Tito 1 - Inkeanon

Mga Pagpangamusta

¹ Raya nga sueat hay halin kakon nga si Pablo nga isaeang ka ulipon it Dyos ag *apostol ni Jesu-Kristo. Ginpadaea ako it Dyos agod palig-unon ro pagtuo it mga tawo nga anang ginpili nga mangin anang katawhan, ag agod ipasayod kanda ro tama nga doktrina nga magagiya kanda nga magkabuhi nga matinumanon sa Dyos.

² Ginahimo ko ra agod makasigurado ro mga tawo nga may anda nga kabuhi nga owa it katapusan, kaibahan it Dyos sa ulihi. Ginpromisa it Dyos ronduyon nga kabuhi bago pa gintuga ro kalibutan, ag owa gid imaw nagapinuril.

³ Ag sa oras nga anang gintaeana, nga makaron eon ngani ron hay ginpahayag ron nana paagi sa Mayad nga Balita nga ginawali. Ro mensahi ngaron hay ginsalig kakon it Dyos nga aton nga Maneueuwas, ag ginsugo nana ako nga iwali ron sa mga tawo.

⁴ Nagasueat ako kimo, Tito, nga ginabilang ko nga akon gid nga unga tungod sa aton nga pagtuo kay Jesus. Kabay pa nga masamitan pa gid nimo ro mga pagpakamaayo ag katawhayan nga halin sa Dyos Ama ag kay Kristo Jesus nga atong Maneueuwas.

Mauno Dapat ro Batasan it mga Manogdumaea ku mga Tumueuo

⁵ Gin-aywanan ko ikaw inha sa isla it Creta agod nga imong ayuson ro dapat pang ayuson, ag tapuson ro dapat pa nga obrahon sa mga grupo it mga tumueuo inha. Ag ro sambilog pa hay agod nga magbutang ka it mga manogdumaea ku grupo it mga tumueuo sa kada banwa pareho ku akong ginbilin kimo.

⁶ Makaraya dapat ro batasan it sangka manogdumaea ku mga tumueuo: dapat nga owa it kasawayan kana, dapat nga owa it ibang bayi sa anang kabuhi, kundi ro anang asawa eang, tumueuo dapat ro anang mga unga ag indi mahambae nga haras-haras o nagarebelde sa ginikanan.

⁷ Kinahangean nga owa it kasawayan ro nagadumaea sa mga tumueuo tungod imaw ro ginasaligan ku mga oeobrahon it Dyos. Bukon dapat imaw it matinaas-taason, bukon it mainiton it ueo, bukon it paeahilong, bukon it mapintas ag owa gaobra it saea dahil eang sa kaila it kwarta,

⁸ kundi dapat nga mailaon imaw magpadayon it bisita sa anang baeay, dapat nga naila imaw it bisan ano nga mayad, bukon it pinaumang magdesisyon, matarong, balaan ro anang pagkabuhi, ag may pagpugong sa anang kaugalingon.

⁹ Dapat nga malig-on ro anang pagpati sa mensahi nga among ginaturo nga masaligan gid. Kon malig-on ro anang pagpati karon hay ana man dayon nga hipabaskog ro buot it anang mga ginatud-an ku tama ngaron nga ginaturo, ag maihayag nana ro saea nga ginaturo ku mga nagakuntra karon.

¹⁰ Ginahambae ko ra ay abo abi nga mga tawo nga indi magpasakop sa bisan ano nga otoridad. Anda nga ginapataeang ro mga tawo sa andang ginahambae nga owa it pueos. Makaraya ro ginaobra kapin ku mga Judio nga nagtuo eon, ugaling nagahambae sanda nga dapat gid magpatuli anay ro mga tumueuo nga bukon it *Judio agod nga maeuwas sanda.

¹¹ Dapat nga papunduhon ron sanda, ay may mga pamilya abi nga ro tanan nga myembro hay nasamad eon ro pagtuo sa anda ngaron nga ginaturo nga indi dapat ituro. Ag isaea pa hay nagaturo sanda agod eang makapangwarta.

¹² May sambilog sa andang mga mangin-aeamon kato anay, nga tagaCreta mismo nga naghambae, “Ro mga tagaCreta hay pulos gid mga purilon, mga mapintas pareho it mabangis nga mga sapat, ag mga matamad nga mga paeaeamon.”

¹³ Minatuod gid-a ro anang ginhambae ngaron hanungod kanda. Ngani hambaei gid-a sanda agod magpati sanda sa tama nga ginaturo,

¹⁴ ag indi eon sanda magpilinati sa mga sugilanon it mga Judio nga bukon it minatuod, ag indi eon magtuman sa mga kasuguan it mga tawo nga nagtalikod eon sa kamatuuran.

¹⁵ Sa mga tawo nga ginlimpyuhan eon sa andang kasae-anan, ro tanan nga gintuga it Dyos hay malimpyo. Pero sa mga tawo nga mahigko, nga owa pa halimpyuhi sa andang kasae-anan tungod owa pa sanda nagatuo ag nagasalig kay Jesus eang, ro tanan hay mahigko. Owa eon sa tama ro andang paino-ino ag konsensya.

¹⁶ Nagaako sanda nga kilaea kuno nanda ro Dyos pero sa andang buhat hay makita nga bukon man ron it matuod. Ro makaraya nga klasi it tawo hay makangingil-ad sa mata it Dyos, mga bukon it masinueundon kana, mga owa it pueos ag owa nana ginabilanga nga mayad ro bisan ano nanda nga buhat.