Santiago 4 - Inkeanon

Ro Dyos hay Nagapadungog sa mga Mapainubuson

¹ Ano baea ro ginahalinan it inyong mga pag-ilinaway ag grabi nga pagbilinais? Bukon abi it ro mga maeain nga handom it inyong eawas nga nagapakig-away sa inyong konsensya agod sanda ro matuman?

² May mga nailaan gid kamo pero kon indi ninyo mabuoe hay matsa patyon ninyo ro inyong isigkatawo agod eang mabuoe ron ninyo. May inyong mga ginakahikawan nga ana it iba pero kon indi ninyo mabuoe hay makig-away 't-a kamo ag makigbais sa tag-ana. Pero ro rason nga indi ninyo mabuoe ro inyong gusto hay dahil owa man ninyo ron ginapangayua sa Dyos.

³ Pero maskin nagapangayo kamo hay owa gihapon kamo ginataw-i dahil ro inyong katuyuan hay maeain ay inyo man lang ron nga amulitan sa pagpagusto sa maeain nga handom ku inyong eawas.

⁴ Pareho kamo it bayi nga gapangawatan ay naila pa't-a kamo sa mga butang iya sa kalibutan! Owa baea kamo kasayod nga ginakuntra ninyo ro Dyos kon nailaan ninyo ro mga butang iya sa kalibutan nga kuntra nana? Ngani kon sin-o ro naila sa mga kalibutanon nga buhat nga kuntra it Dyos hay ginaobra nana mismo ro anang kaugalingon nga kaaway it Dyos.

⁵ Eaom baea ninyo nga basta eang nga nagahambae ro Sagrado nga Kasueatan nga “ro atong kabubut-on nga gintuga it Dyos hay nangin sobrang mahisaon”?

⁶ Pero mas mabahoe ro bulig nga ginatao it Dyos katon agod maperdi ron. Sayod naton ron ay nagahambae man ro Kasueatan nga “Ro mga matinaas-taason hay ginakuntra it Dyos pero ro mga mapainubuson hay anang ginapakamaayo.”

⁷ Ngani magpasakop kamo sa Dyos. Sukei ninyo si Satanas ag magapaeagiw imaw kinyo.

⁸ Magpaeapit kamo sa Dyos agod mageueot ro inyong relasyon kana ag batunon gid nana kamo. Kamo nga mga makasasaea hay dapat magtalikod eon sa saea agod limpyo eon permi ro inyong buhat. Indi eon kamo mag-isaea-daywa it paino-ino ag limpyuhi ro inyong tagipusuon agod ro Dyos eang ro inyong ginahigugma.

⁹ Makonsensya kamo, magkasubo ag mag-ueahab tungod sa inyong mga saea. Imbis nga maghibayag kamo ag magkalipay sa inyong saea hay magtangis kamo ag magmasinueub-on.

¹⁰ Magpaubos kamo sa Ginuo ag ana kamo nga padunggan.

Paandam sa Nagahusgar sa Anang Isigkapareho

¹¹ Mga igmanghod, ayaw ninyo pagpakaeaina ro kada isaea. Ro nagapakaeain ag nagapanghusgar sa anang igmanghod sa pagtuo hay matsa nagasura man sa Kasuguan it Dyos ag sa anang pagtan-aw hay indi dapat magtuman sa sugo nga nagahambae nga dapat kitang maghigugmaanan. Kon makaruyon ro imong ginaobra hay owa ka't-ing nagatuman sa Kasuguan it Dyos kundi imo ra nga ginatimbang-timbang kon dapat ra tumanon o indi.

¹² Sambilog gid lang ro may otoridad agod magpanghusgar sa tawo ag ruyon hay ro Dyos dahil imaw ro nagtao ku Kasuguan. Imaw man lang ro makaeuwas o makapina sa tawo. Ngani sin-o ka gid agod magpanghusgar sa imong isigkapareho?

Dapat Kita Magpasakop sa Pagkontrol it Dyos sa Atong Kabuhi

¹³ Pamatii ra ninyo, kamo nga nagahambae nga, “Makaron o basi hin-aga hay maadto kami sa rato nga syudad. Idto kami maistar it mga sang dag-on, manegosyo ag matipon it abong kwarta.”

¹⁴ Ugaling hay owa ngani kamo nakasayod kon ano ro inyong kabuhi hin-aga. Pareho eang kamo it ambon nga hakikita it madaling oras ag nagakaduea dayon.

¹⁵ Imbis nga makaruyon hay makaraya't-a ro inyong ihambae, “Kon pagbuot it Ginuong Dyos ag paeawigon pa ro among kabuhi hay makaraya ukon makarato ro among obrahon.”

¹⁶ Pero sige ro inyong pagpinabugae nga matsa kamo't-a ro nagabuyot ku inyong kabuhi. Ro tanan nga mga pagbinugae nga makaruyon hay maeain.

¹⁷ Ngani tumana ninyo ro akong ginahambae ngara ay kon nasayran it tawo kon ano ro mayad nga dapat obrahon pero owa ra nana ginaobraha hay nagakasaea imaw.