Tito 3 - Inkeanon

Mga Dugang nga Bilin sa mga Tumueuo

¹ Padumduma ro mga tumueuo inha nga magpasakop ag magtuman sa mga manogdumaea sa gobyerno, ag sa tanan nga may otoridad kanda. Padumduma man sanda nga dapat haom sanda permi sa pag-obra it bisan ano nga mayad.

² Dapat man nga indi nanda pagpakaeainon ro bisan sin-o, indi sanda magpang-away kundi mangin mabuot ag perming maeueo sa tanan.

³ Dumdumon naton nga kita man ngani kato hay owa kaeubot parti sa Dyos, bukon it masinueundon kana, ag ginpinataeang. Ulipon anay kita it mga sari-sari nga mga maeain nga handom nga nailaan ku atong eawas. Puro eang anay maeain ro atong ginaisip sa atong isigkatawo ag permi eang natong ginahisaan sanda. Ginakaugtan kita it mga tawo ag ginakaugtan man naton sanda.

⁴ Pero tag ginpakita it Dyos nga atong Maneueuwas ro anang sobrang kabuot ag paghigugma sa tawo

⁵ hay gineuwas nana kita. Gineuwas nana kita dahil sa anang kaeuoy katon, bukon it dahil may mga matarong kita nga buhat. Gineuwas kita it Dyos paagi sa anang paghugas katon sa atong kasae-anan tag natawo kita it uman, ag gintaw-an it bag-o nga kabuhi paagi sa Espirito Santo

⁶ nga anang gintao katon nga owa it hawid-hawid paagi kay Jesu-Kristo nga aton nga Maneueuwas.

⁷ Ag paagi sa anang sobrang kabuot hay ana eon kita nga ginabilang nga matarong, agod makasiguro kita nga mabaton naton ro kabuhi nga owa it katapusan kaibahan it Dyos sa ulihi.

⁸ Masaligan ro mga pamisaea ngara nga ginapadumdum ko kimo. Mawron nga gusto ko nga ituro nimo ra nga may kaisog it buot, agod ro mga nagatuo sa Dyos inha hay paeabyon permi ro paghugod sa paghimo it mayad sa andang isigkatawo. Raya hay mayad ag mapuslanon para sa tanan.

⁹ Likawi ro mga pinaumang nga pagpakigbais ag pagkueuntrahan parti sa mga ngaean nga halin sa listahan it mga linahi, ag ro pagpakig-away parti sa Kasuguan nga ginsueat ni Moises, ay owa ron it pueos ag owa ka gid karon it mabuoe.

¹⁰ Kon may inha nga gapabueag ag gapaaway sa mga tumueuo, paandami imaw ag kon indi imaw mamati hay paandami it uman. Pero kon indi gihapon imaw mamati hay likawi eon imaw

¹¹ ay sayod mo nga ro makaruyon nga tawo hay ginpalihis sa tama nga daean it kamatuuran. Saea ro anang ginaobra ngaron ag pinahan imaw sa ulihi, ugaling hungod ma't-a nana ron.

Mga Katapusan nga Bilin ag mga Pagpangamusta ni Pablo

¹² Paadtunon ko rinha kimo si Artemas o kundi si Tikicus. Kon mag-abot eon inha, kon sin-o man kanda nga daywa hay tinguhaa gid nga mag-adto kakon sa syudad it Nicopolis, ay rang desisyon hay idto ako matenir sa tigbaeagyo.

¹³ Obraha ro tanan agod mabuligan si Apolos ag ro abogado nga si Zenas kon gapanaw eon sanda. Pabaeunan mo sanda agod owa it kueang sa andang kinahangeanon sa andang pagpamanawon.

¹⁴ Dapat man nga mag-antiguhan ro aton nga mga kaigmanghuran inha nga magtinguha nga mag-obra it mayad, agod nga makabulig sanda sa nagakinahangean gid. Sa rayang paagi hay mangin mapuslanon ro andang kabuhi.

¹⁵ Ginakumusta ka ku tanan nakon nga mga kaibahan iya. Kumustaha lang ro tanan natong mga kaigmanghuran inha sa pagtuo nga nagapalangga kamon. Kabay pa nga masamitan pa gid ninyo tanan ro sobrang kabuot it Dyos.