1 Johan 5 - Asang Khongso New Testament

Longnui Pazawkhaih

¹ Ami doeh Jesuh loa Messiah ni tiah ka taang loa Sithaw ih ca ni; ami doeh ampa ka palung loa a ca to doeh a palung.

² Aicae mah Sithaw canawk palung o tiah panoekhaih ih loa, Sithaw to palung moa a lokpaek pazui hae ni.

³ Kawmawtiah Sithaw palung tihae a lokpaek pazui tihaih ih ni. A lokpaek loa aicae hanah rai lawnlai ai.

⁴ Kawmawtiah Sithaw ih ca boih mah loa long hae pazawk thai. Taanghaih ranghoiah aicae mah long pazawk o.

⁵ Mimah maw long hae pazawk thaih? Jesuh loa Sithaw Capa ni tiah ka taang kami khueh mah ni pazawk thai.

Jesuh Khrih Kawng Panoekkung Saksi

⁶ Baptisma a hakhaih ih tui hoi a duekhaih ih thii hoiah kangzo loa Jesuh Khrih ni. Tui khueh hoiah angzo ai moa tui hoi thii hoiah angzoh maek. Ato to ahmaan tiah Pakhra angmah roeroe mah ang panoek haih bom, kawmawtiah Pakhra loa loktang ni.

⁷ Saksi kangdoehaihkung thumto a oh:

⁸ tonawk loa Pakhra, tui, hoi thii ah oh moa hi thumtonawk mah saksi kang van rip to a paek o.

⁹ Aicae mah kami ih saksi to taang o; to-e Sithaw ih saksi to loa paroeai tha a rah moa a Capa ih kawng to angmah saksi ang paek boah.

¹⁰ Topongah a Capa ka taang boih loa palung thungah ahi saksi hae a tawnh o. To-e Sithaw ka taang ai mah loa Sithaw mah a Capa kawng a thui ih to taang o ai pongah Sithaw to lok amsawn ka thuikung ah coengsak o, kawmawtiah Sithaw mah a Capa kawng a thuih ih to taang o ai pongah ni.

¹¹ Ato saksi loa ahi ni: Sithaw mah aicae hae dungzan hinghaih to angpaek boah moa ato hinghaih loa a Capa thungah a oh.

¹² Ami doeh Capa ka tawn loa hinghaih to a tawnh moa Sithaw Capa ka tawn ai loa hinghaih to tawn ai.

Dungtasawk Hinghaih

¹³ Nangcae Sithaw Capa ka taangnawk mah dungzan hinghaih to na tawnh o tito na panoek o hanah hi ca hae kang tarik.

¹⁴ Sithaw hma-ah misahoihhaih to aicae mah tawnh o, kawmawtiah angmah ih koehhaih batih toengah kawbatih hmuen doeh hnik o nahaeloa a tahngai pae tito kacaipin ah panoek o pongah ni.

¹⁵ Aicae mah angmah khaeah hnik o kruekah anih mah ang tahngai pae; tahngaih tangtang tiah aicae mah panoek o nahoiloa anih khaeah hnik ih boih to ang paek tito panoek o bae.

¹⁶ Namnauk namza mah duekhaih khoekto ka pha ai zaehaih ka sah to na hnuk nahaeloa anihcae hinghaih ka paek hankoi Sithaw khaeah khophoeh oah. Ahi loa duekhaih khoekto ah ka phasak zaehaih to a oh, ato kawng pongah Sithaw khaeah khophoeh oah tiah kang thui ai.

¹⁷ Sakpazaehaih ih boih hae zaehaih ni, to-e duekhaih khoekto ka phasak ai zaehaih to a oh.

¹⁸ Sithaw ih canawk ah ka om mah loa zaehaih sah toemoe ai tito aicae mah panoek o, kawmawtiah Sithaw Capa mah kasueng ta-ah a ohsak moa Kahoih-ai Kami longto mah raihaih to paek mak ai.

¹⁹ Longnui bum boih hae kasae kami ih ukhaih thungah oh e, aicae loa Sithaw ih ni tito panoek o.

²⁰ Sithaw Capa loa angzoh boah moa Sithaw tangtang to panoek hanah thaihkophaih ih to ang paek boah pongah Sithaw tangtang to panoek o. Aicae loa Sithaw tangtang thungah oh o pongah a Capa Jesuh Khrih thungah to oh o. Anih loa Sithaw tangtang hoi dungtasawk hinghaih ni.

²¹ Ka canawk, sithaw romramnawk to yaetak oah.