Santiago 1 - Inkeanon

Mga Pagpangamusta

¹ Raya nga sueat hay halin kakon nga si Santiago nga isaeang ka ulipon it Dyos ag ni Ginuong Jesu-Kristo. Nagasueat ako kinyo nga mga inapo ni *Israel nga nagatuo kay Jesu-Kristo ag nagaistar eon sa nagakaeain-eain nga lugar sa kalibutan. Kumusta lang kinyo tanan.

Dapat Kita nga Magmalig-on sa Atong Pagtuo Bisan sa Anong Kahimtangan

² Mga kaigmanghuran ko sa pagtuo, kada ngani mag-abot ro sari-sari nga pagtesting sa inyong pagtuo hay bilanga ron ninyo nga rason nga dapat kamo magkalipay it duro,

³ ay sayod kamo nga kon ginatestingan ro inyong pagtuo hay oportunidad ron ninyo nga mag-antigo nga magbatas.

⁴ Ngani batasa ninyo ro mga pagtesting sa inyong pagtuo nga inyong ginaagyan ay ro bunga karon hay magaamat nga magamayad ro inyong batasan hasta owa eon it ikasaway karon.

⁵ Pero mahimo eang ninyo ron paagi sa bulig it kaaeam nga halin sa Dyos. Ngani kon may una kinyo nga kueang it kaaeam ngaron hay pangayo kamo sa Dyos ag taw-an nana kamo. Ro Dyos abi hay nagatao nga owa it hawid-hawid sa tanan nga nagapangayo kana ag owa it kaibahan nga pangisog.

⁶ Pero kon magpangayo kamo, dapat nga magtuo kamo ag indi magduda. Ro tawo abi nga nagaduda hay pareho it humbak nga idto maadto kon siin hampakon it mabaskog nga hangin.

⁷ Ro makaruyon nga tawo hay indi dapat magpaabot nga taw-an it Dyos it bisan ano nga anang ginapangayo.

⁸ Ham-an abi? Tungod nagaisaea-daywa ro anang paino-ino kon magasalig baea imaw it hugot sa Dyos o indi. Ag ro anang kabuhi hay matsa baeay nga mahuyang.

⁹ Ro mga igmanghod sa pagtuo nga kubos hay may ikapabugae tungod dungganon sanda sa mata it Dyos.

¹⁰ Ag ro mga igmanghod sa pagtuo nga manggaranon hay may ikapabugae man tungod owa eon sanda gasalig sa andang manggad. Kasayod sanda nga bisan manggaranon sanda hay mamatay man gihapon sanda pareho ku mga bueak it hilamunon.

¹¹ Ro mga hilamunon abi hay nagakaeaay sa makapaeaso nga silak it adlaw ag nagakaeadagas ro andang mga bueak ag nagakaeaduea ro andang kanami. Makaruyon man ro mga manggaranon, mamatay ea't-a sanda samtang masako sa pagpamanggad.

¹² Bulahan ro nagabatas it mga pagtesting sa andang pagtuo ag owa nagatalikod dikaron tungod aprubahan sanda it Dyos. Magabaton dayon sanda it premyo nga kabuhi nga ginpromisa it Dyos sa mga nagahigugma kana.

¹³ Pero kon ro sangka tawo hay matentar nga magpakasaea kon ginatestingan ro anang pagtuo hay indi imaw dapat maghambae nga ginatentar imaw it Dyos. Owa't-a abi gapangtentar ro Dyos bisan kanyo ag indi't-a makatentar kana ro mga maeain nga bagay.

¹⁴ Ro maeain 't-a nga mga handom it tawo ro nagatueod ag nagaganyak kana nga maghimo it saea.

¹⁵ Ag kon ginatuman nana ro anang maeain nga handom hay ro bunga kara hay saea ag kon ro tawo hay kontrolado eon it saea, ro anang dangatan hay kamatayon nga owa it katapusan nga pina.

¹⁶ Ngani mga palangga nakon nga mga igmanghod, ayaw ninyo paglukuha ro inyong kaugalingon sa pagpaino-ino nga nagapangtentar ro Dyos

¹⁷ tungod ro tanan nga halin sa Dyos nga ginatao nana katon hay mayad ag owa gid it bisan anong maeain. Imaw ro Ama nga nagtuga ku adlaw, buean ag mga bituon. Nagatiniyog ra sanda ngani ro hayag nga nagahalin kanda hay nagaeain-eain man. Kon amat hay hasasalipdan ngani nagasaeom man o kundi hay nagadueom gid. Pero ro Dyos hay bukon it makaruyon. Owa gid imaw nagaeain ag owa gid it makaabang sa anang pagpakamaayo katon.

¹⁸ Suno sa anang plano kato pa eagi hay ana kita nga gintaw-an it bag-o nga kabuhi paagi sa atong pagpati sa matuod nga mensahi nga ginsugid katon. Ana ra nga ginhimo agod halin sa tanan nga tawo iya sa kalibutan, kita nga mga tumueuo hay ana nga ipaeain nga mangin anang mga katawhan. Nangin pareho kita it primerong ani nga ginapaeain agod ihaead sa Dyos.

Indi eang Kita Magpamati sa Mensahi it Dyos Kundi Aton man ra nga Tumanon

¹⁹ Mga pinalangga ko nga igmanghod sa pagtuo, tandai ninyo ra. Kita tanan hay dapat magpamati gid it mayad ag indi magdaso-daso sa paghambae kundi magpaino-ino anay. Indi man dapat kita madali maakig

²⁰ tungod ro kaakig hay indi gid makabulig sa tawo nga magkabuhi it matarong suno sa gusto it Dyos.

²¹ Ngani aywani eon ninyo ro tanan nga kalaswaan ag ro mga kaeainan nga ginahimo it kaeabanan. Batuna ninyo nga may pagpaubos ro mensahi it Dyos nga anang gintanom sa inyong mga paino-ino ay ro mensahi ngaron ro makaeuwas kinyo.

²² Ayaw eang kamo it pamati sa mensahi it Dyos kundi nga dapat gid ninyong tumanon ro anang ginasugo kinyo ay kon gaeaom kamo nga owa't kinahangean nga tumanon ron hay ginaluko eang ninyo ro inyong kaugalingon.

²³ Ro bisan sin-o abi nga nagapamati sa mensahi it Dyos pero owa nagasunod sa anang nabatian hay pareho it tawo nga nagapangispiho ag ginatan-aw na gid ro anang uyahon, ugaling

²⁴ bisan may hakita ma't-a imaw nga aeayuson hay matalikod man la't-a imaw ag mapanaw, ag indi na eon madumduman kon ano dapat ro anang aeayuson.

²⁵ Pero ro tawo nga nagausisa it mayad sa perpekto nga mensahi it Dyos nga nagahilway sa tawo ag nagatuman karon hay pakamaayuhon it Dyos sa anang ginaobra. Pakamaayuhon imaw dahil owa eang imaw nagapamati ag tapos lipatan man dayon kundi padayon imaw nga nagatuman.

²⁶ Kon may nagaeaom nga relihiyoso imaw pero indi man makapugong sa anang ba-ba hay ginaluko eang nana ro anang kaugalingon ay ro anang pagkarelihiyoso hay owa it pueos.

²⁷ Ro pagkarelihiyoso nga limpyo ag owa it ikasaway sa mata it Dyos nga Ama hay makaraya: nagabulig sa mga ilo ag sa mga baeo nga nagakalisod ag nagaandam man nga indi matapnan it mga maeain nga batasan sa kalibutan.