Tito 2 - Inkeanon

Ro Batasan nga Nagakasinanto sa Minatuod nga Mensahi

¹ Pero ikaw, Tito, tud-an kon mauno ro batasan nga nagakasinanto sa tama nga mensahi.

² Hambaei ro mga magueang eon nga mga eaki nga indi magpasobra sa bisan ano, mangin taeahuron, ag bukon it pinaumang kon magdesisyon. Hambaei man sanda nga dapat malig-on ro andang pagtuo sa Dyos, hantop ro anda nga paghigugma sa andang isigkatawo, ag matiniison sa mga kalisod.

³ Hambaei man ro mga magueang eon nga mga bayi nga magkabuhi it balaan bilang katawhan it Dyos. Indi dapat sanda magpangsamad sa iba, ag indi magpaulipon sa inom. Dapat nga sanda hay halimbawa kon mauno ro mayad nga pagkabuhi

⁴ agod hitud-an nanda ro mga bayi nga mga bata pa nga palanggaon ro andang asawa ag mga unga.

⁵ Tud-an pa gid nanda ro mga bata pa ngaron nga magpugong sa andang kaugalingon, magpangabuhi it malimpyo, maghugod sa baeay, magpakabuot ag magpasakop sa andang asawa. Dapat nga makaraya sanda agod owa it makasura sa mensahi it Dyos.

⁶ Hambaei man ro mga eaki nga mga pamatan-on nga may anda dapat nga pagpugong sa andang kaugalingon.

⁷ Dapat nga hueuwaran ka it mayad nga buhat. Kon magturo ka, ro imong ginahambae hay dapat nga matuod gid ag dapat nga ikataha ka sa imong paghambae.

⁸ Siguraduha nga ro imong ginahambae hay tama gid ag owa karon it ikasaway. Tungod kon makaruyon hay mahuy-an ro mga nagakuntra katon, ay owa sanda it makita nga maeain katon.

⁹ Hambaei man ro mga ulipon nga mga tumueuo inha nga magpasakop sa andang amo sa tanan nga butang, agod malipay ra kanda. Indi dapat sanda magsukoe it saeabtanan sa andang amo.

¹⁰ Indi man sanda dapat magpangupit kundi ipakita nanda nga masaligan gid sanda, agod ro tanan nandang ginahimo hay magapakita nga ro mensahi nga halin sa Dyos nga aton nga Maneueuwas hay mayad-ayad gid.

¹¹ Makaruyon dapat ro pagkabuhi it tumueuo tungod ginpakita eon it Dyos ro anang sobrang kabuot, agod taw-an it kahigayunan ro tanan nga tawo nga maeuwas.

¹² Paagi sa anang sobrang kabuot ngaron hay maeubtan naton nga dapat natong isikway ro pagkabuhi nga owa kita it kahadlok kana, ag indi eon magpadaea-daea sa mga maeain nga handom iya sa kalibutan. Ag maeubtan man naton nga dapat may pagpugong kita sa atong kaugalingon, mangin matarong, ag mangin matinumanon sa Dyos samtang iya pa kita sa kalibutan.

¹³ Makaruyon dapat ro atong batasan samtang ginapaabot naton ro malipayon ag sigurado nga pagbalik ni Jesu-Kristo. Imaw ro aton nga Makagagahom nga Dyos ag Maneueuwas ag sa pagbalik na ngato hay may anang grabi nga kasilaw nga nagapakita ku anang pagkadaeayawon.

¹⁴ Ginhaead nana ro anang kaugalingon para katon agod nga hilwayon kita sa pina ku tanan naton nga pagbaliwala sa Kasuguan it Dyos, ag agod nga malimpyuhan kita sa atong kasae-anan, ag mangin ana eamang nga katawhan nga ganado permi mag-obra it mayad.

¹⁵ Tud-an ag ipatuman raya ngara nga mga ginsueat ko kimo, ag hambaei ro mga owa nagatuman ay may imo nga otoridad. Ayaw magsugot nga baliwalaon ka it bisan sin-o.