1 Johan 4 - Asang Khongso New Testament

Pakhra Kahmaan hoi Kahmaan Ai

¹ Ka palung ih ampuinawk, Pakhra ka tawnh tiah ka thui kami boih to taang o hmah, to-e anihcae mah pakhra tawnh ih to Sithaw khae hoi-ih kangzo maw tito tanoek tacak o hmaloe ah. Kawmawtiah tahma kaling paroeai to longnui takiket kruekah a caeh o boah.

² Sithaw ih Pakhra ni tito panoek thai hanih loa hitiah ni; ami doeh Jesuh Khrih loa kami batiah angzoh tiah ka taang boih loa Sithaw khae hoi-ih kangzo Pakhra to a tawnh o.

³ To-e ami doeh Jesuh kawng to totiah taphong han ka koeh ai boih loa Sithaw ih Pakhra to tawn o ai. A tawnh o ih pakhra loa Khrih ih Misa khae hoitoah kangzo ni; angzo tih tiah na thaih o boah moa vaihi hae longnui ah a oh boah.

⁴ To-e ka canawk, nangcae loa Sithaw ih kami ah na oh o moa tahma kalingnawk to na pazawk o boah, kawmawtiah nangcae thungih kaom Pakhra loa longnui kami ah ka omnawk thungih pakhra pongdoeh tha a rah kue.

⁵ Ato tahma kalingnawk loa longnui hmuenmae kawng to a thuih o moa longnui ih kami ah a oh o pongah long mah a lok to a tahngaih.

⁶ To-e aicae loa Sithaw ih kami ni. Ami doeh Sithaw ka panoek loa aicae ih lok hae a tahngai o; ami doeh Sithaw ih kami ah ka om ai loa aicae ih lok hae tahngai o ai. Topongah aicae mah loktang ih Pakhra hoi pazaehaih ih pakhra a lahhaih ih to panoek o thaih.

Sithaw Loa Amlunghaih Ni

⁷ Ka palung ih ampuinawk, amlunghaih loa Sithaw khae hoi-ih kangzo ah oh pongah longto hoi longto amlung o si. Ami doeh longto hoi longto kamlung loa Sithaw ih a ca ah oh moa Sithaw to a panoek.

⁸ Mi doeh amlunghaih ka tawn ai loa Sithaw to panoek ai, kawmawtiah Sithaw loa amlunghaih ih ni.

⁹ Sithaw mah a Capa longto ta khueh a tawn ih to hae longnui ah patoeh ranghoiah amlunghaih to amtuengsak moa anih ranghoiah aicae mah hinghaih tawn o tih.

¹⁰ Amlunghaih ih loa hitiah ni: Aicae mah Sithaw to palung ih na ai ni, angmah to aicae hae ang palung moa aicae zaehaih tahmen ah oh hanah a Capa patoeh ih hae ni.

¹¹ Ka palung ih ampuinawk, hitih tantoah Sithaw mah ang palung nahaeloa aicae doeh longto hoi longto amlung o toeng han oh.

¹² Mita mah doeh Sithaw to hnuh vai ai, to-e aicae mah longto hoi longto amlung nahaeloa Sithaw loa aicae thungah a oh moa aicae thungah amlunghaih to acung.

¹³ Aicae loa Sithaw thungah oh o moa Sithaw loa aicae thungah oh tito kacaipin ah panoek o, kawmawtiah aicae khaeah a Pakhra to ang paek boah pongah ni.

¹⁴ Longnui Pahlongkung ah oh hanah Ampa mah a Capa patoeh tito aicae mah hnuk o boah moa mi kalahnawk khaeah aicae mah thui o.

¹⁵ Ami doeh Jesuh loa Sithaw Capa ni tito ka taphong loa Sithaw thungah a oh moa Sithaw doeh anih thungah a oh toeng.

¹⁶ Sithaw mah aicae palunghaih ih hae aimahcae khaekhaeh mah panoek o moa taang o. Sithaw loa amlunghaih ih ni, amlunghaih thungah ka om boih loa Sithaw thungah a oh moa Sithaw doeh anih thungah a oh toeng.

¹⁷ Lokcaekhaih Ni ah aicae mah misahoihhaih tawnh thai hanah amlunghaih ih to aicae thungah acungsak boah; ato to aicae mah tawn o tih, kawmawtiah hae longnui ah aicae hinghaih loa Khrih hinghaih hoiah anghmong pongah ni.

¹⁸ Amlunghaih pongah zithaih ih om ai; amlunghaih kacung mah la zithaih boih to anghmatsak king. Topongah zithaih ka tawn kami loa amlunghaih kacung to tawn ai vop, kawmawtiah duekhaih loa raekhaih hoiah angpaeh hoi.

¹⁹ Sithaw mah aicae hae ang palung hmaloe pongah aicae mah doeh palung o toeng.

²⁰ Aicae mah Sithaw to palung o tiah thui o e angmah ih naukamzanawk to hnumaa nahaeloa a hnuk ai ih Sithaw to palung thai mak ai.

²¹ Khrih mah aicae khaeah ang paek ih lokpaek loa ahi ni: Sithaw ka palung kami boih mah loa naukamza to palung han oh.