Santiago 5 - Inkeanon

Paandam sa mga Manggaranon

¹ Kamo nga manggaranon, pamati kamo! Magtangis kamo ag mag-ueahab tungod sa sobra nga kalisod nga maabot kinyo.

² Ro inyong manggad nga tinipon hay nagakaeasamad eon ag ro inyong mga eambong nga tinago hay ginakitkit eon it sapat-sapat.

³ Ro inyong mga kwarta nga bueawan ag pilak nga tinago hay gintuktuk eon, ag ro mga tuktuk ngaron hay ebidensya kuntra kinyo sa ulihi ku inyong grabing pagkamahikaw. Gintambak eang ninyo ro inyong manggad ag hara, madali lang ro oras nga hukman it Dyos ro mga tawo. Ngani pinahan kamo sa impyerno kon siin amat-amaton it sunog it kaeayo ro inyong eawas.

⁴ Hara't-a! Ro kwarta nga inyong ginhawiran nga dapat kunta isweldo sa inyong mga manog-ani hay nagasinggit kuntra kinyo. Ag habatian man it Makagagahom nga Dyos ro reklamo ku inyong mga manog-ani ngaron.

⁵ Nagapinagusto ag nagapinanami-nami kamo sa inyong kabuhi iya sa kalibutan. Nagatilinambok kamo sa inyong pagpinagusto ngaron pero pareho kamo it baka nga ginapatambok agod matansahon ay maabot ro adlaw nga pinahan kamo.

⁶ Ginakondenar ninyo ro mga matarong ag ginapapatay bisan owa sanda it saea ag owa it ikasukoe kinyo.

Aton nga Antuson ro mga Kalisod nga may Pagpasensya

⁷ Mga igmanghod, mangin mapinasensyahon kamo samtang nagahueat kamo sa pag-abot it Ginuo. Tan-awa tuo ninyo ro pasensya it mangunguma. Ginahueat gid nana ro uean agod makatanom ag pagkatanom hay ginahueat eon man nana ro uean agod magtubo ro anang tanom. Ag gahinueat pa gid imaw nga may pasensya hasta mag-abot ro tig-aeani ku anang maeahaeon nga produkto.

⁸ Ngani mangin mapinasensyahon kamo. Magpakalig-on kamo ay madali eon lang mag-abot ro Ginuo.

⁹ Mga igmanghod, ayaw kamo it rineklamo kuntra sa kada isaea agod indi kamo paghusgaran nga pinahan tungod madali eon lang mag-abot ro magahukom sa mga tawo.

¹⁰ Mga igmanghod, dumduma ninyo ro mga propeta kato anay nga nagasugid ku mensahi it Ginuong Dyos nga anang ginapaabot sa mga tawo. Tueara ninyo ro andang pagbatas nga may pasensya sa mga paghingabot kanda.

¹¹ Ginabilang naton nga bulahan ro mga pareho kanda nga nagpadayon nga malig-on sa andang pagtuo sa Dyos bisan ginhingabot sanda. Habatian man ninyo ro haagyan ni Job nga mga kalisod kato anay pero nagpadayon nga malig-on ro anang pagtuo sa Dyos. Ag hasayran man ninyo kon mauno ro pagpakamaayo it Ginuong Dyos kay Job ku ulihi, nga nagapakita nga pwerti gid imaw ka maeueuy-on.

Mga Katapusan nga mga Bilin

¹² Ag isaea pa nga importanti gid nga ihambae ko kinyo, mga igmanghod hay kon gahambae kamo hay ayaw kamo it panumpa ag gamiton pa ninyo nga saksi ro eangit o ro eugta o bisan ano pa. Mas mayad pa nga maghambae eang kamo it “Huo, himuon ko” ukon “Indi ako” agod indi kamo pagpinahan it Dyos.

¹³ May una baea kinyo nga nagakalisod? Dapat imaw nga magpangamuyo sa Dyos. May una baea kinyo nga malipayon? Dapat imaw nga magkanta it pagdayaw sa Dyos.

¹⁴ May una baea kinyo nga nagamasakit? Dapat nga tawgon na ro mga manogdumaea it anang grupo it mga tumueuo agod adtunan imaw. Dapat nga pangamuyuan nanda imaw sa Dyos, samtang ginahibo it eana sa pangaean it Ginuo.

¹⁵ Ag paagi sa andang pangamuyo nga may pagsalig sa Dyos hay magamayad ro nagamasakit ag ibalik it Ginuo ro anang kusog. Ag kon halimbawa nga may haobra imaw nga saea nga ginhalinan ku anang masakit ngaron hay patawaron imaw.

¹⁶ Ngani akua ro inyong mga saea nga inyong nahimo sa kada isaea ag magpaeangamuyuan kamo agod magmayad kamo. Pwerti gid ro pangamuyo it tawo nga matarong ag mabahoe gid ro mahimo kara.

¹⁷ Dumduma ninyo si Elias nga propeta kato anay. Ordinaryo eang imaw nga tawo nga may kinaiya nga pareho katon. Nagpangamuyo imaw it hantop sa anang tagipusuon nga indi mag-uean ag owa matuod mag-uean sa sueod it tatlong dag-on ag tunga.

¹⁸ Pagkatapos, nagpangamuyo imaw it uman nga mag-uean eon ag nag-uean matuod ag ginpabunga euman it eugta ro mga pananom.

¹⁹ Mga igmanghod, kon may sambilog kinyo nga magapaeayo sa matuod nga mensahi it Dyos, ag may sambilog kinyo nga magbulig nga makabalik imaw,

²⁰ dapat ninyong masayran nga paagi sa ginhimo ku nagbulig ngato kana nga magtalikod sa anang saea hay maeuwas imaw sa owa it katapusan nga pagkahamueag sa Dyos ag patawaron man ro kaabo nana nga kasae-anan.