1 Korin 16 - Asang Khongso New Testament

Taangca Tingtoinawk Han Hmuenpaek

¹ Judea prae ih kaom Sithaw kaminawk abomhaih hanih tangka cong han kawng ca nang tarik o ih kawng pongah to, Galati prae ih Khrihca kangkomnawk khaeah sak hanah ka thuih pae ih batiah sah o ah.

² Yahni kruekah nangcae mah na hak o ih to tamsi hoi kapop taring ah tangka to cong o toemoe aloa patung o roeh ah, totibaloa kangzoh na-ah tangka cong hanah angaih mak ai boah.

³ Kangzoh pacoengah nangcae mah na qoih o ih kaminawk khaeah lokpathaih ca to ka tarik moa anihcae mah nangcae ih abomhaih hmuenpaek to thak hanah Jerusalem ah ka patoeh han.

⁴ Ka caeh to kai hanah atho om nahaeloa anihcae loa kai hoiah nawnto caeh o thai tih.

Paul ih Amsakhaih

⁵ Masidonia prae thung hoitoah ka caeh hanah oh pongah totiah ka caeh pacoengah nangcae khaeah kangzoh let han.

⁶ Nangcae khaeah ka sawk roem ah ka patoh han; siktue nathung hae nangcae hoiah nawnto om kalang tih mue; topacoeng aloa kholong ka caeh hanih ahmuenh kruekah ka caeh thai hanah nang bom o thai tih, tiah ka oep.

⁷ Kholong caeh taroiah angqum kap romram han loa ka koeh ai; Sithaw mah koehhaih ih om nahaeloa nangcae khaeah atue kasawk ah patoh han ka koeh.

⁸ Efesa vang ah Pentikos ni karoekto ka oh han.

⁹ Kai ka aekkungnawk a oh o mang e hiah hae atho kaom ah toksak thaihaih ih atue kahoih parai to a oh.

¹⁰ Nangcae khaeah Timote to angzo nahaeloa hoihdak ta-ah khenzawn oah, kawmawtiah anih loa kai batiah Angraeng hanah toksahkung ni.

¹¹ Mita mah doeh anih to khensae o hmah, kamong ta-ah kai khaeah ang phak thai let hanah kholong a caehhaih hanih pongah abom pae oah; kawmawtiah kai hoi taangca naukamzanawk mah anih to ka zing o kong boah.

¹² Aicae amnauk Apollo kawng pongah taangca kalahnawk hoiah nangcae khaeah angzoh hanah tha ka paek tuektuek, to-e vaihi loa angcoeng thaih mak ai vop tiah a dawn. A kong na-ah angzo tih hmang.

Aboenghaih Lok

¹³ Acoe aha oah, taanghaih pongah kacak ah angdoe oah, misahoih o aloa tha omsak oah.

¹⁴ Na sak o ih hmuen boiboih to amlunghaih hoiah sah oah.

¹⁵ Stefanas hoi a imthungtako kawng to loa na panoek o; anihcae loa Akhaia prae thungah Khrihca ah ka om hmaloe koek ah oh moa Sithaw kaminawk hanah toksak han kangpaek kaminawk ni. Naukamzanawk,

¹⁶ tobatih kaminawk hoi angmahcae hoiah tok ka sah nawn kaminawk ih zaehoihaih to pazui oah.

¹⁷ Stefanas, Fortunatas hoi Akhaia cae to ang phak pongah palung kanghoe parai; nangcae ka om ai doeh ka panoek parai ai.

¹⁸ Nangcae to palung anghoesak o batiah kai doeh palung anghoesak o toeng. Anihcae batih kami hae pakoeh han krak.

¹⁹ Asia prae ih Khrihca kangkomnawk mah nangcae to ban ang sinh o; Aquila hoi Priskilla hnit hoi anih hnit im ah kacu Khrihca kangkomnawk mah Khrihca amlunghaih hoiah ban ang sinh o.

²⁰ Hae ih taangcanawk boiboih mah ban ang sinh o. Longto hoi longto kacai mokhaih hoiah ban angsinh oah.

²¹ Kai Paul mah bansinhhaih ca hae kaimah ih ban khaekhaeh hoiah ka tarik.

²² Ami doeh Angraeng ka palung ai to loa a nuiah tangoenghaih oh na soe! Marana tha: Aicae Angraeng, angzo laiah!

²³ Angraeng Jesuh ih tahmenhaih loa nangcae khaeah om na soe.

²⁴ Khrih Jesuh ranghoiah kai palunghaih hae nangcae boih nuiah oh na soe. Amen.