1 Johan 3 - Asang Khongso New Testament

Sithaw Ih Canawk

¹ Sithaw mah natanto maw ang palung o hae dawn oah! A palunghaih to a lenh phi pongah aicae hae Sithaw ca tiah kawk ah oh. Totitoah aicae hae oh o tangtang. Hitih pongah hae long mah aicae hae ang panoek ai, Sithaw to doeh panoek ai.

² Ka palung ih ampuinawk, vaihiah aicae loa Sithaw ih canawk ah oh o boah, to-e hmabang ah kawbangmaw om o tih tito loa amnoek het ai vop. To-e Khrih amtueng na-ah loa angmah batiah om o tih tito loa aicae mah panoek o, kawmawtiah anih loa angmah tangtang batiah aicae mah hnuh o tih.

³ Ami doeh Khrih ah hi oepdoenghaih ka tawn loa Khrih to thoengcai batih toengah angmah hoi angmah to a thoengcaisak toeng.

⁴ Ami doeh zaehaih ka sah loa Sithaw ih tawklok to a aek, kawmawtiah zaehaih loa tawklok aekhaih hae ni.

⁵ Khrih loa zaehaih ihnawk to lak hanah angzoh moa anih thungah zaehaih tidoeh om ai tito na panoek o.

⁶ Topongah Khrih hoiah angpaehhaih thungah kahing kami boih loa zaehaih to sah toemoe ai; to-e ami doeh zaehaih ka sah toemoe loa Khrih to hnuh vai ai hoi panoek vai kami ni.

⁷ Ka canawk, amita mah doeh na ling o hmah na soe! Khrih loa kami katoeng ah oh batiah ami doeh hmuen katoeng ka sah loa kami katoeng ni.

⁸ Ami doeh zaehaih ka sah toemoe loa Diabol ih kami ni, kawmawtiah Diabol loa atangsuek nahoiah mah zaehaih a sak roe boah. Ahi kawng pongah hae Taqawk mah sak ih boih to phraek hanah ni Sithaw Capa loa angzoh.

⁹ Sithaw ih ca ah ka omnawk boih mah loa zaehaih to sah toemoe ai, kawmawtiah Sithaw ih tuinuenh to atimu batiah anihcae thungah a oh; Sithaw loa anihcae ih Ampa ah oh pongah zaehaih sah o toemoe thai ai.

¹⁰ Sithaw ih canawk hoi Diabol taqawk canawk ih a lahhaih loa hitiah ni: kamsoem hmuen to ka sah ai moa mi kalah to ka palung ainawk boih loa Sithaw ih canawk na ai ni.

Longto hoi Longto Amlung Oh

¹¹ Atangsuek nahoiah na thaih o ih tamthang lok loa hihi ni. Aicae longto hoi longto amlung o si, tihae ni.

¹² Kahoih-ai Kami iah kaom Kain, amnauk Abel ka humkung batiah to oh han om ai. Tipongah maw Kain mah anih to a hum? Angmah sak ih hmuen to toeng ai moa amnauk mah sak ih hmuen to a toeng pongah ni.

¹³ Topongah naukamzanawk, longnui kaminawk mah na hnumaa o cadoeh dawnraisak o hmah.

¹⁴ Aicae loa duekhaih to caeh o tak moa hinghaih thungah akun o boah tito panoek o; totiah panoekhaih ih loa aicae mah naukamzanawk palung pongah ni. Ami doeh amlunghaih ka tawn ai loa duekhaih ih hmuensak thaihaih thungah a oh vop.

¹⁵ Ami doeh naukamza ka hnumaa boih loa kami ka humkung ah oh moa kami ka hum loa angmah thungah dungzan hinghaih to tawn ai tito na panoek o.

¹⁶ Amlunghaih ih hae kawbatih maw tito panoekhaih ih loa hitiah ni: Khrih mah aicae hanah a hinghaih to ang paek. Topongah aicae mah doeh naukamzanawk hanah hinghaih hae paek toengh han oh!

¹⁷ Angraeng kanangnawk mah naukamzanawk ih a vawthaih ih to a hnuk na-ah anihcae to palungthin thok to khah khoep nahaeloa anihcae mah Sithaw ka palung tiah thui o thai mak ai.

¹⁸ Ka canawk, aicae ih amlunghaih loa lok hoi pakhaa khueh hoiaiah sakhaih ih pongah kamtueng amlunghaih tangtang ah oh han oh.

Sithaw Hma-ah Misahoihhaih

¹⁹ Topongah aicae mah loktang pongah ka oh tito panoekhaih hanih loa ahi ni: Sithaw hma-ah kawbangmaw palung ka hnaep ta-ah oh o tito loa hitiah ni;

²⁰ aicae ih kasae kahoih panoekhaih palungthin mah aicae hae zae na net cadoeh Sithaw loa aicae ih kasae kahoih panoekhaih palungthin pongah a lenh kue moa cungriboih to a panoek tito aicae mah panoek o.

²¹ Topongah ka palung ih ampuinawk, aicae ih kasae kahoih panoekhaih palungthin mah aicae hae zae na net ai nahaeloa Sithaw hma-ah misahoihhaih to aicae mah tawnh o.

²² Aicae mah angmah ih lokpaek to pazui o moa a koeh ih to sak pae o pongah aicae mah angmah khaeah hnik ih boih to hak o.

²³ Anih mah lokpaek ih loa a Capa Jesuh Khrih to aicae mah taang o moa Khrih mah lok ang paek batih toengah longto hoi longto amlung o hae ni.

²⁴ Sithaw ih lokpaek ka pazui boih loa Sithaw hoiah angkomhaih thungah a oh o moa Sithaw doeh anihcae hoiah angkomhaih thungah a oh toeng. Sithaw mah aicae khaeah paek ih Pakhra ranghoiah Sithaw loa aicae thungah a oh tito aicae mah panoek o.