Nnwom 140 - Akuapem Twi Nkwa Asɛm

Dwom 140

Dawid dwom.

¹ Awurade, gye me fi nnebɔneyɛfo nsam; bɔ me ho ban fi basabasayɛfo nsam,

² wɔn a wodwen bɔne wɔ wɔn koma mu na wɔhwanyan ɔko mu da biara.

³ Wɔsew wɔn tɛkrɛma ano te sɛ ɔwɔ de; nhurutoa bɔre wɔ wɔn ano.

⁴ Awurade, yi me fi amumɔyɛfo nsam; bɔ me ho ban fi basabasayɛfo a wodwen sɛ wobetwintwan mʼanan mu no ho.

⁵ Ahantanfo asum me afiri; wɔatrɛtrɛw wɔn asau ahama mu wɔasunsum me mfiri wɔ me kwan so.

⁶ Awurade, meka kyerɛ wo se, “Wone me Nyankopɔn.” Awurade, tie me mmɔborɔsu.

⁷ Otumfo Awurade, me gyefo hoɔdenfo, wokata me ti so wɔ ɔko da,

⁸ nyɛ amumɔyɛfo abisade mma wɔn, Awurade; mma wɔn nhyehyɛe nnyɛ yiye.

⁹ Wɔatwa me ho ahyia, nanso, ma amumɔyɛsɛm a efi wɔn anom no nsɛe wɔn.

¹⁰ Ma nnyansramma ngu wɔn so; ma wɔntow wɔn ngu ogya mu, ngu dontori amoa mu a wɔrensɔre bio.

¹¹ Mma dinsɛefo ase ntim asase no so; ma amanehunu ntaataa kitikitiyɛfo.

¹² Minim sɛ Awurade bu ahiafo atɛntrenee na odi onnibi asɛm ma no.

¹³ Ampa ara, atreneefo bɛkamfo wo din na wɔn a wɔnam tee no bɛtena nkwa mu wɔ wʼanim.