Santiago 2 - Inkeanon

Dapat nga Parehas ro Atong Pagtratar sa Atong Isigkatawo

¹ Mga igmanghod ko sa pagtuo, dahil nagatuo eon kamo kay Jesu-Kristo nga atong Ginuo nga eabing dungganon hay dapat nga parehas ro atong pagtratar sa atong isigkatawo.

² Halimbawa abi mana nga may mag-abot nga daywang ka tawo sa inyong simbahan. Ro sambilog hay manggaranon nga nakasingsing it bueawan ag nakasuksuk it nagabarlak. Ro sambilog ma't-a hay pobre ag mahigko ro eambong.

³ Tapos hay mas inatuhon ninyo ratong nakasuksuk it nagabarlak ag hambaeon ninyo nga “Kara ka't-ing pungko, Sir, ay sadyaan dikara.” Ag inyong hambaeon rato nga pobre nga “Tindog eang dikaron sa binit o pungko lang sa saeog agod may tungtungan ako ku ang siki!”

⁴ Kon makaruyon ro inyong ginaobra hay bukon it parehas ro inyong pagtratar sa daywa ngato. Pareho kamo it huwis nga maeain ro kabubut-on ay inyong ginasika-sika ro pobre.

⁵ Pamati kamo, mga pinalangga ko nga igmanghod sa pagtuo! Bukon abi it abo sa mga pobre iya sa kalibutan hay ginpili it Dyos agod mangin manggaranon sa pagtuo kana? Ag bukon abi it itapoe sanda sa anang mga sinakpan ay duyon ro anang ginpromisa sa mga nagahigugma kana?

⁶ Pero kamo't-a hay inyo nga ginasika-sika ro mga pobre ag ro mga manggaranon 't-a ro inyong ginapadunggan. Bukon abi it ro mga manggaranon ro nagapamigos kinyo ag nagapangdakop ag gapangguyod kinyo sa husgado?

⁷ Bukon abi it sanda ro nagainsulto sa taeahuron nga ngaean ni Jesu-Kristo kon siin nakilaea kamo bilang anang mga sumueunod?

⁸ Mayad ro inyong ginahimo kon ginatuman gid ninyo ro sugo it Dyos nga Hari it tanan nga makita sa Sagrado nga Kasueatan nga makaraya: “Higugmaa ro inyong isigkatawo pareho ku inyong paghigugma sa inyong kaugalingon.”

⁹ Ugaling kon ginasika-sika ninyo ro mga kubos hay nagakasaea kamo ag nagapakita ron nga ginaeapas ninyo ro sugo ngaron.

¹⁰ Dumduma ninyo nga bisan gintuman it sangka tawo ro tanan nga sugo it Dyos mageuwas sa sambilog hay nagkasaea gihapon imaw ag manabat imaw ay gineapas nana ro *Kasuguan it Dyos.

¹¹ Matuod ra ay ro Dyos nga nagsugo nga “Indi ka magpangawatan” hay imaw man ro nagsugo nga “Indi ka magpatay.” Halimbawa abi nga owa ka nagpangawatan pero nagpatay ka, imo man gihapon nga gineapas ro Kasuguan it Dyos.

¹² Ngani mag-andam kamo sa inyong ginahambae ag ginahimo tungod nga ro mensahi it Dyos nga nagaturo katon kon paalin kita mahilway sa atong mga maeain nga handom hay imaw man ro gamiton nga basehan it Dyos sa paghusgar kinyo.

¹³ Ginahambae ko ra dahil pag-abot it adlaw it paghukom hay indi pagkaeuy-an it Dyos ro tawo nga owa it kaeuoy sa anang isigkatawo kundi anang pagapinahan. Pero ro maeueuy-on hay anang kaeuy-an ag indi pagpinahan pag-abot it adlaw ngaron.

Kon Matuod ro Atong Pagtuo hay Magahimo Kita it Mayad

¹⁴ Mga igmanghod sa pagtuo, ano baea ro mabuoe it sangka tawo kon maghambae imaw nga nagatuo imaw kay Jesus pero owa imaw it buhat nga nagapakita karon? Maeuwas baea imaw it makaraya nga pagtuo?

¹⁵ Pareho abi mana kon may igmanghod kita sa pagtuo, bayi man o eaki, nga owa eon it ginasuksuk ag ginakueang it pagkaon sa adlaw-adlaw.

¹⁶ Tapos, may sambilog abi mana kinyo nga maghambae kana nga “Hay sige eon. Ayaw it palitik it ueo. Kabay pa nga indi ka pageamigon ag paggutmon.” Pero owa man ninyo imaw pagtaw-i it anang kinahangeanon. Hay ano ro pueos ku hambae ngato?

¹⁷ Makaruyon man ro pagtuo. Kon gahinambae malang ro tawo nga nagatuo imaw kay Jesus ag owa man it buhat nga nagapakita ku anang pagtuo ngaron hay patay ron ag owa it pueos.

¹⁸ Pero may una siguro kinyo nga mahambae nga, “Owa ma't-a nagapaeareho ro pagsunod it mga tawo sa Dyos. Ro iba hay may anda nga pagtuo ag ro iba ma't-a hay may mayad nga buhat.” Ro akong sabat hay raya: paalin makita ro imong pagtuo kay Jesus kon owa ka it binuhatan nga nagapakita karon? Pero ako, ipakita ko ro akon nga pagtuo paagi sa akon nga binuhatan.

¹⁹ Eaom mo hay may pagtuo ka dahil nagapati ka nga may sambilog eang nga Dyos. Matuod nga may sambilog eang nga Dyos ugaling ro pagpati eang karon hay kueang ay bisan ngani ro mga demonyo hay nagapati man karon ag nagapaeangurog pa sa kahadlok sa pina nana kanda sa ulihi.

²⁰ Ay, samad 't-a ro imong ueo! Kinahangean ko pa baea nga pamatud-an kimo nga owa it pueos ro pagtuo nga owa it binuhatan nga nagapakita karon?

²¹ Bukon abi it ginbilang it Dyos nga matarong ro aton anay nga lolo nga si *Abraham paagi sa anang buhat tag anang gintuman ro sugo it Dyos nga ihaead ro anang unga nga si Isaac bilang sakripisyo?

²² Makita mo dikara nga ro anang pagtuo ag ro anang buhat hay nagaimaw. Dahil sa anang buhat hay nangin kompleto ro anang pagtuo sa Dyos.

²³ Ag sa ginhimo ngato ni Abraham hay napamatud-an ro ginhambae it Sagrado nga Kasueatan nga, “Si Abraham hay nagtuo sa Dyos, ag tungod sa anang pagtuo, ginbilang imaw it Dyos nga matarong.” Ag gintawag pa imaw it Dyos nga anang amigo.

²⁴ Ngani makita mo pa gid nga ro tawo hay ginabilang nga matarong it Dyos bukon eang it sa anang paghambae nga nagatuo imaw kundi dapat nga may kaibahan man ron nga buhat nga nagapakita ku pagtuo na ngaron.

²⁵ Dumduma si Rahab, tag bayi nga kato anay hay nagabaligya ku ana nga eawas. Bukon abi it ginbilang man imaw it Dyos nga matarong dahil sa anang mayad nga buhat tag ginpadayon nana sa anang baeay ro mga espiya nga mga inapo ni Israel? Pagkatapos, ginturo nana kanda ro iba nga aeagyan agod makapaeagiw sanda.

²⁶ Ro dapat naton nga maeubtan sa akong mga ginhinambae ngara hay ro pagtuo nga owa it binuhatan nga nagapakita karon hay patay ag owa it pueos pareho it eawas nga kon owa eon it ginhawa hay patay eo't-a.