sak ih nuiah sui tiaibaloa maku tiaibaloa atho kaom hlungnawk to patoh o tih; mi kalahnawk mah thingphaek tiaibaloa padi tiaibaloa cangphaeh to patoh o tih.

¹³ A sak o rip ih tok to kawbatih maw a oh tito Khrih Ni ah amtuengsak let tih. Kawmawtiah ato Ni ah hmai kana mah longto rip ih toksakhaih to amtuengsak tih; hmai kana mah a toksakhaih o ih to tanoek rip ueloa kawbangmaw a oh tangtang tito hmai kana mah amtuengsak tih.

¹⁴ Imtakung nuiah sak ih im to hmai mah paro thai ai nahaeloa im sahkung loa a toktho to hak tih.

¹⁵ To-e ami doeh a sak ih im to kaang boih nahaeloa ka sahkung loa sung tih; to-e angmah loa hmai kana thung hoitoah a loih ih batiah a hinghaih to pahlong ah om tih.

¹⁶ Nangcae loa Sithaw ih tempal ah na oh o moa Sithaw ih Pakhra to nangcae thungah oh tito hoihdak ta-ah na panoek o!

¹⁷ Topongah ami doeh Sithaw ih tempal to paro nahaeloa Sithaw mah anih to paro toeng tih. Kawmawtiah Sithaw ih tempal loa cai moa nangmahcae roeroe hae angmah ih tempal ni.

¹⁸ Ami doeh angmah hoi angmah to angling hmah na soe. Ami doeh nangcae salak thungah hi longnui ih tawk batih toengah ka cing tiah dawn nahaeloa kami kacing tangtang ah oh hanah kami kamthu ah coeng na soe.

¹⁹ Kawmawtiah longnui mah ciinghaih a ti ih loa Sithaw mikhnuk ah loa amthuhaih iah oh. Cabu Kacai mah, “Kami kacingnawk loa a ciinghaih o ih hoiah Sithaw mah amansak,” tiah a thuih.

²⁰ Topacoengah Cabu Kacai kalah mah, “Kami kacingnawk ih poekdawnhaih ih loa atho om ai tito Angraeng mah panoek,” tiah a thuih bae.

²¹ Topongah ami doeh kami mah sak thai ih kawng pongah amoek hmah na soe. Thuih tangtang nahaeloa cungriboih hae nangcae ih ni;

²² Paul doehsoe, Apollo doehsoe, Piter doehsoe, hi longnui doehsoe, hinghaih duekhaih doehsoe, vaihi tue hoi hmabang tue doehsoe, nangcae ih boih ni.

²³ Nangcae loa Khrih iah na oh o moa Khrih loa Sithaw ih ni.