1 Korin 11 - Asang Khongso New Testament

¹ Topongah kai loa Khrih ih hingh tuinuenh to ka khetpatawt batiah nangcae doeh kai hae na khenpatawt oah.

Lukhuk Han Kawng

² Nangcae loa kai hae nang pahnet o ai roe moa kang paek o patoeng ih kang patukhaih ihnawk to na pazui o pongah kang pakoeh o.

³ To-e panoeksak han kang koeh o ih loa: nongpa boih ih lu loa Khrih ni, a zu ih lu loa sava moa Khrih ih lu loa Sithaw ni, tihae ni.

⁴ Topongah mipui Sithaw bok na-ah a lu a khuk ih hoiah khophoeh tiaibaloa Sithaw lok ka taphong nongpa loa Khrih azat phawsakkung ni.

⁵ To-e mipui Sithaw bok na-ah lukhuk aiah kho ka phoeh, tiaibaloa Sithaw lok ka taphong nongpui loa a sava azat phawsakkung ni; tobatih nongpui loa sam ka aat muilum nongpui hoiah lahhaih ih tidoeh om ai.

⁶ Nongpui loa a lu to khuk ai nahaeloa sam to aat ngala na soe. Nongpui hanih loa lu muilum ah sam aah hoi sam boeng king hae azat oh parai pongah a lu to khuk na soe.

⁷ Nongpa loa a lu to khuk han aloe ai, kawmawtiah anih mah Sithaw ih tungkraang hoi lensawkhaih kamtuengsakkung ni;

⁸ kawmawtiah nongpa loa nongpui khae hoitoah sak ih na ai ni, nongpui to ni nongpa khae hoi-ih sak ah oh.

⁹ Nongpa loa nongpui han-iah sak ih na ai ni, nongpui ni loa nongpa han-iah sak ah oh.

¹⁰ Topongah vanminawk kawng pongah nongpui loa sava ih akaatawnhhaih thungah a oh tito amtuengsak hanah a lu to khuk han oh.

¹¹ To-e Angraeng thungah aicae hinghaih ih pongah nongpui loa angmah hmawk kalah ah oh han om ai moa nongpa doeh angmah kalah ah oh han om ai.

¹² Kawmawtiah nongpui loa nongpa khae hoi-ih sak ah oh batih toengah nongpa doeh nongpui thung hoitoah tacawt ah oh toeng; cungriboih ka omsakkung loa Sithaw ni.

¹³ Mipui Sithaw bok na-ah lukhuk aiah nongpui mah Sithaw khaeah khophoeh hae hoih hoi hoih ai to nangmahcae hoi nangmahcae to dawn o noek ah.

¹⁴ Longnui hmuen ohhaih ning mah hae nongpa mah sam kasawk pahlung hae azat thoh parai tihae amtuengsak,

¹⁵ to-e nongpui hanih aloa sam kasawk loa kraanghoihhaih iah oh. A sam sawkhaih ih loa ang muekhaih hanah paek ih ni.

¹⁶ To-e hi kawng hae kami longlongto mah aek han koeh nahaeloa ka thuih han ka koeh ih loa, kaicae mah doeh, Sithaw ih Khrihca kangkom mah doeh, Sithaw bok na-ah tawkcah kalah tidoeh dawn o ai, tihae ni.

Angraeng Duembuh

¹⁷ Ahlimbang ih kang thuihtaek o hanih pongah nangcae to kang pakoeh o thaih ai ih to a oh, kawmawtiah Sithaw bok hanah na cu o haih ih to mah hmuen kahoih pongdoeh hmuen kahoih ai to tacawtsak lat.

¹⁸ Hmaloe koek ah na cu o na-ah abu maeto hoi maeto nangdaeh o ai tiah ang thuih o; hi hae ahmaan kalang tih mue tiah ka dawn.

¹⁹ (Nangcae salak thungah ampraekhaih ih ka om to doeh hoihhaih ih to a oh, tona-ah ni amito maw kahmaan tito amnoek thai tih).

²⁰ Nangcae mah abu batiah na cu o na-ah na cak o ih loa Angraeng ih Duembuh na ai ni.

²¹ Kawmawtiah nangcae loa nangmahcae ih buh to hmaloe ah na cak o ving na-ah thoemto loa zok amhlam o moa thoemto loa paquih o.

²² Na cak na naek o hanih im to na tawn o ai maw? Tiaibaloa Sithaw ih Khrihca kangkom to hnaphnae moa kavawt kaminawk to azatsak hanah na koeh o maw? Hi kawng pongah kawbangmaw kang thuih han na koeh o? Nangcae to kang pakoeh o han maw? Kang pakoeh o mak ai roeroe.

²³ Kawmawtiah nangcae khaeah kang paek ih kang patukhaih ih loa Angraeng khae hoi-ih ka hak ih ni: Angraeng Jesuh mah Angmah to a naeh o duem ah takaw kae to a lak moa,

²⁴ Sithaw khaeah kawn lok to a thuih pacoengah a aeh moa, “Hihae nangcae hanih kang paek ih ka takbum ni. Kai panoek poe hanah sah oah,” tiah a naa.

²⁵ Tobatih toengah duembuh cak pacoengah boengloeng to doeh a lak moa, “Hi boengloeng hae Sithaw lok amaihhaih ih kangtha, ka thii hoiah caksak ih ni. Hi boengloeng na naek o kruekah kai panoek poe hanah sah oah,” tiah a naa.

²⁶ A thuih koehhaih ih loa hi takaw cak o moa hi boengloeng na naek o kruekah Angraeng angzoh airoekto a duekhaih kawng to na thuih o tihaih ih ni.

²⁷ Topongah ami doeh Angraeng hmin to setsak hanih bangah Angraeng ih takaw to ka caa moa a boengloeng to ka nae loa Angraeng ih takbum hoi athii nuiah zaehaih to a sak.

²⁸ Topongah mi boih mah angmah hoi angmah to angcaek hmaloe na soeloa topacoengah takaw hoi boengloeng to nae na soe.

²⁹ Kawmawtiah takaw to a cak moa boengloeng to a naek na-ah Angraeng ih takbum thuih koehhaih ih to panoek ai nahaeloa a cak a naek na-ah lokcaekhaih to angmah nuiah a phaksak.

³⁰ Hitiah oh pongah nangcae thungih kami paroeai loa tha na boeng o, na nat o moa thoemto loa duek khoekto a tongh o.

³¹ Aimahcae hoi aimahcae to hmaloe koek ah hoihdak ta-ah angcaek nahaeloa Sithaw ih lokcaekhaih thungah akun o mak ai.

³² To-e Angraeng mah aicae hae lok ang caek moa dan ang paekhaih ih loa hi longnui hoiah nawnto ah zaenet ah oh han aiah ni.

³³ Topongah naukamzanawk, Angraeng Duembuh cak hanah na cu o na-ah longto hoi longto angzing oah.

³⁴ Ami doeh zok kamhlam to loa angmah im ah caa na soe. Totiah na cu o nahaeloa Sithaw lokcaekhaih to na tongh o mak ai. Hmuen kalahnawk to loa kangzoh na-ah kang thuih o han.