Santiago 3 - Inkeanon

Dapat nga Madahan Kita Permi sa Atong mga Panghambae

¹ Mga igmanghod ko, mayad pa kon sangkiri eang kinyo ro maghandom nga mangin manogturo ku mensahi it Dyos ay sayod kamo nga kami nga mga manogturo hay mas mabug-at ro masamitan nga pina kaysa sa among mga ginatur-an kon magsaea kami sa among ginaturo.

² Matuod nga nagakasaea permi kita tanan kapin gid sa atong mga panghambae. Kon may tawo nga owa nagakasaea sa anang ginahambae hay mahambae naton nga perpekto imaw nga tawo nga makapugong gid it todo ku anang kaugalingon.

³ Isipon lang naton ro kabayo. Kon birahon naton ro renda nga nakaangot sa saesaeon nga una sa anang ba-ba hay mapatuman naton imaw ag mapaadto ro anang bilog nga eawas kon siin naton gusto.

⁴ Ag isipon baea naton ro mga barko. Bisan kaeagko ag ginahuyop it mabaskog nga hangin hay mapaliso gihapon ra it maisot nga timon ag mapaadto bisan siin nga diriksyon nga gusto it timunil.

⁵ Makaruyon man ro kahalimbawa it aton nga dila. Maisot eang nga parti it eawas pero makahimo it daeagko nga mga butang. Dumduma ninyo nga ro bisan kaisot nga kaeayo sa umpisa hay makasunog it maeapad nga kagueangan.

⁶ Ro dila abi ngara hay pareho it kaeayo nga halin mismo sa impyerno ag makasunog ku atong bilog nga kabuhi. Sa tanan nga parti it atong eawas, ro dila ro ginahalinan it kaabo-abo nga buhat nga bukon it matarong ag makasamad sa bilog natong pagkatawo.

⁷ Ro tanan nga klasi it sapat, mga kapispisan, mga nagakamang, ag ro mga una sa kaeaeawran hay sarang mapahugop it tawo ag hapahugop eon ngani.

⁸ Pero owa gid it tawo nga makakontrol sa anang dila. Ro dila hay owa't pahuway sa paghinambae it maeain ag matsa puno it dalit nga makamaeatay.

⁹ Ginagamit naton ro atong dila sa pagpasaeamat sa Ginuong Dyos nga atong Ama pero ginagamit man ra naton sa pagsumpa sa atong isigkatawo nga gintuga't-a pa man it Dyos nga may pagkapareho sa anang kinaiya.

¹⁰ Nagaguwa sa sangka ba-ba eang ro pagdayaw ag pagsumpa. Mga igmanghod, bukon 't-a dapat it makaruyon.

¹¹ Aeang-aeang ma't-a nga gaguwa sa sangka tuburan eang ro manami imnon ag ro indi man mainom nga tubi.

¹² Mga igmanghod ko, aeang-aeang man nga ro higera hay magbunga it olibo ag ro ubas hay magbunga it higera. Indi man hipanami ro lasa it maaeat nga tubi.

Ro Pagkabuhi nga Bunga it Kaaeam nga Halin sa Eangit

¹³ Sin-o kinyo ro nagaisip nga maaeam imaw ag mas nakaeubot kaysa sa iba? Kon matuod ron hay dapat nga makita sa andang mayad nga pagginawi ag sa mayad nga buhat nga may kalulo nga tanda it matuod nga kaaeam.

¹⁴ Pero kon kamo hay mahisa ag madumot ag maisip hay indi kamo magpabugae nga maaeam kamo ay bukon it matuod ron.

¹⁵ Bukon it makaruyon ro kaaeam nga nagahalin sa Dyos kundi kinalibutanon ron ag saea ron nga isip it mga tawo nga ginagiyahan it mga demonyo.

¹⁶ Basta may mga tawo nga mahisa ag madumot ag maisip hay una man ro kinagulo nga magaresulta sa tanan nga klasi it kaeainan.

¹⁷ Pero kon may kaaeam kita nga halin sa Dyos, una sa tanan hay nagapangabuhi kita it malimpyo, mayad kita makibagay, maeueo, maeumo hambaeon, maeueuy-on permi, perming nagaobra it mayad sa atong isigkatawo, paearehas ro aton nga pagtratar sa tanan nga tawo, ag owa kita nagapakuno-kuno.

¹⁸ Ro bunga it pagpangabuhi nga may paghidait sa kada isaea hay pagkabuhi nga matarong ay indi makapangabuhi it matarong ro mga tawo kon owa man sanda it paghidait sa kada isaea.