1 Korin 12 - Asang Khongso New Testament

Pakhra Ih Langraenawk

¹ Naukamzanawk, Cai Pakhra mah paek ih langrae kawng hoiah kangpaeh ah ca nang tarik o ih kawng pongah loktang lok to panoeksak han kang koeh o.

² Nangcae loa taangca ah na om o ai nathuemah loklam na tahmang o moa hinghaih ka tawn ai kraang kathoinawk to na bok o tito na panoek o.

³ Ami doeh Cai Pakhra mah zaehoih ih kami mah loa, “Jesuh to tangoeng ah oh na soe,” tiah thui thai ai moa Cai Pakhra mah zaehoi ai ih kami mah loa, “Jesuh loa Angraeng ni,” tiah thui o thai mak ai.

⁴ Pakhra langrae hae kalah kalah a oh, to-e ato langraenawk boih ka paekkung loa Pakhra Angmah toengtoeng to ni.

⁵ Sithaw toksakhaih ih kalah kalah a oh, to-e aicae mah toksak pae o ih Angraeng loa maeto khueh ni.

⁶ Toksak thaihaih ih kalah kalah a oh, to-e mi boiboih hanah angmahcae kangngoeng ripah sak thaihaih ih ka paekkung loa Sithaw Angmah toengtoeng ni.

⁷ Sithaw mah a ohhaih ih loa mi boih hoihhaih hanah alam maemaeto hoiah longlongto khaeah amtueng rip.

⁸ Pakhra loa kami longto khaeah ciinghaih hoiah lokthuih thai ih to a paek moa kalah longto khaeah ato Pakhra toengtoeng to mah panoekhaih hoiah lokthuih thai ih to a paek.

⁹ Ato Pakhra toengtoeng mah kami longto khaeah taanghaih a paek moa kalah longto khaeah ngoina hoihsak thaihaih ih to a paek.

¹⁰ Pakhra mah kami longto khaeah dawnrai hmuennawk sak thaihaih ih a paek moa kalah longto khaeah Sithaw lok thuih thaihaih ih to a paek; kalah longto khaeah Pakhra mah paek ih langrae hoi langrae ainawk to pahloe thaihaih ih to a paek. Tobatih toengah kami longto khaeah panoek ai lok apaeh thaihaih ih to a paek moa kalah longto khaeah ato panoek ai lok leh thaihaih ih to a paek.

¹¹ To-e hi boiboih ka paekkung loa Pakhra maeto khueh ni. A koeh batiah langrae kalah kalah to kami longlongto khaeah a paek rip.

Takbum Maeto Kampraek Zetpui

¹² Khrih loa kampraek zetpui ka tawn takbum maeto batih ni a oh; Takbum loa maeto khueh e tak kampraek loa zetpui a oh.

¹³ Tobatih toengah aicae hae doeh Judah kami hoi Gentel kami, kaloih kami hoi misong tiah oh langla cadoehsoe ato takbum maeto thungah to Pakhra maeto hoiah baptisma ka la kami ah oh o moa Pakhra maeto to naek sungqum hanah ang paek ah oh.

¹⁴ Takbum loa tak kampraek maeto khueh to tawn ai, kampraek a oh mang.

¹⁵ Kaimah, “Kai loa ban ah ka om ai pongah takbum ih na ai ni,” tiah thui nahaeloa, totiah a thuih pongah takbum ih tak kampraek ah om mak ai tangtang han boah maw?

¹⁶ Naa mah, “Kai loa mik ah ka om ai pongah takbum thungah ka paa ai,” tiah thui nahaeloa, totiah a thuih pongah takbum ih tak kampraek ah om ai tangtang han boah maw?

¹⁷ Takbum boih hae mik ah om king nahaeloa kawbangmaw lok to thaih thai tih? Naa khueh ah om boih nahaeloa kawbangmaw ahmui to thaih thai tih?

¹⁸ To-e vaihi ih ohhaih taring batih toengah, Sithaw mah tak kampraek kalah kalah ah a ohhaih hanih ahmuenh boih ah Angmah a koeh ih batiah a suek king.

¹⁹ Takbum hae tak kampraek maeto khueh ah om nahaeloa takbum ah om thaih mak ai!

²⁰ To-e vaihi ih ohhaih ning aloa tak tanghang a oh mang eloa takbum loa maeto khueh ni.

²¹ Topongah mik mah, “Nang loa kangtoeng ai,” tiah ban khaeah to a naa thaih mak ai. Lu mah doeh khok khaeah to, “Nang kangtoeng ai,” tiah a naa thaih mak ai.

²² Thuih tangtang nahaeloa takbum pongih tak kampraek tha ka zok koek pataeng doeh apa aialoa angcoeng thaih ai roeroe.

²³ Lokpui parai aiah poek o ih tak kampraek to hoihdak ta-ah khetzawn moa takbum nui ih khet kahoih ai tak kampraek to hoihdak ta-ah khetzawn o toemtoem.

²⁴ Khet kahoih ah kaom tak kampraeknawk to loa khetzawn han angaih ai. Khangza hankoi kaom tak tanghang mah khangzahaih ih to a hnuk aep hanah Sithaw mah totiah to a sak.

²⁵ Topongah takbum pongah hae tapraekhaih om ai, to-e kampraek kalah kalahnawk mah maeto hoi maeto angkhet angzawnhaih tawnh o boih.

²⁶ Takbum pongih tak kampraek maeto to kana panoek nahaeloa tak kampraek kalahnawk boih doeh a nat haih bom toeng; tak kampraek maeto to pakoehhaih ih hnuh nahaeloa tak kampraek kalahnawk boih mah doeh anghoe o haih bom toeng.

²⁷ Nangcae boih loa Khrih ih takbum ah na oh o moa longto rip hae takbum ih tak kampraek ah ni na oh o.

²⁸ Khrihca kangkom thungah Sithaw mah kami to angmah a ohhaih hmuen hanih ripah to a suek boih: hmaloe koek ah, kawkpatoehnawk to a suek, a pahnithaih ah tahmanawk, a pathumhaih ah patukkungnawk; topacoengah dawnrai hmuen ka sahkungnawk, ngoina hoihsak thaihaih ih paek ah kaom kaminawk, tiaibaloa mi kalah abom thaihaih ih paek ah kaom kaminawk, tiaibaloa panoek ai lok apaeh thaihaih ih paek ah kaom kaminawk to ni.

²⁹ Anihcae boih to kawkpatoeh ah om o boih ai, tahma ah om o boih ai, patukkung ah om o boih ai. Mi boih mah dawnrai hmuensak thaihaih ih to tawn o boih ai,

³⁰ nathaih hoihsakkung ah om o boih ai; panoek ai lok ka paekung ah doeh om o boih ai moa totiah apaeh ih lok ka lehkung ah doeh om o boih ai.

³¹ Topongah lokpui kueah kaom langraenawk pongah palungthin to suem oah. Topacoengah hinawk boih thungah kahoih koek loa ahlimbang ih kang thuih hanih hae ni.